Read La Bible en Sango courant – Mbeti ti Nzapa Abia (Psaumes) 7 Bible Online

Abia (Psaumes) 7 - La Bible en Sango courant – Mbeti ti Nzapa bible

Abia (Psaumes) 7

¹Bia ti mawa; David ahe ni na *KOTA GBIA ndali ti Kush, zo ti mara ti Benjamin.

²KOTA GBIA, Nzapa ti mbi, mbi kpe na mo ti bata tere ti mbi; soo mbi, zi mbi na maboko ti azo so ayeke sara ngangu na mbi!

³Tongaso pepe, fade ala yeke suru ya ti mbi tongana bamara; ala yeke mu mbi ahon na mbi si zo ti ga ti zi mbi ayeke daa oko pepe.

⁴KOTA GBIA, Nzapa ti mbi, mbi sara mbeni ye tongaso? Mbi sara sioni na mbeni zo?

⁵Mbi sara kua ti mbana na *mbuki ti mbi? Mbi mu ye ti wato ti mbi senge senge?

⁶Tongana mbi sara aye tongaso, ayeke nzoni wato ti mbi atumba peko ti mbi, lo gbu mbi, lo bi mbi na sese, lo do ya ti mbi si lo sara mbi taa potopoto! Luti kete

⁷KOTA GBIA, londo mo fa ngonzo ti mo! Awato ti mbi atomboka na ngonzo, kanga lege na sioni ngonzo ti ala! Luti na tere ti mbi ti bata mbi, mo so mo yeke baa lege ti fango ngbanga.

⁸Ayeke nzoni bongbi ti amara angoro mo; kâ na nduzu na ndö ti mbata ti mo, ayeke nzoni mo duti gbia na ndö ti ala.

⁹KOTA GBIA, mo so mo yeke fâ ngbanga ti amara nde, fâ ngbanga ti mbi alingbi na mbirimbiri ti mbi; tënë ayeke na li ti mbi pepe.

¹⁰Kanga lege na sioni ti azo ti sioni! Sara si zo ti mbirimbiri akpengba! Biani, mo so mo yeke Nzapa ti mbirimbiri, mo laa mo hinga tënë so ayeke na ya ti be ti zo nga na nzara ti be ti lo.

¹¹*Vala ti batango mbi ayeke na Nzapa; lo yeke wasongo azo ti vurungo be.

¹²Nzapa ayeke wafango-ngbanga ti mbirimbiri; lo yeke Nzapa so ayeke so na ndö ti azo lakue.

¹³Tongana wato ni azia ngbene lege ti sarango ye ti lo pepe, lo yeke za yanga ti yongoro zeme ti lo, lo yeke gboto ya ti kokora ti lo ti ku.

¹⁴Lo leke aye ti bira so ayeke fâ zo; lo leke ale ti kokora so lo zia wâ daa.

¹⁵Zo so aleke na be ti lo ti sara sioni, fade sioni ni ayeke kono na ya ti lo ti ga kpale; na pekoni, lo yeke du atënë ti mvene.

¹⁶Zo so azi du si lo zi ni ali mingi, lo wani, lo yeke ti na ya ni.

¹⁷Sioni so lo leke na be ti lo so ayeke kiri na li ti lo; aye ti ngangu so lo sara na amba ti lo ayeke kiri na ndö ti lo wani.

¹⁸Fade mbi yeke mu singila na KOTA GBIA ndali ti mbirimbiri ti lo; mbi yeke he bia ti gonda na iri ti KOTA GBIA, lo so lo yeke na yayu kâ na ndö ti aye kue.