Read La Bible en Sango courant – Mbeti ti Nzapa Abia (Psaumes) 74 Bible Online

Abia (Psaumes) 74 - La Bible en Sango courant – Mbeti ti Nzapa bible

Abia (Psaumes) 74

¹Bia ti fango ye na zo. Bia ti Asaf. O Nzapa, mo ke e biani biani ngbanga ti nyen? E so mo yeke bata e tongana ataba ti mo so, mo sara ngonzo ti wâ na tere ti e ngbanga ti nyen?

²Dabe ti mo na azo ti mo so mo mu ala ti ga ye ti mo ngbene ye giriri; dabe ti mo na azo ti mo so mo zi ala ando na gbe ti ngbaa titene ala ga azo ti mo so; dabe ti mo na hoto ti *Sion so ayeke ndo so mo yeke duti ando daa so.

³Ga mo baa ndo so abuba biani biani awe so: na ndo ti mo so ayeke nde si ayeke nzoni kue so, wato abuba ye kue awe.

⁴Ndo so mo yeke tengbi ando na e daa so, azo so ake mo adekongo daa; ala zia bendere ti ala na ndo ni.

⁵Ala yeke tongana azo so amu do ti de na akeke na ya ti gbako.

⁶Ala mu do na martoo, ala kungbi apendere ye ti kode so kue a leke ni na ya ti kota da ti mo.

⁷Ndo ti mo so ayeke nde si ayeke nzoni kue so, ala zia wâ daa si agbi; da so iri ti mo ayeke na ndö ni so, ala kungbi ni na sese, ala sara si aga *sioni.

⁸Ala tene na be ti ala, atene: “Fade e yeke nika ala biani biani!” Ando so kue azo ayeke voro Nzapa daa na ya ti kodro ni, ala gbi ni awe.

⁹Ye so afa atene, mo yeke na popo ti e, e kiri e baa ni pepe; mbeni wayanga-Nzapa oko ayeke na popo ti e mbeni pepe. Aye ni so ayeke gue ngbii ti hunzi lawa? Na popo ti e, mbeni zo oko ahinga ni pepe.

¹⁰Nzapa, zo ti kengo mo ayeke ngba ti zonga mo ngbii asi lawa? Fade wato ayeke ngba ti zonga iri ti mo lakue?

¹¹Ngbanga ti nyen si mo ke ti mu maboko na e so? Ngbanga ti nyen si mo kanga maboko ti mo kangango so?

¹²Nzapa, mo yeke gbia ti mbi ngbene ye giriri; mo laa mo zi azo ti kodro so na ya ti pasi.

¹³Mo laa mo kangbi ya ti kota ngu-ingo na lege ti ngangu ti mo, mo laa mo fâ li ti asioni nyama ti kota ngu-ingo.

¹⁴Mo laa mo nika ali ti Leviatan si mo mu kuâ ti lo na anyama ti benyama ti te.

¹⁵Mo laa mo suru lege na ali ti ngu nga na akete ngu so ayeke sua, *abale so ngu ti ya ni ayeke hole ka pepe, mo sara si ahole.

¹⁶Kota lâ ayeke ti mo, bi nga ayeke ti mo, mo laa mo sara nze na lâ.

¹⁷Mo laa mo zia amaka ti sese kue, mo sara ngoi ti buru na ti ngu-Nzapa.

¹⁸*KOTA GBIA, dabe ti mo na ye so: wato ayeke zonga mo, azo so ahinga ndo pepe so ayeke buba iri ti mo.

¹⁹Azo ti mo so mo ye ala mingi so, mo zia ala na maboko ti anyama pepe, azo ti mo so ayeke azo ti mawa so, mo girisa ala biani biani pepe.

²⁰Baa ndo na tënë ti mbuki ti mo si! Na ndo so avuko vukongo na ya ti kodro ni, azo ahonde tere ti ala ti sara ngangu na amba ti ala.

²¹Zo so azo asara ngangu na lo, ayeke nzoni lo kiri na kamene na le ti lo pepe; zo ti mawa na zo so ye atia lo, ayeke nzoni ala sepela iri ti mo.

²²Nzapa, londo! Gbu koko ti mo wani! Zonga so azo so li ti ala ayeke daa pepe ayeke zonga na mo lakue so, dabe ti mo na ni!

²³Girisa dekongo ti awato ti mo pepe, nga na wusuwusu so azo so ake mo ayeke sara lakue na mo so.