Read La Bible en Sango courant – Mbeti ti Nzapa Abia (Psaumes) 89 Bible Online

Abia (Psaumes) 89 - La Bible en Sango courant – Mbeti ti Nzapa bible

Abia (Psaumes) 89

¹Bia ti Etan, zo ti mara ti Ezrahi. Bia ti fango ye na zo.

²*KOTA GBIA, fade mbi yeke he bia lakue ti fa nzoni be ti mo; mbi yeke fa na azo ti angoi kue so mo yeke bata tënë ti yanga ti mo.

³Biani, mbi tene: Nzoni be ti mo angba kpu na kpu, mo yeke bata tënë ti yanga ti mo tongana le ti nduzu so angba lakue.

⁴Mo tene: “Zo so mbi soro lo, mbi na lo, e ga ambuki awe; mbi deba yanga na David, zo ti kua ti mbi, mbi tene:

⁵Fade mbi yeke sara si mbeni *hale ti mo angba gbia kpu na kpu, mbi yeke bata mbeni zo ti sewa ti mo na ndö ti mbata ti gbia na angoi kue.” Luti kete

⁶KOTA GBIA, aye so ayeke na yayu ayeke sepela mo ndali ti aye ti kpene ti mo! Bongbi ti *a-ange ayeke sepela mo ndali ti batango tënë ti yanga ti mo so mo yeke bata.

⁷KOTA GBIA, na nduzu kâ, zo wa laa alingbi na mo, zo wa? Na popo ti anzapa, mbeni oko tongana mo ayeke daa?

⁸Na ya ti bongbi ti a-ange, Nzapa ayeke zia kota mbeto na be ti ala; lo yeke zia mbeto mingi na be ti ala so kue angoro lo.

⁹KOTA GBIA, Nzapa so ayeke na ndö ti dunia kue, zo wa laa ayeke ngangu tongana mo, zo wa? KOTA GBIA, batango tënë ti yanga ti mo so mo yeke bata laa angoro mo.

¹⁰Mo laa mo yeke kanga lege na baba ti kota ngu-ingo; tongana *amapo ti lo alondo, mo laa mo yeke kai ni.

¹¹Mo laa mo fâ Rahab si mo nika kuâ ti lo nikango. Na lege ti ngangu ti mo, mo sara si awato ti mo akpe kirikiri.

¹²Yayu ayeke ti mo, sese ayeke nga ti mo! Dunia na aye so kue ayeke na ya ni, mo laa mo sara ni.

¹³Banga na Mbongo, mo laa mo sara si abaa gigi; hoto ti Tabor na ti Hermon ayeke pika sako na iri ti mo.

¹⁴Maboko ti mo ayeke ngangu mingi, mo yeke ngangu, mo yo maboko ti mo ti koli na nduzu!

¹⁵Gere ti mbata ti mo ti gbia aluti na ndö ti ye ti mbirimbiri na fango ngbanga ti mbirimbiri. Na ndo so kue mo yeke gue daa, nzoni be na taa-tënë laa amu dawa ti mo.

¹⁶Ti ala nzoni, azo so ahinga ti dekongo na ngia na mo KOTA GBIA! Fade ala yeke tambula na lumiere ti le ti mo.

¹⁷Ndali ti iri ti mo, ala yeke dodo na ngia lakue; ndali ti mbirimbiri ti mo, ala yeke tambula, li ti ala na nduzu.

¹⁸Biani, mo laa mo yeke ngangu ti ala na gonda ti ala; na lege ti nzoni be ti mo, mo sara si e mu li ti e na nduzu.

¹⁹KOTA GBIA, zo ti batango e alondo na mo, gbia ti e alondo na Nzapa ti Israel, lo so lo yeke nde si lo yeke nzoni kue.

²⁰Mbeni lâ, na ya ti mbeni ye tongana bango-li, mo tene tënë na azo ti mo so angba na lege ti mo, mo tene: “Mbi mu maboko na mbeni kpengba koli oko na popo ti azo ti mbi, mbi zia mbeni maseka-koli na li ti azo ti mbi.

²¹Mbi wara David, zo ti kua ti mbi, mbi tuku mafuta ti mbi na li ti lo ti zia lo gbia; mafuta so ayeke nde si ayeke nzoni kue.

²²Lo laa maboko ti mbi ayeke gbu lo ngangu titene lo ngba na nduzu, ngangu ti mbi ayeke sara si lo kpengba.

²³Fade wato alingbi ti gbu lo pepe, zo ti sioni alingbi ti hon ndö ti lo pepe.

²⁴Azo so ake lo, fade mbi yeke nika ala na le ti lo, mbi yeke pika azo so be ti ala ake lo.

²⁵Mbi yeke bata tënë ti yanga ti mbi na lo si mbi yeke sara nzoni be na lo; ndali ti mbi, fade lo yeke mu li ti lo na nduzu.

²⁶Mbi yeke sara titene lo duti na komandema na ndö ti kota ngu-ingo nga na ndö ti *abale.

²⁷Lo yeke iri mbi: ‘Babâ ti mbi, Nzapa ti mbi, kota têne so mbi luti na ndö ni ti soo kuâ!’

²⁸Ti mbi, mbi yeke sara titene lo ga kozo molenge ti mbi ti koli, gbia so ayeke kota ahon agbia kue ti sese.

²⁹Mbi yeke ngba ti sara nzoni be na lo kpu na kpu, mbi yeke bata tënë ti mbuki ti mbi na lo lakue.

³⁰Mbi yeke sara si mbeni *hale ti lo angba gbia kpu na kpu si mbata ti lo ti gbia angba lakue tongana le ti nduzu.

³¹“Tongana ahale ti lo azia *Ndia ti mbi, tongana ala sara ye na lege ti atënë ti ndia ti mbi pepe,

³²tongana ala ke ti sara ye alingbi na aye so mbi fa si ala bata atënë ti yanga ti mbi pepe,

³³fade mbi yeke pika ala na zaza ndali ti so ala ke yanga ti mbi, mbi yeke pika ala ndali ti sioni ti ala.

³⁴Me fade mbi yeke zi nzoni be ti mbi na mbage ti David pepe, mbi yeke bere tënë ti yanga ti mbi pepe.

³⁵Mbi yeke buba ya ti mbuki ti mbi pepe, tënë so asigigi na yanga ti mbi, mbi yeke ngba gi na ndö ni.

³⁶Mbi deba yanga ti mbi fani oko awe, mbi tene: na iri ti mbi so ayeke nde si ayeke nzoni kue, fade mbi yeke handa David oko pepe!

³⁷Fade ahale ti lo ayeke ngba gbia kpu na kpu si mbata ti lo ti gbia ayeke ngba na dawa ti mbi lakue tongana ti so lâ angba lakue.

³⁸Mbata ni ayeke duti daa lakue tongana ti so nze aduti na peko ti ambinda si lo yeke baa aye kue so.” Luti kete

³⁹Me zo ti mo so mo tuku mafuta na li ti lo titene lo ga gbia so, mo ke lo awe, mo zia buba na tere ti lo, mo sara ngonzo na tere ti lo.

⁴⁰Mo buba ya ti mbuki so mo sara na zo ti kua ti mo so awe; kpoto ti lo ti gbia, mo bi ni na sese si aga *sioni.

⁴¹Mo kungbi gbagba ti lo kue awe, mo buba ngangu gbagba ti lo kue.

⁴²Azo so kue ahon na lege anzi aye ti lo, azo so alango nduru na lo azonga lo.

⁴³Mo sara si awato ti lo ahon ndö ti lo, mo sara si azo so ake lo aduti na ngia.

⁴⁴Mo buba yanga ti yongoro zeme ti lo, mo mu maboko na lo na ngoi ti bira pepe.

⁴⁵Mo sara si gonda ti lo ahunzi awe, mo kinda mbata ti lo ti gbia na sese.

⁴⁶Mo sara si lo ga kangba hio, mo sara si kamene ahon ndö ti lo. Luti kete

⁴⁷KOTA GBIA, mo yeke honde tere ti mo ngbii asi lawa? Ngonzo ti mo so ayeke gbi ye tongana wâ so ayeke ngba ngbii asi lawa?

⁴⁸Dabe ti mo na mbi si: lango ti fini ti mbi ayeke gi nduru! Mo sara zo titene lo ga gi senge senge ye?

⁴⁹Zo wa laa alingbi ti duti na fini si lo yeke kui ande pepe, zo wa? Zo wa laa alingbi ti kpe ndo ti akuâ, zo wa?

⁵⁰Kota Gbia, nzoni be ti mo ti giriri so ayeke na ndo wa? Ando, mo deba yanga ti mo na David ti bata tënë ti yanga ti mo na lo; tënë ni ayeke na ndo wa?

⁵¹Kota Gbia, dabe ti mo na zonga so azo azonga na azo ti kua ti mo; dabe ti mo na zonga ti gba ti amara so a zia na li ti mbi so.

⁵²KOTA GBIA, awato ti mo azonga zo so mo tuku mafuta na li ti lo ti ga gbia so, ala zonga peko ti gere ti lo.

⁵³E mu singila na KOTA GBIA kpu na kpu! Amen, amen!