Read La Bible en Sango courant – Mbeti ti Nzapa Abia (Psaumes) 99 Bible Online

Abia (Psaumes) 99 - La Bible en Sango courant – Mbeti ti Nzapa bible

Abia (Psaumes) 99

¹*KOTA GBIA ayeke gbia, tere ti azo ayeke do! Lo duti na ndö ti *asheruben, sese ayeke yingi!

²KOTA GBIA ayeke kota na *Sion, lo yeke na nduzu na ndö ti amara kue.

³Ayeke nzoni azo asepela iri ti mo so ayeke kota si ayeke zia mbeto na be ti zo. — Biani, mo yeke nde si mo yeke nzoni kue!

⁴Ayeke nzoni azo agonda ngangu ti mo gbia, mo so mo ye fango ngbanga na legeni. Mo laa mo zia na sese atënë ti ndia. Mo laa mo zia na azo ti Israel tënë ti fango ngbanga na legeni na sarango ye ti mbirimbiri.

⁵Ala azo, ala mu iri ti KOTA GBIA Nzapa ti e na nduzu, ala kuku akpo li ti ala na sese na dawa ti mbata ti gere ti lo. — Biani, lo yeke nde si lo yeke nzoni kue!

⁶Moïse na Aaron ayeke ando na popo ti awayango-sandaga ti lo; Samuel ayeke ando na popo ti azo so adi iri ti KOTA GBIA si lo yeke kiri tënë na ala.

⁷Na ya ti ngbongboro mbinda, lo yeke tene tënë na ala; ala sara ye alingbi na aye so lo hunda na ala, nga na andia so lo mu na ala.

⁸KOTA GBIA Nzapa ti e, mo wani, mo yeke kiri ando tënë na ala; mo yeke Nzapa so mo yeke zi siokpari na li ti ala, me mo yeke kiri nga na ala peko ti sioni ti ala.

⁹Ala mu iri ti KOTA GBIA Nzapa ti e na nduzu, ala kuku akpo li ti ala na sese na dawa ti hoto ti lo so ayeke nde si ayeke nzoni kue. — Biani, KOTA GBIA Nzapa ti e ayeke nde si ayeke nzoni kue!