Read La Bible en Sango courant – Mbeti ti Nzapa Amato 20 Bible Online

Amato 20 - La Bible en Sango courant – Mbeti ti Nzapa bible

Amato 20

¹Vin asara si zo aga zo ti hengo ndo; samba ayeke pusu zo ti sara wusuwusu. Zo so samba ayeke sara lo, lo lingbi ti ga zo ti ndara pepe.

²Ngonzo ti wâ ti gbia ayeke tongana toto ti bamara so ayeke zia kota mbeto na be ti zo; zo so asara si ngonzo ti gbia alondo, lo gi kuâ na tere ti lo wani.

³Zo so ayoro tere ti lo na ya ti tiri pepe, lo yeke ne tere ti lo; me ti azo ti buba, tere ti ala ayeke do dongo ti li na ya ti tiri.

⁴Na ngoi ti fango yaka, zo ti sopo aye ti fâ yaka pepe; na ngoi ti fango ale ti kobe, lo yeke gue ti gi kobe, me lo yeke wara ye oko pepe.

⁵Atënë ti be ti zo ali tongana kota ngu; zo so ahinga ndo laa alingbi ti sigigi na ni.

⁶Azo mingi ayeke gonda tere ti ala atene, ani yeke nzoni; me zo wa laa alingbi ti wara zo so lo lingbi ti zia be ti lo na ndö ti lo?

⁷Zo ti mbirimbiri so fini ti lo ayeke na legeni, amolenge ti lo ayeke baa nzoni na peko ti lo!

⁸Tongana gbia aduti ti fâ ngbanga si mbeni ye ti sioni ayeke daa, fafade le ti lo ayeke ti na ndö ni.

⁹Zo wa laa alingbi ti tene: “Mbi sara si be ti mbi avuru! A sukula siokpari ti mbi awe!”, zo wa?

¹⁰Akilo na asembe ti hakango na ye so ayeke na legeni pepe, be ti KOTA GBIA ake ni mingi.

¹¹Alingbi ti hinga atene, lege ti dutingo ti mbeni maseka ayeke nzoni si ayeke mbirimbiri gi na lege ti sarango ye ti lo.

¹²Mê so ayeke ma na ndo nga na le so ayeke baa na ndo, ala use kue, KOTA GBIA laa asara ala.

¹³Tongana mo ye ti ga wayere, mo lango na ngoi kue! Me tongana mo ye ti te kobe, ya ti mo asi, mo zi le ti mo ngaan, mo baa ndo!

¹⁴Zo ti vongo ye atene: “Ngere ni ayeke ngangu mingi!” Me tongana lo mu lege ti hon, lo yeke na ngia, ngbanga ti so lo wara nzoni ngere.

¹⁵Lôro na atêne ti ngangu ngere ayeke gbani gbani; me ye so warango ni ayeke ngangu ayeke tënë so ayeke fa hingango ndo na zo.

¹⁶Tongana mbeni zo aga abaa mo titene mo sara boon na mbeni wande, alingbi mo mu bongo ti zo so aga abaa mo so; mo bata bongo ni, ngbanga ti so lo mu zendo ti sara boon na mbeni wande.

¹⁷Kobe so zo anzi anzere na lo, me na pekoni, kobe ni aga mbutu so asi yanga ti lo.

¹⁸Tongana mo hunda anzoni wango, fade apialo ti mo ayeke ga nzoni; kozo titene mo londo ti gue na bira, ayeke nzoni mo leke gere ni nzoni si.

¹⁹Zo so afono na iri ti amba ti lo, lo yeke fa nga na gigi atënë so ahonde; mo kpe lege ti azo so ayeke diko atënë gbani gbani.

²⁰Zo so adeba babâ na mama ti lo, fini ti lo akpa lamba so amingo na bi.

²¹Mosoro so zo awara hio hio na kozo lango, gbanda mosoro ni ayeke sara nzoni na lo pepe.

²²Mo tene na be ti mo pepe, mo tene: “Sioni so a sara na mbi so, fade mbi yeke kiri peko ni si!” Me mo zia be ti mo na ndö ti KOTA GBIA, fade lo yeke soo mo.

²³Kilo so ayeke na legeni pepe, be ti KOTA GBIA ake ni mingi; kilo so ayeke mbirimbiri pepe, ayeke nzoni pepe.

²⁴Ndali ti KOTA GBIA, zo ayeke mu nzoni lege; me zo alingbi ti hinga ndo so lo yeke gue daa tongana nyen?

²⁵Tongana zo amu zendo ti mu ye na Nzapa, ayeke nzoni lo gbu li ti lo mbirimbiri kozoni si. Tongana lo mu zendo ni si lo gbu li ti lo na peko, fade ayeke ga kuku ndali ti lo.

²⁶Gbia so ayeke na ndara ayeke kangbi azo ti sioni kirikiri; lo yeke nika ala nikango.

²⁷Yingo ti zo ayeke lamba so KOTA GBIA amu na lo si ayeke za na ya ti be ti lo kâ.

²⁸Sarango nzoni be na batango tënë ti yanga ayeke bata gbia. Na lege ti nzoni be si sarango komandema ti lo ayeke kpengba.

²⁹Ye so ayeke sara gonda ti amaseka ayeke ngangu ti ala; ye so ayeke sara nengo ti ambakoro ayeke vuru kua ti li ti ala.

³⁰Tongana a pika zo si lo wara ka, ka ni alingbi ti ga tongana yoro ti kaingo na sioni ti lo; pikango zo alingbi nga ti *sukula ya ti be ti lo.