Read La Bible en Sango courant – Mbeti ti Nzapa Amato 22 Bible Online

Amato 22 - La Bible en Sango courant – Mbeti ti Nzapa bible

Amato 22

¹Titene iri ti zo awu nzoni, so laa ayeke nzoni ahon titene lo duti na gba ti mosoro. Titene azo aye lo, so laa ayeke nzoni ahon titene lo duti na wen ti nginza na lôro.

²Ye so abongbi zo ti mosoro na wayere ayeke so: KOTA GBIA laa asara ala use kue.

³Zo ti hango le, tongana lo baa sioni ye ayeke ga, lo yeke honde tere ti lo. Ti azo so le ti ala ahan pepe, ala yeke hon ti ala hongo; tongaso, ala yeke wara ye ti pekoni.

⁴Zo so asara tere ti lo kete, andaa lo kpe mbeto ti KOTA GBIA; ye so lo yeke wara na pekoni ayeke mosoro, azo ayeke ne lo si gigi ti lo ague, ayo.

⁵Aki na akuku ayeke na lege ti zo ti sarango ye ti kirikiri; zo so aye ti bata fini ti lo, ayeke nzoni lo kpe lege ti aye ni.

⁶Na ngoi so molenge angba kete, mo fa nzoni lege na lo; ataa lo ga mbakoro, fade lo yeke zia lege ni pepe.

⁷Zo ti mosoro asara komandema na ndö ti awayere; zo so ahunda boon, lo ga ngbaa ti zo so asara boon ni na lo.

⁸Zo so alu sioni ye, lengo ni so lo yeke ko ayeke kpale; ngangu so lo yeke sara na sioni na azo, fade ayeke hunzi.

⁹Zo so ayeke sara nzoni be na azo, fade tufa ayeke ga na ndö ti lo, ngbanga ti so lo mu kobe na awayere.

¹⁰Tumba zo ti hengo ndo, tongaso si tënë ti papa, tënë ti tiri na abuba tënë akai.

¹¹Zo so aye tënë ti azo ti vurungo be si lo yeke tene tënë na nzoni be, lo yeke ga kamarade ti gbia.

¹²Le ti KOTA GBIA akpengba na ndö ti hingango ye, me lo yeke buba ya ti tënë ti zo ti handango ndo.

¹³Zo ti sopo atene: “Bamara ayeke na gigi! Fade lo yeke fâ mbi taa na be ti lege!”

¹⁴Anzerengo tënë ti awali ti azo ayeke tongana kuku. Azo so be ti KOTA GBIA aso na ala, ala yeke ti na ya ni.

¹⁵Kua ti amolenge ayeke sarango aye ti buba. Me tongana a pika ngbonda ti ala, fade ala yeke zia lege ni.

¹⁶Zo so asara ngangu na wayere, lo sara si wayere ni aga kota zo. Zo so amu ye na zo ti mosoro, fade ye atia lo.

¹⁷Dingi mê ti mo, mo ma tënë ti azo ti ndara; gbu li ti mo mbirimbiri na ndö ti ye so mbi hinga si mbi yeke fa na mo.

¹⁸Tongana mo bata aye ni so na be ti mo si mo yeke tene tënë ni lakue na azo, fade be ti mo ayeke nzere.

¹⁹Mbi ye titene mo zia be ti mo na ndö ti KOTA GBIA. Ndani laa, mo nga, mbi yeke fa aye ni so na mo laso.

²⁰Mbi su na mbeti ndali ti mo awango nde nde na atënë ti gbungo-li so wungo ni ayeke nduru na baleota.

²¹Fade aye ni ayeke sara titene mo hinga ye so ayeke mbirimbiri na ye so ayeke taa-tënë; tongaso si mo lingbi ti kiri ti fa peko ti tënë na legeni na zo so atokua fade mo.

²²Mo mu aye ti wayere na ngangu pepe, ngbanga ti so lo yeke na ngangu pepe. Na le ti ngbanga, mo sara ngangu na zo ti mawa pepe.

²³Biani, fade KOTA GBIA ayeke gbu koko ti ala; azo so azi aye ti awayere na ti azo ti mawa ni so, fade KOTA GBIA ayeke zi fini ti ala.

²⁴Zo so be ti lo gi wâ wâ, mo na lo asara kamarade pepe; zo so ayeke na ngonzo ti wâ mingi, mo na lo afono pepe.

²⁵Tongaso pepe, fade mo yeke manda lege ti sarango ye ti ala si mo ti na ya ti kuku titene mo kui.

²⁶Ambeni zo ayeke mu zendo ti futa yongo na peko ti amba ti ala; alingbi mo duti oko ti azo ni so pepe,

²⁷ngbanga ti so tongana mo yeke na ye ti futa na ni pepe, ataa gbogbo ti mo, fade a yeke zi ni na gbe ti mo.

²⁸Atêne so akotara ti mo alu ando ti sara na maka ti yaka, mo zi ni ti pusu na dawa pepe.

²⁹Mo baa mbeni zo so ayeke sara kua ti lo nzoni? Fade lo yeke ngba ti sara kua na asenge zo pepe, me lo yeke gue ti sara kua na agbia.