Read La Bible en Sango courant – Mbeti ti Nzapa Amato 23 Bible Online

Amato 23 - La Bible en Sango courant – Mbeti ti Nzapa bible

Amato 23

¹Tongana mo na mbeni kota zo aduti ti te kobe, mo gbu li ti mo nzoni na ndö ti zo so ayeke na dawa ti mo.

²Tongana mo yeke te ka kobe mingi, mo kanga nzara ti mo.

³Sara nzara ti anzoni kobe ti lo pepe: akobe ti handango mo laa!

⁴Mo hunzi ngangu ti mo kue ndali ti gingo mosoro pepe: zia ti gbu li ti mo na ndö ni.

⁵Gi so le ti mo ayeke ti na ndö ti mosoro ni tongaso, lo hon ti lo awe. Biani, nginza aleke *akpangi ti lo wani so lo yeke huru na ni na le ti nduzu ti hon tongana *ngoalo.

⁶Mo te kobe ti zo ti sioni be pepe; sara nzara ti anzoni kobe ti lo pepe.

⁷Biani, be ti lo ayeke nde na tënë so lo yeke tene. Lo lingbi ti tene na mo: “Mo te, mo nyon”, me na be ti lo kâ, ye ni ayeke nde.

⁸Na pekoni, kobe so mo te so, fade mo yeke de ni na sese. Andaa anzerengo tënë so kue mo tene fade na lo so, mo tene ni gi senge senge.

⁹Tene tënë na zo ti buba pepe: fade lo yeke baa hingango ndo ti mo tongana senge senge ye.

¹⁰Atêne so a lu ando ti sara na maka ti yaka, mo zi ni ti pusu na dawa pepe; mo nzi mbage ti sese ti anyindu pepe.

¹¹Biani, wagbungo-koko ti ala ayeke ngangu: fade lo yeke mu mbage ti ala na le ti ngbanga ti bi tënë na li ti mo.

¹²Gbu li ti mo nzoni na ndö ti aye so a gboto mê ti mo daa; dingi mê ti mo, mo ma atënë ti hingango ye.

¹³Mbeto ti pika molenge ti mo asara mo pepe. Tongana mo pika lo na zaza, fade lo yeke kui pepe.

¹⁴Na pikango lo, mo yeke soo lo na kuâ.

¹⁵Molenge ti mbi, tongana mo ga zo ti ndara, fade be ti mbi ayeke duti na ngia.

¹⁶Tere ti mbi kue ayeke nzere tongana mo tene tënë so ayeke na legeni.

¹⁷Sara kota be na tere ti azo ti siokpari pepe; me mo kpe mbeto ti KOTA GBIA lakue.

¹⁸Biani, nzoni ye ayeke daa ndali ti gigi ti mo ti kekereke si ye so mo zia be ti mo ti ku, mo yeke ku ni gbaa pepe.

¹⁹Ti mo, molenge ti mbi, mo ma mbi si mo ga zo ti ndara, tongaso si fade mo yeke mu lege so ayeke mbirimbiri.

²⁰Azo so ayeke nyon samba ahon ndoni, wala ala so ayeke te nyama ahon ndoni, mo duti na popo ti ala pepe.

²¹Biani, azo so ayeke nyon ye ahon ndoni, wala ala so ayeke te ye ahon ndoni, ala yeke ga awayere. Ndali ti so ala ye lango mingi, fade ala yeke yu gi agbagba bongo.

²²Mo ma babâ ti mo; lo laa lo du mo. Ataa mama ti mo aga mbakoro, mo baa lo tongana mbumbuse zo pepe.

²³Gi lege ti tene taa-tënë, ti wara ndara, nzoni wango na hingango ndo. Tongana mo wara ni awe, alingbi mo buba ni kirikiri pepe.

²⁴Ye so ayeke mu ngia na babâ si tere ti lo anzere ayeke so lo du molenge so ayeke zo ti mbirimbiri si lo yeke zo ti ndara.

²⁵Zia ngia na be ti babâ na mama ti mo; ayeke nzoni wali so adu mo so adodo na ngia!

²⁶Molenge ti mbi, mo zia be ti mo na ndö ti mbi; mo duti na ngia ti mu tapande ti mbi.

²⁷Biani, wali-ndumba ayeke tongana kota du so ali; wali ti zo ayeke tongana du ti ngu so yanga ni ayeke kete.

²⁸Tongana ti so azo ti nzi ayeke sara, lo nga lo yeke honde tere ti lo ti ku mbeni zo. Lo sara si akoli mingi aga akoli ti handango awali ti ala.

²⁹Zo wa laa pasi ahon ndö ti lo, zo wa? Zo wa laa gingo be ahon ndö ti lo, zo wa? Zo wa laa ayeke papa ka mingi na azo, zo wa? Zo wa laa demango tere ahon ndö ti lo, zo wa? Zo wa laa ayeke wara aka na tere ti lo senge senge, zo wa? Zo wa laa ayeke baa ndo use use, zo wa?

³⁰Gi azo so ayeke mu ka ngoi ti ala mingi ti duti na tere ti samba; azo so ayeke gue lakue ti gi angangu samba ti nyon.

³¹Vin so abe bengo si ayeke za zango na ya ti kopo so, mo baa ni na nzara ni pepe. Tongana mo nyon ni, ayeke nzere na lege ti go ti mo.

³²Me na ndani, ayeke te mo tongana ngbo si ayeke kpo mo tongana sioni ngbo.

³³Mo yeke baa aye kirikiri na le ti mo; aye kirikiri ayeke ga na li ti mo si mo yeke tene atënë kirikiri.

³⁴Mo yeke baa mo tene, mo yeke na le ti kota ngu-ingo; mo yeke duti tongana zo so alango na ngbonda ti mangboko.

³⁵Fade mo yeke tene: “A pika mbi, me aso oko pepe! A pika mbi, me mbi hinga ye oko daa pepe! Mbi ye ti zingo na lango hio ti kiri ti nyon mbeni samba si!”