Read La Bible en Sango courant – Mbeti ti Nzapa Amato 26 Bible Online

Amato 26 - La Bible en Sango courant – Mbeti ti Nzapa bible

Amato 26

¹Titene ngangu de asara na ngoi ti ndo-wâ, wala titene ngu apika na ngoi ti fango ale ti kobe, so ayeke na legeni pepe. Legeoko nga, gondango iri ti zo ti buba ayeke na legeni pepe.

²Tongana ti so kete ndeke ayeke huru ti gue na ando nde nde si lo yeke duti na sese pepe, tongana ti so hirondele ayeke huru na le ti nduzu, dengo ba na zo senge senge ayeke sara ye oko pepe.

³Zaza alingbi na mbarata, kamba alingbi titene a kanga na yanga ti lele si pika alingbi na ngbonda ti zo ti buba.

⁴Mo kiri tënë na zo ti buba pepe alingbi na buba ti lo; tongaso pepe, mo yeke kpa lo.

⁵Mo kiri tënë na zo ti buba alingbi na buba ti lo; tongaso pepe, lo yeke baa tere ti lo tongana zo ti ndara.

⁶Zo so atokua zo ti buba, ye ni akpa tongana lo fâ gere ti lo wani; lo yeke wara tënë ngangu mingi.

⁷*Amato so asigigi na yanga ti azo ti buba ayeke sara ye oko na zo pepe, legeoko tongana gere ti zo so abuba asara mbeni ye oko na lo pepe.

⁸Gondango zo ti buba ayeke legeoko tongana kangango têne na yanga ti *mvingi.

⁹Mato so asigigi na yanga ti zo ti buba ayeke tongana maboko ti keke ti ki na maboko ti zo so samba ahon ndö ti lo.

¹⁰Zo so amu kua na zo ti buba, wala na zo so ayeke hon hongo na lege, lo yeke tongana makonzi so apika azo kue si ala wara ka.

¹¹Zo ti buba so akiri na ndö ti asarango ye ti buba ti lo, lo yeke tongana mbo so akiri ti te kobe so lo de ni na sese awe.

¹²Tongana mo baa mbeni zo so abaa tere ti lo wani tongana zo ti ndara, ye so mo lingbi ti hinga ayeke so: nzoni ye so mo lingbi ti ku na mbage ti zo ti buba ayeke mingi ahon ti zo tongaso.

¹³Zo ti sopo atene: “Sioni nyama ayeke na lege! Bamara aluti na be ti lege!”

¹⁴Zo ti sopo ayeke turne na ndö ti gbogbo tongana ti so yanga-da ayeke turne na ndö ti awen ti gbungo na yanga-da ni.

¹⁵Zo ti sopo ayeke yoro maboko ti lo na ya ti sembe ti kobe, me ayeke ngangu na lo ti kiri na maboko ti lo ni na yanga ti lo.

¹⁶Zo ti sopo abaa tere ti lo wani tongana zo ti ndara; lo baa ti lo atene, lo hon azo mbarambara so ahinga ndo si ala lingbi ti kiri tënë na legeni.

¹⁷Zo so ahon hongo na lege si lo yoro tere ti lo na ya ti tënë so abaa lo pepe, lo yeke tongana zo so aye ti gbu mbo na mê ti lo.

¹⁸Zo ti buba so ayeke tokua na mbage kue ale ti wâ nga na ale ti kokora ti fango zo,

¹⁹lo yeke tongana zo so ayeke handa amba ti lo si na pekoni lo tene na ala: “Mbi sara ti mbi fade gi ngia senge!”

²⁰Tongana keke ti wâ ahunzi, wâ ayeke mingo; tongana zo ti dungo mvene ayeke daa mbeni pepe, papa ayeke kai.

²¹Tongana ti so pindiri ti wâ asara si le ti wâ angba ti te, tongana ti so keke ti wâ asara si wâ angba ti za, zo so ayeke gi tënë mingi asara si papa alondo ngangu.

²²Atënë ti mvene so zo adu na iri ti mba ti lo ayeke tongana mbeni nzerengo kobe; atënë ni ayeke li zo ngbii asi na be ti lo.

²³Tongana zo ti sioni be atene tënë ti ndoye, akpa wen ti nginza so puru ni angba daa si a mu ni ti zia na tere ti ta ti sese.

²⁴Zo ti kengo azo ahonde tere ti lo na peko ti atënë ti lo; na ya ti be ti lo kâ, lo leke atënë ti handa.

²⁵Ataa lo tene tënë na nzoni be, mo zia be ti mo na ndö ni pepe, ngbanga ti so aye ti sioni mingi asi singo na ya ti be ti lo.

²⁶Na lege ti mayere, lo lingbi ti honde tënë ti kengo azo, me fade sioni ti lo ayeke sigigi na le ti azo kue polele.

²⁷Zo so azi du, fade lo yeke ti daa; zo so arule têne, fade têne ni akiri ti ti na ndö ti lo.

²⁸Zo ti tenengo mvene na amba ti lo ayeke zia ka na be ti ala: lege ti kengo ala laa. Zo so ayeke tene anzerengo tënë ti handa na amba ti lo, lo sara si aye kue abuba.