Read La Bible en Sango courant – Mbeti ti Nzapa Amato 6 Bible Online

Amato 6 - La Bible en Sango courant – Mbeti ti Nzapa bible

Amato 6

¹Molenge ti mbi, mo mu zendo ti futa yongo na li ti mba ti mo? Mo mu zendo ti sara na mbeni wande?

²Tongana mo sara tongaso, andaa tënë ti yanga ti mo aga kuku ti gbungo mo awe; atënë ti yanga ti mo agbu mo awe.

³Titene mo zi tere ti mo na maboko ti mba ti mo ni, ye so mo lingbi ti sara ayeke so: gue, mo baa lo, mo voro tere ti mo na lo, mo so li ti lo.

⁴Mo woko na lege ni pepe; lango agbu le ti mo pepe ngbii mo baa ye ti peko ni si.

⁵Zi tere ti mo na ya ti kuku ni tongana dengbe; zi tere ti mo na ya ti gbanda ni tongana ndeke.

⁶Mo zo ti sopo, gue, mo baa amini! Mo baa lege ti sarango ye ti ala kpoo, fade mo yeke ga zo ti ndara!

⁷Amini ayeke na kapita pepe, ala yeke na zo ti baa ndo na ndö ti ala pepe, ala yeke nga na zo ti sara komandema na ndö ti ala pepe.

⁸Me na ngoi so alingbi, ala yeke bongbi akobe; na ngoi ti fango ale ti kobe, ala yeke bongbi akobe ti bata ni.

⁹Me ti mo zo ti sopo, mo yeke ngba ti lango ngbii asi lawa? Lawa laa mo yeke zingo na lango?

¹⁰Mo ye ti lango kete si, le ti mo aye ti ne na lango kete si, mo ye ti kanga maboko ti mo kete si, mo ye ti lango na sese kete si.

¹¹So mo ngba ti sara tongaso, yere ayeke ga na ndö ti mo tongana zo so ahara ti nzi ye; pasi ayeke ga na ndö ti mo tongana zo ti gbungo ye ti azo na ngangu.

¹²Zo so ayeke diko atënë ti mvene na ndo kue, lo yeke mbumbuse zo; lo yeke zo ti sarango sioni.

¹³Lo yeke te le na zo, lo yeke sara gere ti lo ti iri na zo, lo yeke fa ye na lege ti ali ti maboko ti lo.

¹⁴Gi atënë ti kirikiri laa ayeke na be ti lo; lo yeke gbu li ti lo lakue ti sara sioni ye; lo yeke bi tënë ti papa na popo ti azo.

¹⁵Ndani laa, fade ye ti ngangu ayeke si na lo gi hio tongaso, a yeke buba dutingo ti lo gi hio tongaso, mbeni ye ti sara si lo kiri lo ga nzoni ayeke daa pepe.

¹⁶Aye omene ayeke daa so KOTA GBIA ake ni; mbarambara ni ayeke nga daa so ayeke sioni mingi na le ti lo:

¹⁷le so abaa ndo na baba, yanga so ayeke tene mvene, maboko so ayeke tuku mene ti azo so tënë ayeke na li ti ala pepe;

¹⁸be so ayeke gi lege ti sara asioni ye, gere so ayeke kpe hio ti sara sioni;

¹⁹zo so ayeke na tere ti mbeni tënë, me na pekoni lo tene mvene na le ti ngbanga, nga na zo so ayeke bi tënë ti papa na popo ti a-ita.

²⁰Molenge ti mbi, mo bata andia ti babâ ti mo; aye so mama ti mo ayeke fa na mo, mo bi na peko ti mê ti mo pepe.

²¹Bata atënë ni lakue na be ti mo; mo kanga ni na go ti mo tongana ye ti go.

²²Fade atënë ni ayeke fa lege na mo tongana mo yeke tambula na lege; ala yeke bata mo tongana mo yeke lango; tongana mo zingo na lango, ala yeke mu na mo wango.

²³Biani, andia ayeke tongana lamba, fango ye ayeke tongana lumiere. Tongana zo agboto mê ti mo ti mu na mo wango, andaa lo ye ti zia mo na lege ti fini.

²⁴Atënë ni ayeke gbanzi mo na tere ti asioni wali nga na tere ti anzerengo tënë ti wali so ayeke ti mo pepe.

²⁵Mo sara nzara ti mara ti wali tongaso ndali ti pendere ti lo pepe; ayeke nzoni le ti lo so lo yeke sara ti handa na akoli so, agboto mo pepe.

²⁶Biani, ti wali-ndumba, kete nginza alingbi lo awe; me wali ti mbeni koli nde ayeke mu fini ti mo kue.

²⁷Zo alingbi ti mu wâ azia na ya ti bozo ti bongo ti lo si bongo ni agbi pepe?

²⁸Zo alingbi ti tambula na ndö ti ale ti wâ si azö gere ti lo pepe?

²⁹Ye ni ayeke nga tongaso ndali ti zo so ague na peko ti wali ti mba ti lo; zo so andu wali so, peko ni ayeke ngba senge pepe.

³⁰Zo so anzi kobe ngbanga ti nzara ti ya ti lo, azo ayeke kasa lo pepe.

³¹Me tongana a gbu lo, alingbi lo kiri na ye ni fani mbarambara; ataa akungba ti ya ti da ti lo kue, alingbi lo ga na ni.

³²Ti zo so alango na wali ti zo, li ti lo ayeke daa pepe. Zo so asara tongaso abuba fini ti lo wani.

³³Fade a yeke pika lo, lo yeke ga buba na le ti azo si kamene ti ye ni ayeke ngba lakue na le ti lo.

³⁴Biani, mbanda ayeke sara si ngonzo ti wâ alondo na be ti koli ti wali ni; na lango so koli ni ayeke kiri na peko ti sioni ni, lo yeke baa mawa ti zo pepe.

³⁵Nginza so a yeke futa na koli ni, lo yeke yeda na ni pepe. Ataa mo mu gba ti anzoni ye na lo, lo yeke ke.