Read La Bible en Sango courant – Mbeti ti Nzapa Amato 7 Bible Online

Amato 7 - La Bible en Sango courant – Mbeti ti Nzapa bible

Amato 7

¹Molenge ti mbi, bata atënë ti mbi; bata andia ti mbi nzoni tongana ti so zo ayeke bata ye ti ngangu ngere.

²Tongana mo ye ti ngba na fini, alingbi mo bata andia ti mbi. Aye so mbi fa na mo, mo bata ni tongana mboma ti le ti mo.

³Kanga atënë so na ali ti maboko ti mo, su ni na be ti mo tongana mbeti.

⁴Mo baa ndara tongana ita ti mo ti wali; mo baa hingango nda ti ye tongana mbeni sewa ti mo.

⁵Fade atënë ni ayeke gbanzi mo na tere ti wali ti zo; ala yeke gbanzi mo na tere ti wali wande so ayeke handa mo na lege ti anzerengo tënë ti lo.

⁶Mbeni lâ, mbi luti na fenetere ti da ti mbi si mbi yeke baa ndo na du ti fenetere ni.

⁷Mbi baa ambeni zo so le ti ala ahan pepe; mbi baa na popo ti ala mbeni maseka-koli so li ti lo ayeke daa pepe.

⁸Lo yeke hon na lege, nduru na ndo so wali ni so ayeke daa. Lo mu lege ti gue na da ti wali ni.

⁹Ye ni ayeke na lakui, so lâ ato nda ti linda awe, ndo ato nda ti vuko si ayeke vuko pitipiti.

¹⁰Wali ni aga awara lo, lo yu bongo tongana wali-ndumba, be ti lo asi singo na tënë ti handa.

¹¹Lo yeke tene tënë na mbeto pepe, kamene ayeke sara lo oko pepe; ngbonda ti lo agbu sese na yanga-da ti lo pepe.

¹²Lo yeke fono na ndö ti alege nga na ndo so azo abongbi daa; lo yeke honde tere ti lo na ndo kue ti ku koli.

¹³Lo gbu maseka-koli ni, lo su yanga ti lo; na kamene pepe, lo tene na lo:

¹⁴“Mbi mu lani zendo ti mu na Nzapa *sandaga ti mungo singila; laso mbi mu ni awe.

¹⁵Ndani laa mbi sigigi ti wara mo so. Mbi gi fade mo mingi si mbi wara mo so.

¹⁶Mbi leke gbogbo ti mbi awe, mbi zia balangeti ti anzoroko nde nde na ndö ni; mbi zia nga na ndö ni bongo so a sara na *len ti Ezipte.

¹⁷Mbi tuku na ndö ti gbogbo ni yombo so a sara na mire, na aloes nga na kanele.

¹⁸Ga e sara ngia ti kubu ngbii asi na ndaperere! Ayeke nzoni tere ti e anzere na lege ti bongbingo ti e.

¹⁹Koli ti mbi ayeke na kodro pepe, lo hon na mbeni yongoro tambula awe.

²⁰Lo mu gba ti nginza si lo hon na ni, lo yeke kiri ande gi na ndembe so nze ayeke su ngangu.”

²¹Na lege ti atënë ti handa ti lo, lo sara si maseka-koli ni ayeda na lo. Ndali ti anzerengo tënë ti yanga ti lo, lo sara si maseka-koli ni ague na peko ti lo.

²²Gi hio tongaso, lo mu peko ti wali ni tongana bagara so a yeke gue na lo na ndo ti fango lo. Lo ga tongana buba zo so a akanga lo ti pika lo

²³ngbii mbeni le ti kokora akoro be ti lo. Lo ga tongana ndeke so ahuru ti ti na ya ti gbanda, me lo hinga ni pepe.

²⁴Fadeso amolenge ti mbi, ala ma mbi si; ala dingi mê ti ala ama tënë ti mbi!

²⁵Ayeke nzoni be ti ala ahanda ala ti mu peko ti mara ti wali tongaso pepe! Ala mu peko ti lo pepe ngbanga ti ala girisa lege.

²⁶Lo sara si azo mingi awara ka si ala ti. Andaa azo so lo fâ ala so, ala kue ayeke angangu koli.

²⁷Guengo na da ti lo ayeke mungo lege ti gue na ndo ti akuâ, ayeke lingo na ndo ti akuâ.