Read La Bible en Sango courant – Mbeti ti Nzapa Amato 9 Bible Online

Amato 9 - La Bible en Sango courant – Mbeti ti Nzapa bible

Amato 9

¹Ndara aleke *angbongboro yongoro gere ti da mbarambara; lo sara da ti lo awe.

²Lo fâ anyama ti sara na matanga, lo sara pendere vin, lo zia akobe kue na ndö ti meza.

³Lo tokua azo ti kua ti lo ti wali ti iri azo na ndo so ayeke na nduzu ti gbata ni, lo tene:

⁴“Ala azo so le ti ala ahan pepe so, ala ga na mbage ge!” Lo tene na azo so ahinga ndo pepe so, lo tene:

⁵“Ala ga, ala te kobe ti mbi, ala nyon vin so mbi leke ni awe so!

⁶Ala zia lege ti azo so le ti ala ahan pepe so si fade ala duti na fini! Ala mu lege so ala lingbi ti wara hingango ye daa!”

⁷Zo so agboto mê ti zo ti hengo ndo, ye so lo yeke wara na pekoni ayeke so a yeke baa lo tongana mbumbuse zo. Zo so asuku na zo ti sioni, lo yeke wara gi zonga.

⁸Mo gboto mê ti zo ti hengo ndo pepe, tongaso pepe, fade lo yeke ke mo; me tongana mo gboto mê ti zo ti ndara, fade lo yeke ye mo.

⁹Mu wango na zo ti ndara si fade lo ga zo ti ndara ahon ti kozoni. Fa ye na zo ti mbirimbiri si hingango ye ti lo akiri akono ahon ti kozoni.

¹⁰Kpengo mbeto ti KOTA GBIA ayeke tongo nda ti dutingo na ndara. Hingango lo so ayeke nde si ayeke nzoni kue, taa hingango ye laa.

¹¹Biani, ndali ti mbi Ndara, fade gigi ti mo ayeke gue, ayo si mbi yeke zia ambeni ngu na ndö ti ngu ti mo.

¹²Tongana mo yeke zo ti ndara, mo laa mo yeke baa nzoni na pekoni. Tongana mo yeke zo ti hengo ndo, gi mo wani laa mo yeke wara ye ti pekoni.

¹³Buba ayeke tongana wali so ayeke tene tënë na mbeto pepe, so li ti lo ayeke daa pepe si lo hinga ye oko pepe.

¹⁴Lo duti na yanga ti da ti lo, na ndo so ayeke na nduzu ti gbata ni.

¹⁵Kâ, lo yeke iri azo so ayeke hon ti ala hongo na lege. Lo iri ala, lo tene:

¹⁶“Azo so le ti ala ahan pepe so, ala ga na mbage ge!” Lo tene na azo so ahinga ndo pepe so, lo tene:

¹⁷“Ngu so a nzi ni nzingo ayeke pendere mingi; kobe so azo ate na hondengo ni anzere mingi.”

¹⁸Andaa azo ni ahinga pepe atene, akuâ ayeke kâ; azo so Buba atisa ala so, ala hinga pepe atene, ala li na ndo ti akuâ awe.