Read La Bible en Sango courant – Mbeti ti Nzapa Zo ti bongbingo azo 1 Bible Online

Zo ti bongbingo azo 1 - La Bible en Sango courant – Mbeti ti Nzapa bible

Zo ti bongbingo azo 1

¹Tënë so ayeke tënë ti Zo ti bongbingo azo, molenge ti David, gbia ti Jérusalem.

²Ye kue ayeke senge senge; Zo ti bongbingo azo atene: ye kue ayeke senge senge, ye kue ayeke gi senge senge.

³Akua so kue zo ayeke baa pasi na sarango ni na ndö ti sese so, nyen laa lo yeke wara na peko ni, nyen?

⁴Azo ti mbeni ngoi ayeke hon, azo ti mbeni ngoi nde ayeke ga; me sese angba ti lo lakue.

⁵Lâ ayeke sigigi, lâ ayeke kui; na pekoni, lâ ayeke kiri hio na ndo so lo yeke sigigi daa.

⁶Pupu ayeke ya, ague na mbage ti Mbongo, ague na mbage ti Banga. Pupu ayeke ya, angoro si akiri gi na lege so lo hon daa kozo.

⁷*Abale kue ayeke sua atuku na ya ti kota ngu-ingo; me kota ngu-ingo asi pepe. Na ndo so abale ni ayeke sua ti gue daa, ndo ni laa ala ngba ti sua ti gue daa.

⁸Aye kue afun sen, zo alingbi ti zi yanga daa mbeni pepe. Le ti zo abaa aye mingi, me ade alingbi na lo pepe. Mê ti zo ama atënë mingi, me ade alingbi na lo pepe.

⁹Ye so asi ando, ayeke kiri ti si ande. Ye so a sara ando, a yeke kiri ti sara ni ande. Mbeni fini ye ayeke na ndö ti sese so pepe!

¹⁰Tongana mbeni ye ayeke daa si azo atene: “Baa, so fini ye laa!”, andaa ye ni so ayeke ti lo daa giriri kozoni na e.

¹¹Ye so asi giriri, mbeni zo oko na popo ti e ti dabe ti lo na ni ayeke daa pepe. Ye so azo so aga na peko ti e ayeke sara ande, mbeni zo oko so aga na peko ti ala gbanda ti dabe ti lo na ni ayeke daa pepe.

¹²Mbi Zo ti bongbingo azo, mbi yeke ando gbia na ndö ti azo ti Israel, na Jérusalem.

¹³Aye so kue ayeke si na ndö ti sese so, mbi zia be ti mbi kue ti gi nda ni, ti ma ya ni na lege ti ndara ti mbi. So ayeke kua ti pasi so Nzapa amu na asenge zo ti sese ti sarango ni!

¹⁴Mbi baa aye so kue a yeke sara na ndö ti sese so. Me ye kue ayeke gi senge senge si ayeke tumbango peko ti pupu senge.

¹⁵Ye so aba bango, zo alingbi ti sara si aluti mbirimbiri pepe. Ye so ayeke daa pepe, zo alingbi ti diko ni pepe.

¹⁶Mbi tene na be ti mbi, mbi tene: “Mbi sara si ndara ti mbi akono si amai ahon ti ala so kue ale-gbia kozo ti mbi na ndö ti Jérusalem.” Mbi manda aye ti ndara mingi, mbi hinga aye ti gigi so mingi.

¹⁷Mbi zia be ti mbi kue ti hinga ye ti ndara, ye ti buba na ye ti buburu. Mbi kiri mbi baa so ye ni ayeke nga tumbango peko ti pupu senge.

¹⁸Zo so ayeke na ndara mingi, lo yeke na vundu mingi. Zo so ayeke gi hingango ndo mingi, pasi ti lo ayeke ga mingi.