Read La Bible en Sango courant – Mbeti ti Nzapa Zo ti bongbingo azo 10 Bible Online

Zo ti bongbingo azo 10 - La Bible en Sango courant – Mbeti ti Nzapa bible

Zo ti bongbingo azo 10

¹Kuâ ti avuma so ati na ya ti mafuta ti zo ti sarango yombo asara si mafuta ni abuba si akpi. Kete buba ye ayeke buba ndara ti zo na nengo ti zo.

²Gbungo-li ti zo ti ndara ayeke gue na lo na nzoni lege; me gbungo-li ti zo ti buba ayeke gue na lo na sioni lege.

³Tongana zo ti buba atambula na ndö ti lege, li ti lo aga kirikiri; lo sara si azo ahinga atene, lo yeke zo ti buba.

⁴Tongana makonzi ti mo asara ngonzo na tere ti mo, ayeke nzoni mo do ndo ti kua ti mo, mo zia pepe. Be ti mo aduti kpoo, tongaso si mo kanga lege na ambeni sioni sarango ye.

⁵Mbeni sioni ye so mbi baa na ndö ti sese so ayeke so: makonzi alingbi ti girisa tere ti lo, lo sara mbeni ye nde;

⁶lo mu azo ti buba na nduzu mingi si akota zo aduti na gbeni.

⁷Mbi baa angbaa atambula na ndö ti ambarata si amakonzi atambula na gere tongana angbaa.

⁸Zo so azi du, gbaa lo wani, lo yeke ti na ya ni; zo so akungbi gbagba na sese, gbaa ngbo ayeke te lo.

⁹Zo so azi têne, gbaa lo yeke wara ka; zo so asuru keke, gbaa lo yeke wara sioni na lege ni.

¹⁰Tongana yanga ti do aza pepe si a leke yanga ni pepe, tongana mbeni zo amu ni ti de na ye, alingbi lo mu ngangu ti lo kue ti de na ye ni. Me zo so asara ye na ndara, fade ye ti lo ayeke ga nzoni.

¹¹Zo so ahinga ti handa ngbo, tongana lo handa ngbo ni kozoni pepe si ngbo ni ate lo, nzoni ye ti nyen laa lo yeke wara na peko ni, nyen?

¹²Tënë ti yanga ti zo ti ndara anzere na be ti azo; me tënë ti yanga ti zo ti buba afâ lo.

¹³Kozo tënë ti lo ayeke buba tënë si tënë ti lo ti ndani ayeke bi tomboka na li ti zo.

¹⁴Zo ti buba ayeke diko gba ti tënë. Me zo ahinga ye so ayeke si ande pepe; ye so ayeke si na peko ti lo, zo wa laa ayeke fa peko ni na lo, zo wa?

¹⁵Kete kua agbu yanga ti zo ti buba ngbii lo woko kue; ataa lege ti guengo na kodro, lo hinga ni pepe.

¹⁶Mawa na kodro so gbia ni ade molenge si amakonzi ti kodro ni amu ngoi ti ala kue gi ti tengo kobe!

¹⁷Ti lo nzoni, kodro so gbia ni ayeke molenge ti kota zo si amakonzi ti kodro ni ayeke te kobe na ngoi so alingbi. Ala yeke te kobe ni ti wara ngangu, me titene ala nyon samba ahon ndoni pepe.

¹⁸Zo so ayeke zo ti sopo, li ti da ti lo ayeke ti; zo so ayeke sara kua na wokongo tere, li ti da ti lo ayeke yuru.

¹⁹Titene akota zo asara ngia, ala yeke te pendere kobe. Vin asara si tere ti ala anzere; nginza ayeke mu ye kue na ala.

²⁰Mo kasa gbia na ya ti be ti mo pepe. Mo kasa zo ti mosoro pepe, ataa na ya ti kubu ti mo, ngbanga ti ndeke amu tënë ni ti hon na ni si lo fa peko ni na zo.