Read La Bible en Sango courant – Mbeti ti Nzapa Zo ti bongbingo azo 5 Bible Online

Zo ti bongbingo azo 5 - La Bible en Sango courant – Mbeti ti Nzapa bible

Zo ti bongbingo azo 5

¹Yanga ti mo ayapu na tenengo tënë hio hio pepe. Mo do tere ti mo ti mu zendo na Nzapa pepe, ngbanga ti so Nzapa ayeke na yayu si mo yeke ti mo na sese. Tongaso, ayeke nzoni mo diko gba ti atënë pepe.

²Biani, zo so agi be ti lo mingi, fade lo yeke baa li ti lo; zo so adiko gba ti atënë, fade lo yeke tene abuba tënë.

³Tongana mo mu zendo ti sara mbeni ye na Nzapa, ayeke nzoni mo sara ye ni hio, ngbanga ti so Nzapa aye azo ti buba pepe. Tongana mo mu zendo awe, ayeke nzoni mo sara ye ni.

⁴Tongana mo mu zendo pepe, so ayeke nzoni ahon titene mo mu zendo si mo sara ye ni pepe.

⁵Mo zia lege na yanga ti mo ti bi tënë na li ti mo pepe. Mo tene na watokua pepe, mo tene: “Mbi girisa yanga ti mbi.” Ndani nyen ti sara si Nzapa asara ngonzo ndali ti tënë ti yanga ti mo si lo buba aye so mo sara?

⁶Ndo so bango-li ayeke daa mingi nga na ndo so gba ti atënë ayeke daa mingi, asenge senge ye ayeke daa mingi. Ndani laa, alingbi mo kpe mbeto ti Nzapa.

⁷Na ya ti kodro, tongana mo baa a yeke sara ngangu na wayere, a yeke fâ ngbanga mbirimbiri pepe, zo ayeke kpe ye ti mba ti lo pepe, alingbi li ti mo akpe pepe. Na ndö ti mbeni kota zo, mbeni kota zo so ahon lo ayeke daa. Na ndö ti akota zo use so, ambeni kota zo so ahon ala ayeke daa.

⁸Sese ayeke mu ye na azo kue. Ataa gbia ti kodro ayeke wara ye ti lo gi na lege ti fango yaka.

⁹Zo so aye nginza, nzara ni ayeke hunzi na be ti lo pepe. Zo so aye mosoro, nzara ni ayeke ngba lakue na be ti lo. Ye so nga ayeke gi senge senge.

¹⁰Tongana aye ti zo awu mingi, azo ti tengo ni akiri awu mingi. Nzoni ye ti nyen laa lo yeke wara na pekoni, nyen? Gi ti baa ni na le!

¹¹Ataa zo ti kua ate kobe mingi, wala mingi pepe, lo yeke lango nzoni. Me zo ti mosoro ayeke lango pepe ndali ti gba ti mosoro ti lo.

¹²Mbi baa na ndö ti sese so mbeni sioni ye so ayeke zia vundu na be: mbeni zo abata nginza mingi si nginza ni akiri aga kpale na tere ti lo.

¹³Lo buba mosoro ni na lege ti sioni dengo buze. Tongana lo du molenge-koli, mbeni ye oko ayeke ngba na maboko ti lo pepe.

¹⁴Tongana ti so lo sigigi ndumbu na ya ti mama ti lo, fade lo yeke zia sese so ti kiri gi tongaso. Lo wara ye oko na peko ti kua ti lo pepe; lo yeke mu ye oko na maboko ti lo ti gue na ni pepe.

¹⁵So nga ayeke sioni ye so ayeke zia vundu na be ti zo. Lo yeke gue ti lo gi tongana ti so lo ga. Nzoni ye ti nyen laa lo wara na peko ti kua so lo baa pasi na sarango ni so? Ye ni ahon na ya ti pupu.

¹⁶Na ndoni, lango ti fini ti lo kue ayeke hon gi na ya ti vukongo ndo; lo yeke duti na ya ti vundu, na ya ti pasi na songo be.

¹⁷Ti mbi, nzoni ye so mbi baa na ya ti fini ti zo ayeke so: lo te, lo nyon, lo wara ngia na peko ti kua so kue lo baa pasi na sarango ni na ya ti alango so Nzapa amu na lo na ndö ti sese so. Ye so aga ti lo laa.

¹⁸Tongana Nzapa amu mosoro nga na aye mingi na zo si lo zia zo ni na ndö ni titene lo te, lo mu ti lo na ya ni, lo wara ngia ndali ti kua so lo baa pasi na sarango ni, so matabisi ti Nzapa laa.

¹⁹Me tongana Nzapa angba ti zia ngia na be ti zo ni, zo ni ayeke gbu li ti lo mingi na ndö ti fini ti lo pepe.