Read La Bible en Sango courant – Mbeti ti Nzapa Zo ti bongbingo azo 7 Bible Online

Zo ti bongbingo azo 7 - La Bible en Sango courant – Mbeti ti Nzapa bible

Zo ti bongbingo azo 7

¹Titene iri ti zo awu nzoni, so ayeke nzoni ahon yombo ti ngangu ngere; lango ti kuâ ti zo ayeke nzoni ahon lango ti dungo lo.

²Guengo na ndo so a yeke toto kuâ daa ayeke nzoni ahon guengo na ndo so a yeke sara matanga daa. Biani, fini ti zo ayeke hunzi gi na kuâ; alingbi azo so ade na fini agbu li ti ala daa.

³Vundu ayeke nzoni ahon hengo ngia. Ataa so le ti zo ayeke na vundu, be ti lo alingbi ti duti na ngia.

⁴Be ti azo ti ndara ayeke na ndo so a yeke toto kuâ daa; me be ti azo ti buba ayeke na ndo so a yeke sara ngia daa.

⁵Mango zo ti ndara so agboto mê ti mo ayeke nzoni ahon mango zo ti buba so ahe bia ti gonda na mo.

⁶Hengo ngia ti zo ti buba ayeke tongana toto ti ki so ayeke gbi na gbe ti tawa. Ye so nga ayeke gi senge senge.

⁷Zo ti ndara so ato nda ti sara ngangu na azo, lo yeke ga zo ti buba; petengo goro ayeke buba ya ti li ti zo.

⁸Hunzingo mbeni ye ayeke nzoni ahon tongo nda ni; kangango be ayeke nzoni ahon sarango baba.

⁹Alingbi mo sara ngonzo hio hio pepe; azo ti buba laa ayeke sara ngonzo hio hio.

¹⁰Mo tene pepe, mo tene: “Nyen laa asara si aye atambula ando nzoni ahon ti fadeso?” Hundango mara ti ndo tongaso ayeke na lege ti ndara pepe.

¹¹Ndara ayeke nzoni alingbi na ye so zo awara na peko ti kuâ ti mbeni sewa. Ndara ayeke sara nzoni na azo so ayeke na fini.

¹²Ndara ayeke bata zo tongana ti so nginza ayeke bata zo. Ndara asara si gigi ti zo ague, ayo, nilaa ayeke nzoni, zo aduti na ndara.

¹³Mo baa ye so Nzapa asara. Ye so lo sara si aba bango, zo wa laa alingbi ti sara si aluti mbirimbiri?

¹⁴Na lango so ye ti mo atambula nzoni, ayeke nzoni mo duti na ngia. Na lango so ye ti vundu asi na mo, ayeke nzoni mo gbu li ti mo, mo tene: “Nzapa asara alango use so kue legeoko, tongaso si zo alingbi ti hinga ye so ayeke ga ande na peko pepe.”

¹⁵Na ndembe so mbi de na fini, fini so ayeke gi senge senge, mbi baa ye kue: mbeni zo ti mbirimbiri ayeke kui na lege ti sarango ye ti mbirimbiri ti lo; mbeni zo ti sioni ayeke ngba na fini na lege ti sarango sioni ye ti lo.

¹⁶Mo sara ye ti mbirimbiri ahon ndoni pepe, mo baa tere ti mo tongana zo ti ndara ahon ndoni pepe. Ngbanga ti nyen si mo yeke fâ tere ti mo senge senge?

¹⁷Mo duti sioni zo ahon ndoni pepe, mo ga zo ti buba pepe. Ngbanga ti nyen si mo ye ti kui kozo na lango ti kuâ ti mo?

¹⁸Ayeke nzoni mo ye mbeni wango si mo ke mbeni pepe, ngbanga ti so zo so ayeke kpe mbeto ti Nzapa awara lege ti sara aye so kue.

¹⁹Ndara ayeke sara si zo ti ndara ayeke na ngangu mingi ahon amakonzi baleoko so ayeke na ya ti mbeni gbata.

²⁰Biani, na ndö ti sese so, mbeni zo ti mbirimbiri oko ayeke daa pepe, so lo yeke sara gi nzoni si lo sara siokpari pepe.

²¹Atënë so kue azo ayeke tene, mo zia be ti mo na ndö ni pepe. Tongaso pepe, fade mo yeke ma asioni tënë so zo ti kua ti mo atene na tere ti mo.

²²Mo wani, mo hinga so, fani mingi, mo nga, mo tene asioni tënë na tere ti amba ti mo awe.

²³Mbi tara aye so kue na lege ti ndara. Mbi tene: “Mbi ye ti sara ye na lege ti ndara”. Me ndara ni angba yongoro na mbi.

²⁴Nda ti gigi so ayo mingi, alinda mingi! Zo wa laa alingbi ti hinga nda ni kue, zo wa?

²⁵Tongaso mbi zia be ti mbi kue ti hinga ye, ti gi nda ti ye, ti gi ndara, ti gbu li ti mbi na legeni. Mbi hinga so dutingo sioni zo wala zo so li ti lo ayeke daa pepe ayeke ye ti buba.

²⁶Ye so mbi baa ayeke so: wali so ayeke tongana kuku ti gbu zo ayeke sioni mingi ahon kuâ. Be ti lo ayeke tongana gbanda. Maboko ti lo ayeke tongana kamba so ayeke gbu mo. Zo so asara ye so anzere na be ti Nzapa ayeke kpe na maboko ti wali ni. Me zo ti siokpari ayeke ti na ya ti maboko ti lo.

²⁷Zo ti bongbingo azo atene, aye so mbi baa si mbi gi ndani oko na oko kue, gbungo-li ti mbi ayeke tongaso:

²⁸ye so mbi ngba ti gi, ade mbi wara ni pepe. Na popo ti akoli saki oko, mbi wara koli oko so alingbi; me na popo ti awali kue, mbi wara wali oko pepe.

²⁹Gi ye oko so mbi baa ayeke so: Nzapa asara azo kue na legeni; me ala wani laa aga na gba ti akpale na ndö ti ala.