Read La Bible en Sango courant – Mbeti ti Nzapa B. ti abia 8 Bible Online

B. ti abia 8 - La Bible en Sango courant – Mbeti ti Nzapa bible

B. ti abia 8

¹Tongana mo yeke fade ita ti mbi ti koli so mo nyon me ti mama ti mbi, ka mbi wara tere na mo na gigi, ka mbi su ngbangba ti mo si azo alingbi ti baa mbi tongana mbumbuse zo pepe;

²ka mbi fa lege na mo, mbi gue na mo na ya ti da ti mama ti mbi si mo fa na mbi lege ti yengo tere. Ka mbi mu na mo vin so a tuku yombo daa mo nyon, ka mbi mu na mo ngu ti le ti grenade ti mbi, mo nyon.

³Maboko ti lo ti wali ayeke lango na gbe ti li ti mbi si maboko ti lo ti koli ayeke gbu mbi na tere ti lo.

⁴Ala amaseka-wali ti Jérusalem, mbi voro ala, ala zingo yengo tere pepe, ala zingo yengo tere so ayeke na be ti mbi so pepe kozo titene yengo tere ni ayeda.

⁵Wali wa laa alondo na benyama si ayeke ga, lo gbu kamba ti be ti lo na tere ti lo so? Mbi zingo mo na gbe ti keke ti pome, ndo so mama ti mo amu ngo ti mo daa, ndo so mama ti mo adu mo daa.

⁶Bata mbi nduru na kate ti mo tongana *ye ti kpongo na nzoroko so a su iri ti mo na ndö ni, tongana ye ti kpongo na nzoroko so mo yu na maboko ti mo. Biani, yengo tere ayeke na ngangu tongana kuâ; nzara ti be ayeke nga ye so aso sioni tongana ndo so akuâ ayeke daa; zo alingbi ti sara ye oko na lo pepe. Yengo tere ayeke gbi ndo tongana wâ, lo yeke sungba tongana bekpa.

⁷Akota ngu alingbi ti mingo wâ ti yengo tere pepe si ngu ti *abale alingbi nga ti mene yengo tere pepe. Tongana mbeni zo amu amosoro kue ti da ti lo ti vo na yengo tere, fade azo abaa lo tongana mbumbuse zo biani.

⁸E yeke na ngambe ti e ti wali, me ti lo ade ti sigigi pepe. E yeke sara ande nyen na ita ti e ti wali ni na lango so koli atene tënë ti mungo lo?

⁹Tongana lo yeke fade ngangu gbagba, ka e mu wen ti nginza, e sara na aye ti pendere na ndö ti gbagba ni. Tongana lo yeke fade yanga ti gbagba, ka e mu keke ti sedre, e kanga na ni.

¹⁰Mbi yeke ngangu gbagba si ame ti mbi ayeke tongana ada so ayo na nduzu. Andaa na le ti lo, mbi yeke tongana wali so ayeke ga na siriri.

¹¹Salomon ayeke na mbeni yaka ti vinye na Baal-Hamon; lo zia yaka ni na maboko ti azo ti batango ni. Fade zo oko oko ayeke mu ale ti nginza saki oko ndali ti le ti vinye ni.

¹²Salomon, mo lingbi ti bata ale ti nginza saki oko so senge; mo mu ale ti nginza ngbangbo use na azo ti batango vinye ti mo. Yaka ti vinye ti mbi, mbi wani, mbi yeke bata ni.

¹³Maseka-wali, mo so mo duti na ya ti pendere yaka so, akamarade azia mê ti ala ti ma go ti mo, mo tene tënë si mbi ma:

¹⁴“Mo so mo yeke kamba ti be ti mbi so, mu loro tongana dengbe wala tongana molenge ti wuga na ndö ti ahoto so yombo ayeke daa.”