Read La Bible en Sango courant – Mbeti ti Nzapa Ésaïe 2 Bible Online

Ésaïe 2 - La Bible en Sango courant – Mbeti ti Nzapa bible

Ésaïe 2

¹So ayeke tënë ti aye so Ésaïe, molenge ti Amoz abaa na ya ti mbeni ye tongana bango-li: aye ni ayeke na ndö ti kodro ti Juda nga na ndö ti gbata ti Jérusalem.

²Mbeni lâ, gbanda, hoto so kota da ti *KOTA GBIA ayeke na ndö ni ayeke luti ngangu na ndö ti akota hoto kue; hoto ni ayeke yo na nduzu ahon akete hoto kue si amara nde kue ayeke gue kâ tongana ngu so ayeke sua.

³Fade amara gbani gbani ayeke gue kâ si ala yeke tene: “Ala ga, e gue na li ti hoto ti KOTA GBIA, na kota da ti Nzapa ti Jacob. Lo yeke fa na e lege so lo ye titene e mu, e yeke tambula na alege ti lo.” Biani, ndia ti KOTA GBIA alondo na *Sion, tënë ti lo alondo na Jérusalem.

⁴Lo yeke fâ ngbanga na popo ti amara nde, lo yeke leke tënë na popo ti amara gbani gbani. Amara ni ayeke mu ayongoro zeme ti ala ti sara na akpoka; ala yeke mu alikongo ti ala ti sara na azeme ti fango na ale ti kobe. Mbeni mara ayeke kiri ti mu yongoro zeme na tere ti mbeni mara pepe; azo ayeke kiri ti manda lege ti tiringo bira pepe.

⁵*Ahale ti Jacob, ala ga e tambula na ya ti lumiere ti KOTA GBIA!

⁶*KOTA GBIA, mo ke azo ti mo, *ahale ti Jacob awe, ngbanga ti so azo ti bango nda ti aye alondo na mbage ti To aga, ala si singo na ya ti kodro ti azo ti mo. Azo ti gingo nda ti atongoro asi singo daa, tongana ti so ala yeke gbani gbani na ya ti kodro ti Filistii. Azo ti mo na awande ayeke fono oko.

⁷Wen ti nginza na lôro asi singo na ya ti kodro ni, zo alingbi ti diko wungo ti mosoro ni pepe; ambarata asi singo na ya ti kodro ni, zo alingbi ti diko apusu ti mbarata ni pepe.

⁸Ayanda asi singo na ya ti kodro ni. Azo ayeke kuku ti voro ye so maboko ti ala wani asara; ala yeke kuku na gbe ti ye so maboko ti ala wani aleke.

⁹Ndani laa, fade azo ayeke ba li ti ala na sese, kamene ayeke gbu le ti ala. KOTA GBIA, zi siokpari na li ti ala pepe!

¹⁰Ala gue, ahonde tere ti ala na popo ti atêne! Ala li na gbe ti sese ti kpe ngonzo ti KOTA GBIA, ti kpe gonda ti lo so ayeke kota ahon ndoni!

¹¹Fade kamene ayeke gbu le ti zo ti baba, a yeke zia zo ti pikango kate na kete ndo. Na lango ni so, gi KOTA GBIA oko laa azo ayeke ya iri ti lo.

¹²Biani, KOTA GBIA so ayeke na ndö ti dunia kue, mbeni lango ti lo ayeke ga so lo yeke fâ ngbanga na li ti azo ti pikango kate, azo so ayeke ya iri ti ala nga na azo so abaa atene, ala hon amba ti ala so; lo yeke kiri ala na kete ndo.

¹³Lo yeke fâ ngbanga na li ti akeke ti sedre ti Liban so ayo na nduzu mingi nga na akeke ti shene ti Bashan.

¹⁴Lo yeke fâ ngbanga na li ti akota hoto kue nga na li ti akete hoto so kue ayo na nduzu.

¹⁵Lo yeke fâ ngbanga na li ti akota da so kue ayo na nduzu nga na li ti akota gbagba ti bira kue.

¹⁶Lo yeke fâ ngbanga na li ti akota mangboko ti Tarsis nga na li ti apendere mangboko.

¹⁷Fade kamene ayeke gbu azo ti baba; a yeke kiri na azo ti pikango kate na kete ndo. Na lango ni so, gi KOTA GBIA oko laa azo ayeke ya iri ti lo.

¹⁸Fade ayanda kue ayeke daa mbeni pepe.

¹⁹Na ndembe so KOTA GBIA ayeke londo ti zia mbeto na be ti azo ti sese so, ala yeke li na ya ti adu ti têne nga na ya ti adu ti sese ti kpe ngonzo ti lo, ti kpe gonda ti lo so ayeke kota ahon ndoni.

²⁰Na lango ni so, azo ayeke mu ayanda ti ala ti wen ti nginza na ti lôro so ala yeke kuku ti voro ni so, ti bi ni na akolofia nga na anyama-ti-ngia.

²¹Na ngoi so lo yeke londo ti zia mbeto na be ti azo ti sese so, ala yeke li na ya ti adu ti têne nga na popo ti atêne so ya ni asuru, ti kpe kota ngonzo ti KOTA GBIA nga na gonda ti lo so ayeke kota ahon ndoni.

²²Ala zia be ti ala na ndö ti zo pepe! Fini ti lo ayeke gi pupu so ayeke sigigi na hon ti lo. Lo yeke nyen?