Read La Bible en Sango courant – Mbeti ti Nzapa Ésaïe 30 Bible Online

Ésaïe 30 - La Bible en Sango courant – Mbeti ti Nzapa bible

Ésaïe 30

¹Mawa na amolenge ti ngangu li! So tënë ti yanga ti *KOTA GBIA laa. Ala yeke leke apialo so alondo na mbi pepe; ala yeke sara *ambuki kirikiri so be ti mbi aye tënë ni pepe. Ala yeke sara si siokpari aga na ndö ti tere, na ndö ti tere.

²Ala mu lege ti gue na Ezipte, me ala hunda mbi pepe. Ala yeke gi titene Faraon aga tongana ngangu gbagba ti batango ala, ala yeke gi ndo ti hondengo tere ti ala na gbe ti de ti Ezipte!

³Me Faraon so ala baa lo tongana gbagba ti batango ala so, lo yeke zia kamene na le ti ala; gbe ti de ti Ezipte so ala yeke gi ti honde tere daa so, fade ayeke zia kota kamene na le ti ala.

⁴Amakonzi ti ala asi na Soan awe, alembe ti ala asi na Hanes awe.

⁵Fade kamene ayeke gbu le ti ala kue ndali ti azo so alingbi ti sara ye oko ndali ti ala pepe. Azo ni ayeke mu maboko na ala pepe, azo ni ayeke sara nzoni ye oko na ala pepe, me azo ni ayeke zia gi kota kamene na le ti ala, ala yeke bi buba na tere ti ala.

⁶Nengo tënë na ndö ti anyama so ayeke na benyama ti Mbongo. Sese so azo ni ayeke hon daa ayeke sese ti vundu, sese ti ziango mbeto na be ti zo, sese so bamara na mama ti bamara, sioni ngbo nga na kota sioni nyama so akpa ngunde ayeke lango daa. Azo ni akanga akungba ti ala na amosoro ti ala na ndö ti alele nga na ndö ti azambala si ala yeke gue na ni na azo so alingbi ti sara nzoni ye oko na zo pepe.

⁷Biani, maboko so Ezipte amu ayeke ye senge, alingbi ti sara ye oko pepe. Ndani laa mbi di iri ti kodro ni “Rahab so angba gi ndo oko”.

⁸*KOTA GBIA atene na Ésaïe: “Fadeso, mo su aye so na le ti mbeni têne, mo su ni na ya ti mbeni mbeti, na dawa ti azo ti Jérusalem. Gbanda, fade ayeke duti ye so ayeke dabe ti ala na aye ni lakue lakue.”

⁹Biani, azo so ayeke azo ti ngangu li, ala yeke amolenge ti handango zo, ye so KOTA GBIA afa na ala, ala ye ti ma pepe.

¹⁰Ala tene na azo ti bango nda ti aye, atene: “Ala baa ye pepe!” Ala tene na awayanga-Nzapa: “Ala tene na e taa-tënë pepe, me gi anzerengo tënë; ala tene na e gi ye so anzere na be ti e, ataa ye ni ayeke mvene.

¹¹Ala zia nzoni lege, ala hon yamba, ala londo na ndö ti nzoni lege. Ala kiri atene na e tënë ti Nzapa ti Israel pepe, lo so lo yeke nde si lo yeke nzoni kue so!”

¹²Ndani laa Nzapa ti Israel, lo so lo yeke nde si lo yeke nzoni kue atene: “Ala ke tënë ti mbi awe, ala zia be ti ala gi na ndö ti azo so ayeke sara ngangu na ala si ayeke tene mvene na ala; azo ni so laa ala luti na ndö ti ala.

¹³Nilaa, sioni sarango ye so ayeke ga ande tongana yongoro dere ti da so du akoro na ya ni. Mbeni ye asuku daa si mo ye ti baa, dere ni akungbi, atuku na sese.

¹⁴Ya ti dere ni afâ kete kete tongana ta ti wasarango-ta; zo alingbi ti kiri ti leke ni pepe. Zo alingbi ti mu mbeni fango ni ti mu na le ti wâ na ya ti duke pepe wala ti to na ngu na ya ti du ti ngu pepe.”

¹⁵Biani, Kota Gbia NZAPA ti Israel, lo so lo yeke nde si lo yeke nzoni kue, tënë so lo tene ayeke so: Ala lingbi ti soo kuâ gi tongana ala kiri na mbi si ala duti kpoo. Ala yeke wara ngangu gi tongana ala duti kpoo si ala zia be ti ala na ndö ti mbi. Me ala ye pepe.

¹⁶Ala tene: “E ke awe! E yeke mu mbarata ti kpe ti hon.” Nzoni! Fade ala yeke kpe ti hon. Ala tene nga: “E yeke ko na ndö ti mbarata so ayeke mu loro mingi.” Nzoni! Me azo so ayeke tumba peko ti ala ayeke mu loro mingi!

¹⁷Wato oko ayeke be le na azo saki oko na popo ti ala. Awato oku ayeke be le na ala si ala kue ayeke kpe. Na ndani, azo so ayeke ngba, ala yeke luti tongana keke ti bendere na ndö ti hoto, tongana bendere na ndö ti kete hoto.

¹⁸Me *KOTA GBIA ayeke ku mbeni ngoi ti sara nzoni be na ala, lo yeke londo ti baa mawa ti ala. Biani, KOTA GBIA ayeke Nzapa ti mbirimbiri. Ti ala nzoni, azo so kue azia be ti ala na ndö ti lo!

¹⁹Mo, zo ti *Sion, mo so mo yeke lango na Jérusalem, fade mo yeke kiri ti toto pepe. Tongana mo dekongo na lo, lo yeke sara nzoni be na mo. Gi so lo ma mo, lo yeke kiri tënë na mo.

²⁰Na ngoi ti ye ti vundu, KOTA GBIA ayeke mu na mo kobe. Na ngoi ti ye ti ngangu, lo yeke mu na mo ngu ti nyongo ni. Lo so lo yeke fa ye na mo, lo yeke kiri ti honde tere ti lo pepe, fade mo yeke baa lo na le ti mo.

²¹Na ndembe so mo ye ti hon na mbage ti maboko ti koli wala na mbage ti maboko ti wali, mo yeke ma na peko ti mo mbeni go so ayeke tene: “Baa lege ni laa, mo mu ni!”

²²Anzapa ti mo so a leke na keke si a zia wen ti nginza na tere ni, ayanda ti mo so a kporo lôro si a zia na tere ni, fade mo yeke baa ni tongana ye so ayeke sioni. Mo yeke tuku ni tongana fungo ye si mo yeke tene: “Ala hon kâ!”

²³Fade KOTA GBIA ayeke tokua ngu-Nzapa na ndö ti ale ti kobe so mo lu. Kobe so sese ayeke mu na mo ayeke duti gbani gbani si ayeke nzere mingi. Na lango ni so, anyama ti mo ayeke gue ti te pere na ndo so akono.

²⁴Abagara na alele so ayeke fâ yaka ayeke te anzoni pere so a tuku ingo daa. A mu pao na ye ti pengo na ale ti kobe si a gbara na pere ni na sese.

²⁵Na lango so a yeke fâ azo kue, na ndembe so ada so ayo na nduzu mingi ayeke tuku na sese, gba ti ngu ayeke sua na ndö ti akota hoto nga na ndö ti akete hoto kue.

²⁶Na lango so KOTA GBIA ayeke kanga le ti ka ti azo ti lo si lo yeke sara titene ka ni amu, fade nze ayeke su tongana lâ, lumiere ti lâ ti lango oko ayeke lingbi na lumiere ti lâ ti lango mbarambara.

²⁷Baa, *KOTA GBIA wani alondo yongoro si lo yeke ga. Ngonzo ti lo ayeke tongana wâ so ayeke nika ye si ayeke gbi ndo. Yanga ti lo asi singo na ngonzo; menga ti lo ayeke tongana wâ so ayeke gbi ye kue.

²⁸Pupu ti yanga ti lo ayeke tongana ngu so ayeke sua, asuku ngbii asi na go ti zo. Pupu ni ayeke ga ti yengere amara nde na mbeni yengere ti fango zo. Lo yeke zia na yanga ti azo ni mbeni kamba ti gue na ala kirikiri.

²⁹Ti ala azo ti Jérusalem, fade ala yeke he bia tongana ti so a yeke he bia ti matanga na bi. Be ti ala ayeke duti na ngia tongana ti azo so ayeke tambula alingbi na toto ti *ngoli si ala yeke gue na li ti hoto ti KOTA GBIA, na mbage ti Kota Têne ti Israel.

³⁰KOTA GBIA ayeke sara titene azo ama go ti lo so ayeke toto ngangu, lo yeke sara titene azo abaa maboko ti lo so lo yo na nduzu ti pika na azo. Lo yeke fa sioni ngonzo ti lo na popo ti menga ti wâ so ayeke gbi ye kue, na popo ti kota ngu-Nzapa, nga na popo ti *apembe ti bekpa so atuku.

³¹Na mango go ti KOTA GBIA, fade azo ti Asirii ayeke do na mbeto na gbe ti nduru keke so KOTA GBIA ayeke pika na ala.

³²Pika oko oko so KOTA GBIA ayeke pika ala, a yeke pika ngo na kundi na gbe ni. Tongana lo yeke yingi maboko ti lo, lo yeke tiri bira na ala.

³³A leke gba ti keke ti wâ kozoni awe; keke ni ayeke nga ndali ti gbia. Na ya ti du so akono si alinda mingi, a zia gba ti akeke angoro na ni ti tingo na wâ. Tongaso, pupu ti yanga ti KOTA GBIA so ayeke tongana *sufre so ayeke sua ayeke bi wâ daa.