Read La Bible en Sango courant – Mbeti ti Nzapa Ésaïe 35 Bible Online

Ésaïe 35 - La Bible en Sango courant – Mbeti ti Nzapa bible

Ésaïe 35

¹Ayeke nzoni benyama na kuru sese aduti na ngia! Ayeke nzoni lando so ngu ayeke daa pepe adodo na ngia, lo du apendere kongo!

²Ayeke nzoni akongo ni amu ndö ti sese ni. Ayeke nzoni sese ni ahuru na ngia, lo dodo na ngia si lo dekongo na ngia! *KOTA GBIA amu na lo pendere ti hoto ti Liban awe, zango ti hoto ti Karmel na ti lando ti Saron. Tongaso, azo ayeke baa gonda ti KOTA GBIA, ala yeke baa nga zango ti Nzapa ti e.

³Ala sara si maboko so awoko, akiri awara ngangu; ala sara si alikunu so awoko, akiri akpengba.

⁴Ala tene na azo so be ti ala awoko so, atene: “Ala gbu ngangu, ala sara mbeto pepe! Baa, Nzapa ti ala laa. Lo ga ti kiri peko ti sioni na azo so asara sioni, ti futa awato ti ala ndali ti sioni so awato ni asara na ala. Lo wani, lo ga ti soo ala.”

⁵Tongaso, fade awaziba ayeke kiri ti baa ndo; azo so mê ti ala akanga ayeke kiri ti ma ndo.

⁶Azo so gere ti ala abuba, ala yeke huru tongana dengbe, yanga ti buburu ayeke zi si lo yeke dekongo na ngia. Biani, ngu ayeke sigigi na ya ti benyama, ngu ayeke sua na lando so ngu ayeke daa pepe.

⁷Mbutu so amu wâ mingi ayeke kiri ti ga kota ngu, sese so ngu atia daa ayeke kiri ti ga ali ti ngu. Ndo so lani *anzagua ayeke lango daa, asosongo na apere ti ya ti ngu asigigi daa.

⁸Na ndo so, a yeke suru mbeni lege so a di iri ni “Lege so a zia nde”. Zo ti *sioni oko alingbi ti hon daa pepe, a yeke bata ni ndali ti azo ti KOTA GBIA titene ala tambula daa. Azo ti buba ayeke girisa lege na ndo so pepe.

⁹Na lege so, zo ayeke tengbi na bamara pepe, mbeni sioni nyama oko ayeke si kâ pepe, zo ayeke wara sioni nyama oko kâ pepe. Gi azo so KOTA GBIA azi ala laa ayeke mu lege ni so.

¹⁰Azo so KOTA GBIA ayeke zi ande ala, ala yeke mu lege ni so ti kiri. Na singo ti ala na *Sion, ala yeke dekongo na ngia. Ngia so ayeke hunzi laoko pepe, ayeke su na ndö ti le ti ala. Ngia so ahon ndoni ayeke si be ti ala singo, pasi na demango tere ayeke hon.