Read La Bible en Sango courant – Mbeti ti Nzapa Ésaïe 42 Bible Online

Ésaïe 42 - La Bible en Sango courant – Mbeti ti Nzapa bible

Ésaïe 42

¹*KOTA GBIA atene: “Baa, zo ti kua ti mbi laa, lo so mbi gbu lo na maboko ti lo, lo so mbi soro lo, mbi wara ngia na lege ti lo. Mbi zia Yingo ti mbi na ndö ti lo, fade lo yeke sara si sarango ye ti mbirimbiri abaa gigi ndali ti amara nde.

²Lo yeke dekongo pepe, lo yeke tene tënë na kota go pepe, zo ayeke ma go ti lo na ndö ti alege pepe.

³Sosongo so a ba na sese awe, lo yeke fâ ni pepe; lamba so wâ ni aye ti mingo, lo yeke mingo ni pepe. Me lo yeke fa taa lege ti sarango ye ti mbirimbiri na azo.

⁴Ngangu ti lo ayeke hunzi pepe, be ti lo ayeke woko pepe ngbii lo fa lege ti sarango ye ti mbirimbiri na ndö ti sese. Azo ti azoa ayeke zia be ti ala ti ku fango ye ti lo.”

⁵Nzapa, *KOTA GBIA asara yayu, lo gbara le ti nduzu; lo gbara sese na aye so kue asigigi daa, lo mu fini na azo so ayeke na ndö ti sese, lo mu pupu ti wungo ni na azo ti ndö ti sese ni; tënë so lo tene ayeke so:

⁶“Mbi KOTA GBIA laa mbi iri mo na lege ti mbirimbiri. Mbi gbu mo na maboko ti mo, mbi bata mo si mbi zia mo titene na lege ti mo, mbi na azo e ga *ambuki; mbi zia mo titene mo duti lumiere ti amara kue.

⁷Mo yeke zi le ti awaziba, mo yeke zi azo ti kanga na da ti kanga, mo yeke sigigi na azo so ayeke na ya ti sururu, ala so ayeke ku na ya ti vukongo ndo.”

⁸Mbi yeke KOTA GBIA, so iri ti mbi laa. Gonda so ayeke ti mbi, mbi yeke zia na mbeni zo nde pepe; nengo so ayeke ti mbi, mbi yeke zia na ayanda pepe.

⁹Akozo ye so asi ahon awe. Fadeso, mbi yeke kiri ti fa na ala afini ni. Kozo si ye ni asi, mbi yeke tene tënë ni na ala.

¹⁰Ala he fini bia na *KOTA GBIA. Ala so ayeke na nda ti sese kâ, ala he bia ti sepela lo; ala so ayeke tambula na le ti kota ngu-ingo, ala so ayeke na ya ti kota ngu-ingo, na ala so ayeke lango na ya ti azoa, ala he bia ti sepela lo.

¹¹Ala azo ti benyama na ala azo ti agbata ti benyama, ala he bia! Ala azo ti akete kodro ti Kedar, ala he bia! Ala azo so alango na gbata ti Kota têne, ala dekongo na ngia! Na ndö ti hoto, ala dekongo na ngia!

¹²Ayeke nzoni azo agonda KOTA GBIA; azo ti azoa, ala he bia na kota go ti sepela lo!

¹³KOTA GBIA ayeke sigigi tongana kpengba turugu; lo yeke tongana zo ti tiringo bira so nzara ti tiringo bira ayeke kporo kporongo na be ti lo. Lo dekongo ti bira, lo dekongo ngangu si lo hon ndö ti awato ti lo.

¹⁴*KOTA GBIA atene: “Mbi duti kpoo aninga mingi awe, mbi kanga yanga ti mbi, mbi kanga be ti mbi. Me fadeso, mbi yeke ga ti dekongo tongana wali na ndembe ti dungo ni, mbi dema, mbi wu ngangu, mbi wu nzoni pepe.

¹⁵Mbi yeke buba ahoto na akete hoto; mbi yeke sara si apere ni ahole, mbi yeke sara si *abale aga kuru sese; mbi yeke sara si ngu ti *alende ahole.

¹⁶Mbi yeke sara si awaziba atambula na ndö ti lege so ala hinga pepe; mbi yeke sara si ala hon na ndö ti alege so ala hinga pepe. Na dawa ti ala, mbi yeke sara si vukongo ndo aga lumiere, lege so aba bango aluti mbirimbiri. Apialo so, fade mbi yeke sara ni, mbi yeke zia ni oko pepe.

¹⁷Azo so azia be ti ala na ndö ti ayanda si ala yeke tene na anzapa so a kporo wen si a sara na ni, atene: ‘Ala laa ayeke anzapa ti e’, fade azo ni so ayeke kiri na peko, kamene ayeke hon ndö ti ala.”

¹⁸Ala, azo ti kangango mê, ala ma! Ala, awaziba, ala zi le ti ala, ala baa ndo!

¹⁹Zo wa laa ayeke waziba? Ayeke zo ti kua ti mbi pepe? Zo wa laa ayeke zo ti kangango mê? Ayeke watokua ti mbi so mbi tokua lo so pepe? Zo wa laa ayeke waziba tongana zo ti tenengo peko ti tënë ti yanga ti Nzapa? Zo wa laa ayeke zo ti kangango mê tongana zo ti kua ti *KOTA GBIA?

²⁰Lo baa aye mingi, me lo bata ye oko pepe; mê ti lo azi, me lo ma ndo oko pepe.

²¹Ndali ti mbirimbiri ti lo wani, KOTA GBIA aye ti fa so *Ndia ti lo ayeke kota si ayeke pendere mingi.

²²Me fadeso ala yeke azo so a nzi aye ti ala kue, a mu aye na tere ti ala kue. A kanga ala kue na ya ti kota du, a honde ala na da ti kanga. A nzi aye ti ala kue, zo oko ti zi ala ayeke daa pepe. A mu aye na tere ti ala kue, zo oko ayeke daa pepe ti tene: “Ala kiri na aye ni!”

²³Na popo ti ala, zo wa laa ayeke dingi mê ti lo ti ma tënë so? Zo wa laa ayeke zia mê ti lo kpoo ti ma tënë gbanda?

²⁴Zo wa laa azia Jacob na maboko ti azo so amu aye na tere ti lo kue so? Zo wa laa azia Israel na maboko ti azo so anzi aye ti lo kue so? Ayeke KOTA GBIA pepe? Biani, e sara lani siokpari so ake lo; azo ti lo atambula na lege ti lo pepe, ala ma tënë ti Ndia ti lo pepe.

²⁵Ndani laa KOTA GBIA atuku na ndö ti Israel ngonzo ti lo ti wâ nga na sioni ye ti bira. Bira ni abi wâ na tere ti ala mbage na mbage kue, me Israel ahinga ye oko daa pepe. Wâ ni agbi azo ni, me tënë ni agbu be ti ala pepe.