Read La Bible en Sango courant – Mbeti ti Nzapa Ésaïe 44 Bible Online

Ésaïe 44 - La Bible en Sango courant – Mbeti ti Nzapa bible

Ésaïe 44

¹Me fadeso Jacob, zo ti kua ti mbi, mo ma! Israel, mo so mbi soro mo, mo ma!

²*KOTA GBIA so asara mo, lo so lo leke mo gi so mo de na ya ti mama ti mo, lo so lo yeke mu maboko na mo, tënë so lo tene ayeke so: Jacob, zo ti kua ti mbi, sara mbeto pepe, mo Yeshurun so mbi soro mo.

³Biani, fade mbi yeke tuku ngu na ndö ti sese so ayeke na nzara ti ngu, mbi yeke sara titene akete ngu asua na ndö ti holengo sese. Mbi yeke tokua yingo ti mbi na ndö ti amolenge ti mo si mbi yeke sara tufa na ndö ti *ahale ti mo.

⁴Fade ala yeke sigigi si ala yeke kono tongana sosongo na ya ti ngu, tongana akeke na yanga ti ngu so ayeke sua.

⁵Mbeni zo oko ayeke tene: ‘Mbi yeke ti KOTA GBIA’, mbeni ayeke mu iri ti Jacob, mbeni nde ayeke su na ndö ti maboko ti lo: ‘Mbi yeke zo ti KOTA GBIA’ si lo yeke mu iri ti Israel ti zia na ndö ti lo.”

⁶*KOTA GBIA, Gbia ti Israel, lo so lo yeke zi azo ti lo, lo so lo yeke na ndö ti dunia kue, tënë so lo tene ayeke so: “Mbi yeke kozoni, mbi yeke ndangba ni. Mbeni Nzapa nde ayeke pepe, gi mbi oko.

⁷Zo wa laa alingbi na mbi, zo wa? Alingbi lo dekongo, lo fa na mbi nda ti aye ni, ngbene ye so mbi sara akozo mara! Alingbi lo fa na mbi aye so asi awe nga na aye so ayeke si ande.

⁸Ala azo ti mbi, ala sara mbeto pepe, tere ti ala ado pepe! Mbi tene tënë so na ala ngbene ye giriri, mbi fa ni na ala, ala hinga awe. Ala laa ayeke azo ti tenengo tënë ti ye so ala hinga na ndö ti mbi. Mbeni Nzapa nde ayeke daa? Gi mbi oko pepe? Mbeni Kota Têne nde so aluti ngangu ayeke daa pepe; mbi hinga mbeni oko pepe.”

⁹Azo so ayeke leke ayanda, ala kue ayeke ye oko pepe. Alimo ti anzapa so ala mu nengo na ala so ayeke sara ye oko na ala pepe. Ayanda ni alingbi fade ti baa ye so azo ni ayeke sara, me ala yeke baa ndo pepe, ala hinga ndo pepe, ala yeke zia kamene na le ti azo ni.

¹⁰So ye ti buba ti nyen titene zo aleke mbeni nzapa, wala lo kporo wen ti sara na yanda so lo yeke wara ye na peko ni pepe!

¹¹Azo so kue amu peko ti ayanda ni, fade kamene ayeke gbu le ti ala. Azo ti kode so asara ayanda ni, ala yeke gi asenge zo. Ayeke nzoni ala kue abongbi tere, ala ga aluti: fade mbeto ayeke hon ndö ti ala, kamene ayeke sara ala kue!

¹²Zo ti pikango ndao ayeke za yanga ti do, lo sara kua ni na le ti wâ so ate mingi, lo mu martoo si lo leke na tere ti wen ni, lo pika ni ngangu. Me tongana nzara asara lo, ngangu ahunzi na lo. Tongana lo nyon ngu pepe, baa lo woko awe.

¹³Sarapande agboto kamba ti haka na nduru keke ti lo, lo suru lege ni na kree, lo de tere ti keke ni na zeme, lo kpaka tere ni na rabo titene aza. Lo sara si keke ni aga tongana zo, aga pendere limo so akpa zo si a zia ni ti duti na ya ti mbeni da.

¹⁴Lo fâ keke ti sedre, lo soro keke ti shene wala ti terebente na popo ti akeke ti ngonda. Lo lu keke ti pen, ngu-Nzapa apika na ndö ni si ayeke kono.

¹⁵Azo ayeke mu nga keke ni ti tingo na wâ, ala yeke sara na wâ ti duti na tere ni, wala ti to na kobe. Ala yeke mu nga gi oko keke ni ti leke na mbeni nzapa titene ala voro lo; ala yeke leke mbeni yanda so ala yeke kuku na gbe ti lo.

¹⁶Ala yeke mu mbeni mbage ti keke ni ti sara na wâ; ala yeke zö na nyama si ala yeke te ya ti ala asi. Wala ala yeke duti na tere ti wâ ni si ala tene: “En-heen! Tere ti mbi ato nda ti mu wâ; so pendere wâ!”

¹⁷Na mbeni mbage ti keke ni, ala yeke sara na mbeni nzapa, mbeni yanda so ala yeke kuku na gbe ti lo, ala yeke voro lo si ala yeke sambela lo, atene: “Mo yeke nzapa ti e, soo e!”

¹⁸Azo ni so ahinga ye oko pepe, ala hinga ndo oko pepe. Biani, le ti ala na gbungo-li ti ala akanga awe, ala lingbi ti baa ndo pepe, ala lingbi ti hinga nda ti ye pepe.

¹⁹Zo oko ayeke gbu li ti lo wani pepe, zo oko ayeke hinga ndo nzoni pepe, zo oko ayeke hinga nda ti ye nzoni pepe si lo tene na be ti lo wani, lo tene: “Mbage ti keke so, mbi sara na wâ, mbi to kobe ti mbi na le ti wâ ni, mbi zö nyama so mbi te. Na tanga ti mbage ti keke ni, mbi sara na ye so zo alingbi ti baa na le ti lo fani use pepe. Mbi yeke kuku na gbe ti nduru keke!”

²⁰Azo ni so amu tere ti ala gi na senge mburu ti wâ; gbungo-li ti ala ti kirikiri asara si ala girisa lege. Nzapa ti ala ni alingbi ti zi ala pepe. Me azo ni wani ayeke tene pepe: “Ye so ayeke na ya ti maboko ti mbi so, ayeke gi ye ti mvene.”

²¹“Jacob, dabe ti mo na tënë so: Israel, mo yeke zo ti kua ti mbi; mbi leke mo titene mo ga zo ti kua ti mbi. Fade be ti mbi ayeke girisa na mo pepe.

²²Asioni ti mo, mbi mbo ni tongana mbinda ti le ti nduzu; asiokpari ti mo, mbi zi ni tongana mbinda so ayeke hon hongo. Kiri na mbi, ngbanga ti so mbi soo mo awe.”

²³Biani, *KOTA GBIA ayeke sara ye. Tongaso yayu, mo dekongo na ngia; gbe ti sese so alinda mingi, mo dodo na ngia! Ahoto, ala dekongo na ngia; ala agbako, ala na akeke ti ala, ala dekongo na ngia. Biani, KOTA GBIA azi Jacob awe, lo fa gonda ti lo na sese ti Israel.

²⁴Israel, *KOTA GBIA so azi mo, lo so lo leke mo gi so mo de na ya ti mama ti mo, tënë so lo tene ayeke so: “Mbi KOTA GBIA laa mbi sara ye kue; mbi oko laa mbi gbara le ti nduzu, mbi oko laa mbi gbara sese; zo wa laa ayeke lani na tere ti mbi, zo wa?

²⁵Fadeso mbi yeke mingo aye ti dongo be ti azo ti fango nda ti ye na mvene; mbi yeke sara si azo ti bango nda ti aye atene tënë kirikiri. Mbi yeke sara si azo ti ndara akiri na peko; mbi yeke sara si hingango ye ti ala aga buba ye.

²⁶Mbi yeke sara ye alingbi na tënë so zo ti kua ti mbi atene; mbi yeke sara si apialo so awatokua ti mbi atene tënë ni aga nzoni. Tënë so mbi tene na ndö ti Jérusalem ayeke so: ‘Fade azo ayeke kiri ti lango na ya ni’. Tënë so mbi tene na ndö ti agbata ti Juda ayeke so: ‘Fade a yeke kiri ti leke ni; aye so a kungbi na sese, fade mbi yeke kiri ti leke ni na nduzu.’

²⁷Mbi mu yanga na ngu so alinda mingi, mbi tene: ‘Hole! Mbi yeke sara si *abale ti mo ahole nga.’

²⁸Tënë so mbi tene na ndö ti Sirus ayeke so: ‘Lo yeke wabatango-taba ti mbi. Ye so mbi ye, fade lo yeke sara si aga nzoni. Lo yeke mu yanga titene a kiri aleke Jérusalem, titene a kiri alu gere ti kota da ti Nzapa.’ ”