Read La Bible en Sango courant – Mbeti ti Nzapa Ésaïe 48 Bible Online

Ésaïe 48 - La Bible en Sango courant – Mbeti ti Nzapa bible

Ésaïe 48

¹Ala azo ti Jacob, ala ma! Ala so iri ti Israel ayeke na ndö ti ala, ala so a du ala na Juda, ala ma! Ala yeke deba yanga ti ala na iri ti *KOTA GBIA, ala yeke sepela Nzapa ti Israel, me na lege ti taa-tënë pepe nga na lege ti mbirimbiri pepe.

²Be ti ala anzere titene a iri ala “Azo ti gbata so ayeke nde si ayeke nzoni kue”; ala yeke luti na ndö ti Nzapa ti Israel, lo so iri ti lo ayeke “KOTA GBIA so ayeke na ndö ti dunia kue”. Ala ma tënë so si:

³“Akozo ye so asi awe so, mbi fa tënë ni na ala ngbene ye giriri. Tënë ni asigigi na yanga ti mbi, mbi tene tënë ni, ala ma awe. Mo ye ti baa, mbi sara mbeni ye si aye ni asi.

⁴Mbi hinga kue, ala yeke azo ti ngangu li, li ti ala akpengba tongana wen, li ti ala akpengba mingi.

⁵Ndani laa mbi fa na ala tënë ti aye so ngbene ye giriri. Mbi tene tënë ni na ala kozo si aye ni asi, tongaso si ala tene pepe: ‘Yanda ti mbi laa asara ye ni, nzapa ti mbi so a leke lo na keke, wala na bengba wen laa amu yanga si ye ni abaa gigi.’

⁶Ye so mbi fa tënë ni lani na ala, ala ma ni awe, ala baa so ye ni asi awe. Ti ala, fade ala yeke fa tënë ni pepe? Fadeso, mbi yeke fa tënë ti afini ye na ala, afini ye so angba na hondengo ni si ala hinga ni pepe so.

⁷Aye ni ayeke angbene ye ti giriri pepe, fadeso laa mbi yeke sara ni. Ngbene ye ngbii asi laso, ala de ti ma tënë ti aye ni pepe, tongaso si ala tene pepe: ‘E hinga tënë ni kozoni awe.’

⁸Taa-tënë, ala ma tënë ni pepe, ala hinga tënë pepe, ala zi mê ti ala ti ma tënë ni laoko pepe. Mbi hinga, mbi tene, ala yeke azo ti kango zo. Gi so ala de na ya ti mama ti ala, a iri ala ‘Azo ti ngangu li’.

⁹Me ndali ti so mbi yeke Nzapa, mbi kanga ngonzo ti mbi. Ndali ti sepelango so alingbi na mbi, mbi kanga be ti mbi na ala, mbi zia lege ti hunzingo ala biani biani.

¹⁰Mbi tara ala, me na ya ti wâ pepe tongana ti so a yeke tara wen ti nginza na ya ti wâ ti zi sioni daa. Me mbi tara ala na ya ti wâ ti aye ti vundu.

¹¹Ndali ti mbi wani, ndali ti mbi wani laa, mbi sara aye ni so. Biani, mbi ke titene a buba iri ti mbi; mbi ke nga titene gonda ti mbi aga ti mbeni zo nde.”

¹²*KOTA GBIA atene: “Jacob, ma mbi! Israel, mbi laa mbi iri mo. Mbi ngba lakue Nzapa: mbi yeke kozoni, mbi yeke ndangba ni.

¹³Na maboko ti mbi wani, mbi zia gere ti sese; na maboko ti mbi ti koli, mbi gbara le ti nduzu: gi so mbi iri ala, ala ga aluti.

¹⁴Ala kue, ala bongbi tere ti ala, ala ma! Mbi yeke na mbeni zo so mbi ye lo mingi. Lo laa lo yeke sara ande titene ye so mbi ye ti sara na Babilone aga taa-tënë; lo laa lo yeke sara si azo ti Babilone ahinga ngangu ti mbi. Me na popo ti ala, zo wa laa afa tënë so, zo wa?

¹⁵Mbi, mbi oko laa mbi tene tënë ni. Mbi iri lo, mbi sara si lo ga; aye so lo yeke sara, fade ayeke ga nzoni.”

¹⁶Ala ga nduru na mbi, ala ma tënë so: Ngbene ye na tongo nda ni, mbi tene tënë na hondengo ni pepe. Na ngoi so aye ni so asi, mbi yeke daa. Fadeso, Kota Gbia NZAPA atokua mbi, lo mu na mbi yingo ti lo.

¹⁷*KOTA GBIA, lo so lo zi mo, Nzapa ti Israel so ayeke nde si ayeke nzoni kue, tënë so lo tene ayeke so: “Mbi KOTA GBIA, Nzapa ti mo, mbi laa mbi yeke fa na mo ye so mo lingbi ti baa nzoni daa. Mbi laa mbi yeke gue na mo lege so mo yeke tambula daa.

¹⁸Yanga so mbi mu lani, tongana mo ma fade ni, ka siriri ti mo ayeke ga tongana *bale, ka mbirimbiri ti mo ayeke ga tongana *amapo ti kota ngu-ingo!

¹⁹Ka *ahale ti mo ayeke ga tongana mbutu ti yanga ti kota ngu-ingo, ka amolenge ti ya ti mo ayeke ga tongana le ti mbutu; na dawa ti mbi, ka a zi iri ti ala pepe, a mingo iri ti ala pepe.”

²⁰Ala londo na Babilone asigigi! Ala londo hio na popo ti azo ni, ala kpe! Ala dekongo na ngia, ala fa tënë so, ala to mbela na ni ngbii asi na nda ti sese kue, ala tene: “*KOTA GBIA azi Jacob, zo ti kua ti lo awe.”

²¹Na ya ti benyama so lo fa lege na azo ti lo, nzara ti ngu asara ala pepe. Ndali ti ala, lo sara si ngu asigigi na ya ti têne; lo suru ya ti têne ni si ngu asigigi daa.

²²KOTA GBIA atene: “Siriri ayeke ndali ti azo ti sioni pepe.”