Read La Bible en Sango courant – Mbeti ti Nzapa Ésaïe 66 Bible Online

Ésaïe 66 - La Bible en Sango courant – Mbeti ti Nzapa bible

Ésaïe 66

¹Tënë so *KOTA GBIA atene ayeke so: “Yayu ayeke mbata ti mbi ti gbia, sese ayeke mbata so mbi yeke zia gere ti mbi na ndö ni. Mara ti da wa laa ala lingbi ti sara na mbi? Ndo wa laa mbi lingbi ti wu tere ti mbi daa?

²Aye so kue, maboko ti mbi laa asara ni si abaa gigi, so tënë ti yanga ti mbi KOTA GBIA laa. Me zo ti mawa so be ti lo awoko, lo so lo ma tënë ti mbi si tere ti lo ayeke do, zo tongaso laa mbi yeke baa lo na nzoni le.

³Zo ayeke fâ bagara ti mu na *sandaga, me na mbage, lo yeke fâ zo; lo yeke fâ go ti taba, me na mbage, lo yeke mu mbo na sandaga; lo yeke mu sandaga ti farini, me na mbage, lo yeke mu mene ti nguru; lo yeke zö dukani na mbi, me na mbage, lo yeke voro ayanda. Azo so kue asoro lege ti ala wani, be ti ala anzere na afungo ye ti ala ni so.

⁴Mbi nga, mbi soro ti zia ala titene ala baa pasi ndali ti mbana ti ala. Mbi yeke sara titene ye so ala yeke sara mbeto ni aga na ndö ti ala. Biani, mbi iri ndo, me zo oko ayeda pepe; mbi tene tënë, me ala ma pepe. Ala sara ye so ayeke sioni na le ti mbi, ala soro ti sara ye so anzere na be ti mbi pepe.”

⁵Ala ma tënë ti *KOTA GBIA, ala so tere ti ala ayeke do na mbeto ndali ti tënë ti lo: Ambeni ita ti ala ake ala si atumba ala ndali ti mbi. A-ita ti ala ni ayeke he ala si ayeke tene: “Ayeke nzoni KOTA GBIA afa gonda ti lo si e lingbi ti baa ngia ti ala ni!” Me a-ita ti ala ni laa kamene ayeke gbu ande le ti ala.

⁶Mbeni wuluwulu alondo na gbata, mbeni go alondo na ya ti kota da ti Nzapa: so go ti KOTA GBIA laa. Lo yeke kiri na awato ti lo peko ti sarango ye ti ala.

⁷Kozo titene ya ti wali aso, lo du molenge awe! Kozo titene lo baa pasi, lo du molenge-koli awe!

⁸Zo wa laa ama mara ti tënë tongaso awe, zo wa? Zo wa laa abaa mara ti ye tongaso awe, zo wa? A yeke du azo ti mbeni kodro gi na ya ti lango oko? A yeke du mbeni mara gi hio tongaso? Me ti *Sion ayeke tongaso: lo yeke tongana wali so abaa pasi gi kete si lo du amolenge ti lo!

⁹KOTA GBIA, Nzapa ti mo atene: “Mbi so mbi sara si wali ayeke yo ngo ngbii ya ti lo akono, fade mbi yeke gbanzi lo ti du? Mbi so mbi sara si wali adu molenge, fade mbi yeke kanga lege na lo ti du?”

¹⁰Ala so kue aye Jérusalem, ala na lo aduti na ngia, ala dodo na ngia ndali ti lo. Ala so kue lani asara mua ndali ti ye ti vundu so asi na lo, ayeke nzoni be ti ala asi singo na ngia ndali ti lo.

¹¹Tongaso, fade lo yeke mu na ala ye so ayeke de be ti ala. Ala yeke duti tongana kete molenge so anyon me ti mama ti lo, ya ti lo asi, tongana kete molenge so agboto ngu ti me ti mama ti lo na ngia.

¹²Biani, tënë so KOTA GBIA atene ayeke so: “Baa, mbi yeke sara titene siriri aga ngbii asi na Jérusalem tongana *bale, mosoro ti amara nde aga na lo tongana ngu so asuku amu ndo kue. Fade mbi yeke bata ala tongana mama so ayeke mu me na molenge ti lo. Lo yo molenge ni na kate ti lo, lo yo lo na ndö ti gere ti lo si lo yeke sara ngia na lo.

¹³Biani, tongana ti so mama ayeke de be ti molenge ti lo, mbi nga, fade mbi yeke de be ti ala; a yeke de be ti ala na Jérusalem!

¹⁴Tongana ala baa ande ye ni, fade be ti ala ayeke duti na ngia, tere ti ala ayeke kiri ti wara ngangu tongana fini pere na peko ti ngu-Nzapa.” Fade KOTA GBIA ayeke sara ye na ngangu ndali ti azo ti kua ti lo, me lo yeke fa ngonzo ti lo na awato ti lo.

¹⁵Biani, KOTA GBIA ayeke ga na ya ti wâ, apusu ti mbarata ti lo ayeke tongana kota pupu. Lo yeke ga ti fa sioni ngonzo ti lo, ti suku na azo na lege ti menga ti wâ.

¹⁶KOTA GBIA ayeke ga ti fâ ngbanga ti azo na lege ti wâ nga na lege ti yongoro zeme. Azo mingi ayeke kui.

¹⁷Azo ni ayeke azo so a zia tere ti ala nde si ala yeke *sukula sioni ti ala ti li na ya ti ambeni pendere ndo so ala yeke voro ayanda daa; ala yeke luti na peko ti mbeni zo so ayeke na popo ti ala, ala yeke te kasa ti nguru, na aye so ayeke sioni mingi nga na adeku. Azo so ayeke kui kue legeoko; so tënë ti yanga ti KOTA GBIA laa.

¹⁸*KOTA GBIA atene: “Mbi hinga ye so ala yeke sara nga na tënë ti be ti ala. Lango ni alingbi awe ti bongbi amara kue na azo ti ayanga ti kodro kue. Ala yeke ga ti baa gonda ti mbi.

¹⁹Fade mbi yeke zia na popo ti ala mbeni ye so afa ngangu ti mbi. Na peko ti ngbanga so mbi fâ, azo so ayeke ngba na fini, mbi yeke tokua ala na mbage ti amara so ayeke na Tarsis, na Pul nga na Lud — azo ni so ahinga ti pika kokora mingi — Mbi yeke tokua ala na ndo ti azo ti Tubal na ti Yavan, nga na ndo ti azo ti azoa so ayeke yongoro kâ, ndo so azo ade ti ma tënë ti mbi daa laoko pepe, ndo so azo ade ti baa gonda ti mbi daa laoko pepe. Fade awatokua ni ayeke fa gonda ti mbi na amara ni.

²⁰Tongaso, azo ti amara ni ayeke mu a-ita ti ala, azo ti Israel kue ti kiri na ala: amara ni ayeke ga na a-ita ti ala ni na ndö ti mbarata, na ya ti apusu, na ya ti apusu ti mbarata so a sara da na ndö ni, na ndö ti *apâkârâ, na ndö ti *azambala ngbii ala si na Jérusalem, na ndö ti hoto ti mbi so ayeke nde si ayeke nzoni kue. Ye ni ayeke duti tongana *sandaga ti ala so ala mu na mbi. Mbi yeke yeda na ni tongana sandaga so azo ti Israel ayeke zia na ya ti sembe so ayeke *nzoni si ala yeke ga na ni na ya ti kota da ti mbi. Tënë so mbi KOTA GBIA, mbi tene laa.

²¹Ataa na popo ti amara ni, mbi yeke soro ambeni ti ga awayango-sandaga, mbi yeke soro ambeni ti ga tongana azo ti mara ti Lévi; tënë so KOTA GBIA atene laa.”

²²Biani, legeoko tongana fini yayu na fini sese so mbi sara ayeke ngba ti luti ngangu na dawa ti mbi, fade iri ti *ahale ti ala na ti ala wani ayeke ngba ti luti ngangu na dawa ti mbi; so tënë ti yanga ti KOTA GBIA laa.

²³Tongaso, na matanga ti fini nze oko oko, na *lango ti wungo tere oko oko, fade azo kue ayeke ga ti kuku ti kpo li ti ala na dawa ti mbi; tënë so mbi KOTA GBIA, mbi tene laa.

²⁴Na sigingo ti ala, fade ala lingbi ti baa kuâ ti azo so atomboka na tere ti mbi. Angusu so ayeke te ala ayeke kui pepe; wâ so ayeke gbi ala ayeke mingo pepe. Ala yeke ga ye so ayeke sioni mingi ndali ti azo kue.