Read La Bible en Sango courant – Mbeti ti Nzapa Ésaïe 7 Bible Online

Ésaïe 7 - La Bible en Sango courant – Mbeti ti Nzapa bible

Ésaïe 7

¹Na ngoi so Ahaz, molenge ti Yotam, molenge ti Ozias ayeke gbia ti Juda, Resen, gbia ti Sirii na Peka, molenge ti Remalia, gbia ti Israel, alondo ti gue ti tiri bira na azo ti Jérusalem. Me ala wara lege ti mu gbata ni pepe.

²Azo ague, atene tënë ni na gbia Ahaz, mbeni *hale ti David, lo na azo ti yangbo ti lo, ala tene: “Azo ti sese ti Sirii ali na sese ti Efraim awe.” Be ti Ahaz na ti azo ti kodro ti lo ato nda ti do tongana akeke ti gbako so pupu ayeke yingi ni.

³*KOTA GBIA atene na Ésaïe: “Mo mu molenge ti mo Shear-Yashub na tere ti mo, mo gue, mo wara tere na Ahaz. Lo yeke nduru na tere ti du so ngu ayeke sua daa ti gue na ndo so a yeke bata ngu daa na nduzu; du ni ayeke na lege ti yaka ti azo ti sukulango bongo.

⁴Fade mo yeke tene na lo: ‘Hange! Mo duti kpoo, mo sara mbeto pepe. Ayeke nzoni be ti mo ado pepe, ngbanga ti Resen, zo ti Sirii so nga na Peka. Agbia use so akpa gi anduru keke so guru ti wâ angba ti sigigi daa kete kete.

⁵Mbi hinga so azo ti Sirii na Peka na aturugu ti Efraim aleke na be ti ala ti sara sioni na mo. Ala tene:

⁶E gue, e tiri bira na Juda! E zia mbeto na be ti azo ni! E gbu ala na ngangu ti ga na mbage ti e! E zia molenge ti Tabeel gbia na ndö ti kodro ni!’ ”

⁷Me tënë so Kota Gbia NZAPA atene ayeke so: “Fade ye ni aga taa-tënë pepe; ye ni ayeke si pepe.

⁸Biani, Damas ayeke li-kodro ti Sirii, Resen ayeke gbia gi na Damas. Angba ngu baleomene na oku titene azo aga ti buba sese ti Efraim kue; Efraim ayeke kiri ti ngba mara pepe.

⁹Samarii ayeke li-kodro ti Efraim, Peka ayeke gbia gi na Samarii. Tongana ala ma na be pepe, fade ala yeke gbu le ni pepe.”

¹⁰*KOTA GBIA akiri atene na Ahaz:

¹¹“Mo hunda na KOTA GBIA, Nzapa ti mo mbeni ye so afa atene, ye ni ayeke si biani. Mo hunda titene ye ni alondo yongoro na ndo ti akuâ wala yongoro na nduzu kâ si aga.”

¹²Ahaz akiri tënë: “Mbi yeke hunda ye oko pepe; mbi ye ti tara be ti KOTA GBIA pepe.”

¹³Tongaso Ésaïe atene: “Ala *ahale ti David, ala ma mbi si! So ala ngba ti so li ti azo so, alingbi na ala pepe si ala ye ti so li ti Nzapa ti mbi so?

¹⁴Tongaso, fade KOTA GBIA wani ayeke fa na ala mbeni ye: maseka-wali ayeke mu ngo, lo yeke du molenge-koli, lo yeke di iri ti lo Emmanuel.

¹⁵Kobe ti molenge ni ayeke duti ngu ti me nga na mafuta ti wotoro, ngbii lo hinga ti ke ye ti sioni na ti soro ye ti nzoni.

¹⁶Kozo titene molenge ni ahinga ti ke ye ti sioni na ti soro ye ti nzoni, sese ti agbia use so mo yeke sara mbeto ti ala so, fade sese ni ayeke ngba senge senge.

¹⁷Ti mo, na azo ti mo na azo ti sewa ti mo, fade KOTA GBIA ayeke sara titene ambeni lango ti kpale aga na ndö ti ala. Alango ni ayeke duti ande alango so zo ade abaa ni laoko pepe, ti londo na ngoi so Israel na Juda akangbi. Ye so aye ti sara tënë ti gbia ti Asirii.”

¹⁸Na lango ni so, fade *KOTA GBIA ayeke huru yanga ti lo ti iri avuma so ayeke yongoro kâ, na ndo so kota *bale ti Ezipte ayeke tuku na ya ti kota ngu-ingo; lo yeke iri nga awotoro so ayeke na sese ti Asirii.

¹⁹Ala yeke ga si ala kue ayeke duti na popo ti ahoto so têne ayeke daa, na popo ti atêne so asuru, na popo ti akeke so agbu tere nga na ando so kue anyama ayeke te pere daa.

²⁰Na lango ni so, KOTA GBIA ayeke iri zeme na mbage ti bale ti Efrate — zeme ni ayeke gbia ti Asirii — . Fade lo yeke kio kua ti li ti ala na kua ti tere ti ala; lo yeke kio nga kua ti yanga ti ala.

²¹Na lango ni so nga, zo oko oko ayeke bata mama ti bagara oko na amama ti ngasa use.

²²Ndali ti anyama ni, ngu ti me ayeke duti gbani gbani, azo alingbi ti nyon ngu ti me ni. Biani, azo so ayeke ngba na ya ti kodro ni, kobe ti ala ayeke duti ngu ti me na mafuta ti wotoro.

²³Na lango ni so nga, yaka ti vinye so a lu gere ni saki oko si ngere ni ayeke ale ti nginza saki oko, fade yaka ni ayeke ga ndo ti aki na ti akamba ti ki.

²⁴Fade azo ayeke mu akokora na ale ti kokora ti ga ti gi anyama na ya ti yaka ni, ngbanga ti so kodro ni kue ayeke ga ndo ti aki na ti akamba ti ki.

²⁵Ti yaka so ayeke na li ti ahoto so azo ayeke de lani na kpoka, fade mbeto ayeke sara azo ti gue kâ ndali ti aki na akamba ti ki. Biani, yaka ni ayeke ga ndo so abagara ayeke te pere daa, ndo so ataba ayeke fono daa.