Read La Bible en Sango courant – Mbeti ti Nzapa Awayango-sandaga 10 Bible Online

Awayango-sandaga 10 - La Bible en Sango courant – Mbeti ti Nzapa bible

Awayango-sandaga 10

¹Ambeni molenge ti Aaron ti koli, Nadab na Abihu amu kete ta ti zongo na dukani ti ala, ala zia ale ti wâ daa, ala zia dukani na ndö ni si ala zö ni. Tongaso ala zö na KOTA GBIA mbeni *sandaga ti dukani so ala zö ni na wâ so ayeke nde na ti so ndia amu yanga na ala daa.

²Tongaso mbeni wâ asigigi na dawa ti KOTA GBIA, agbi ala kue si ala kui gi na ndo so.

³Moïse atene na Aaron: “KOTA GBIA atene lani tongaso: ‘Azo so ayeke ga nduru na mbi, mbi ye si ala hinga atene, mbi yeke nde si mbi yeke nzoni kue; mbi ye si ala gonda mbi na le ti azo kue.’ ” Aaron aduti gi kpoo, lo zi yanga oko pepe.

⁴Moïse airi Mishael na Elisafan, amolenge ti Uziel, ita ti babâ ti Aaron. Moïse atene na ala: “Ala gue, amu kuâ ti a-ita ti ala so ayeke lango na yanga ti da so ayeke nde si ayeke nzoni kue, ala sigigi na ni na ya ti bâbâ.”

⁵Ala ma yanga ti Moïse si ala gue, amu akuâ ni, abongo ti ala ti kua angba na tere ti ala si ala sigigi na akuâ ni na ya ti bâbâ ni.

⁶Na pekoni, Moïse atene na Aaron na amolenge ti lo, Elazar na Itamar, atene: “Ala zi ya ti kua ti li ti ala kirikiri pepe, ala suru bongo na tere ti ala pepe ti fa atene, ala yeke na mua. Tongaso pepe, fade ala yeke kui si ala yeke iri ngonzo ti KOTA GBIA na ndö ti bongbi ti azo ti Israel kue. Ala zia a-ita ti ala, azo ti Israel kue atoto kuâ ti azo so KOTA GBIA asara si ala kui kuâ ti wâ so.

⁷Ti mo Aaron na amolenge ti mo, ala londo na yanga ti da ti bongo so KOTA GBIA na azo ti lo ayeke wara tere daa so pepe. Tongaso pepe, fade ala yeke kui. Biani, a tuku mafuta na li ti ala awe ti zia ala nde ndali ti KOTA GBIA.” Ala sara ye alingbi na tënë so Moïse atene.

⁸KOTA GBIA atene na Aaron:

⁹“Mo na amolenge ti mo, tongana ala ye ti gue na ya ti da ti bongo so KOTA GBIA na azo ti lo ayeke wara tere daa, ala nyon vin pepe, wala ngangu samba pepe. Tongaso pepe, fade ala yeke kui. Ndia so ayeke ngba ngu na ngu ndali ti *ahale ti ala ti angoi kue.

¹⁰Ala nyon samba pepe, tongaso si ala lingbi ti kangbi popo ti ye so ayeke ti Nzapa na ye so ayeke ti Nzapa pepe, ye so ayeke *nzoni na ye so ayeke *sioni.

¹¹Tongaso si ala lingbi ti fa na azo ti Israel tënë ti andia so kue mbi KOTA GBIA, mbi mu na ala na lege ti Moïse.”

¹²Moïse atene na Aaron nga na amolenge ti lo, Elazar na Itamar so angba na fini so, atene: “Ale ti kobe so azo aga na ni ti mu *sandaga so a yeke gbi ni kue na wâ na KOTA GBIA, ala zi ti lo na ya ni. Tanga ni so angba so, ala mu ni asara na mapa so a sara na mama ni pepe, ala te ni na tere ti gbalaka, ngbanga ti so ayeke mbeni kobe so ayeke nde si ayeke nzoni kue ahon atanga ni.

¹³Ala yeke te ni gi na ndo so ayeke nde si ayeke nzoni kue. Mara ti asandaga so a mu na KOTA GBIA so ayeke ga ye ti mo na ti amolenge ti mo, alingbi na yanga so a mu na mbi.

¹⁴Kate ti anyama ni, na gere ni so a zi ni si azo ti Israel aya na nduzu na sandaga ti beoko ti fa atene, a mu na KOTA GBIA so, fade mo na amolenge ti mo ti koli nga na ala ti wali ayeke te ni na mbeni ndo so ayeke *nzoni. Biani, a mu ni titene aga ye ti mo na ti amolenge ti mo.

¹⁵Fade azo ti Israel ayeke ga na gere ti anyama ni na kate ni; ala yeke ga nga na akasa so mafuta ayeke daa mingi si a yeke gbi ni na ndö ti gbalaka so. Na peko ti so a ya na nduzu ti fa atene, a mu na KOTA GBIA, akasa ni ayeke ga ye ti mo na ti amolenge ti mo kpu na kpu, alingbi na yanga so KOTA GBIA amu.”

¹⁶Moïse ahunda tënë ti koli-ngasa so azo ti Israel aga na ni ndali ti sandaga ti zingo siokpari na li ti ala so. Lo ma a tene, a gbi ni na wâ awe. Tongaso, lo sara ngonzo na tere ti Elazar na Itamar, amolenge ti Aaron so angba na fini so. Moïse ahunda ala, atene:

¹⁷“Nyama so azo aga na ni ndali ti sandaga ti zingo siokpari na li ti ala so, ngbanga ti nyen si ala te kasa ni na ndo so ayeke nde si ayeke nzoni kue pepe so? Biani, ye ni ayeke nde si ayeke nzoni kue ahon atanga ni! KOTA GBIA amu fade nyama so na ala titene ala zi na sioni ti bongbi ti azo ti Israel; ala ya ni na dawa ti lo titene lo zi siokpari na li ti ala.

¹⁸Mene ti nyama ni, ala ga fade na ni pepe na ya ti da so ayeke nde si ayeke nzoni kue. Ala lingbi fade ti te nyama ni na mbeni ndo so ayeke nde si ayeke nzoni kue alingbi na yanga so mbi mu lani na ala.”

¹⁹Aaron akiri tënë na Moïse, atene: “Baa, na lango so ala ya na KOTA GBIA sandaga titene lo zi siokpari na li ti ala nga na sandaga so a yeke gbi ni kue na wâ, mo hinga ye so asi na mbi. Sandaga so a mu ndali ti zingo siokpari so, mbi lingbi fade ti te ni na lango ni so? Tongana mbi te fade ni, ayeke nzere na be ti KOTA GBIA?”

²⁰Moïse ama tënë ni si anzere na be ti lo.