Read La Bible en Sango courant – Mbeti ti Nzapa Awayango-sandaga 12 Bible Online

Awayango-sandaga 12 - La Bible en Sango courant – Mbeti ti Nzapa bible

Awayango-sandaga 12

¹KOTA GBIA atene na Moïse

²ti tene na azo ti Israel, atene: “Tongana mbeni wali adu molenge-koli, fade wali ni ayeke ga *sioni na ya ti lango mbarambara, lo yeke ngba tongaso ngbii na ngoi so kue lo yeke baa ya ti lo.

³Na lango miombe ni, a yeke fâ molenge ni na *ganza.

⁴Wali ni ayeke kiri ti ngba lango baleota na ota titene a *sukula lo na peko ti mene so atuku na tere ti lo na ndembe ti dungo ni. Ye so kue a zia nde ndali ti Nzapa, alingbi wali ni andu ni pepe; alingbi lo gue pepe na ndo so a zia nde ndali ti Nzapa. Lo ku ngbii ngoi titene a sukula lo alingbi si.

⁵“Tongana wali ni adu molenge-wali, lo yeke ga *sioni na ya ti lango baleoko na osio gi tongana ti so lo yeke ga ka *sioni na ndembe so lo yeke baa ya ti lo. Na pekoni, lo yeke ku lango baleomene na omene titene a sukula lo na peko ti mene so atuku na tere ti lo na ndembe ti dungo ni.

⁶“Tongana a sukula lo awe, ataa na peko ti dungo molenge-koli wala molenge-wali, lo yeke gue ti baa wayango-sandaga na yanga ti da ti bongo so Nzapa na azo ti lo ayeke wara tere daa. Lo yeke mu kete taba ti ngu oko ti gue na ni na wayango-sandaga ni titene lo ya na *sandaga so a yeke gbi ni kue na wâ. Lo yeke gue nga na *mbipa oko wala *kolokoto oko ti mu na sandaga ndali ti siokpari ti lo.

⁷Wayango-sandaga ayeke ya sandaga ni na KOTA GBIA. Tongana wayango-sandaga aya sandaga ni titene KOTA GBIA azi siokpari na li ti wali ni awe, andaa a sukula lo na peko ti mene so atuku na tere ti lo na ndembe ti dungo ni so awe.” So ayeke ndia ndali ti wali so adu molenge-koli wala molenge-wali laa.

⁸“Tongana lege titene wali ni awara kete taba ayeke daa pepe, fade lo yeke ga na akolokoto use wala ambipa use. Mbeni ndeke ni oko, lo yeke mu na sandaga so a yeke gbi ni kue na wâ; mbeni ndeke ni, lo yeke mu ndali siokpari ti lo. Na peko ti so wayango-sandaga aya asandaga ni titene Nzapa azi siokpari na li ti lo awe, a sukula lo awe.”