Read La Bible en Sango courant – Mbeti ti Nzapa Awayango-sandaga 24 Bible Online

Awayango-sandaga 24 - La Bible en Sango courant – Mbeti ti Nzapa bible

Awayango-sandaga 24

¹KOTA GBIA atene na Moïse:

²“Mu yanga na azo ti Israel titene ala ga na mo mafuta ti olive so ayeke nzoni ahon atanga ni kue, tongaso si wâ ayeke za na ya ti lamba lakue na lakui.

³Fade Aaron ayeke zia gere ti alamba ni na ya ti da ti bongo so mbi na azo ti mbi e yeke wara tere daa, na dawa ti ridoo so ahonde sanduku ti mbuki. Alamba ni ayeke za na dawa ti mbi, KOTA GBIA na lakui ngbii asi na ndaperere. Ndia so ayeke ngba ngu na ngu ndali ti *ahale ti ala ti angoi kue.

⁴Aaron ayeke zia alamba ni na ndö ti gere ni so a sara na lôro ti nzoni ni titene alamba ni aza lakue na bi na dawa ti mbi KOTA GBIA.”

⁵“Mo mu nzoni farini, mo zö na gatoo baleoko na use; gatoo oko kilo omene, gatoo oko kilo omene.

⁶Fade mo yeke zia agatoo ni na ndö ti tere, na ndö ti tere, gba ni use na dawa ti mbi, na ndö ti meza so a sara na lôro ti nzoni ni.

⁷Mo yeke zia dukani ti nzoni ni na ndö ti gba ti agatoo ni oko oko; fade a yeke zö ni kue na wâ ndali ti mbi titene aga ye ti dango be.

⁸“Na lango oko oko ti wungo tere, ala yeke zia mara ti agatoo tongaso na dawa ti mbi KOTA GBIA lakue. Ala azo ti Israel, so ayeke tënë ti mbuki ndali ti ala lakue lakue.

⁹Agatoo ni ayeke ga ye ti Aaron na ahale ti lo; ala yeke te ni na mbeni ndo so ayeke nde si ayeke nzoni kue. Biani, agatoo ni ayeke nde si ayeke nzoni kue ahon atanga ni, ngbanga ti so a mu ni na popo ti akobe so a yeke zö ni kue na wâ ndali ti KOTA GBIA. So ayeke ye so aga ti ala kpu na kpu.”

¹⁰Mbeni lâ, tiri alondo na ya ti bâbâ na popo ti mbeni molenge-koli na mbeni zo ti Israel. Mama ti molenge-koli ni ayeke zo ti Israel, babâ ti lo ayeke zo ti Ezipte.

¹¹Iri ti mama ti molenge-koli ni ayeke Shelomit; Shelomit ayeke molenge ti Dibri ti wali; Dibri ayeke zo ti mara ti Dan. Molenge ti Shelomit azonga iri ti Nzapa si adeba lo. A mu molenge-koli ni ague na lo na Moïse.

¹²A bata molenge-koli ni nzoni ti ku na yanga so KOTA GBIA ayeke mu.

¹³Tongaso KOTA GBIA atene na Moïse:

¹⁴“Mu koli so azonga iri ti mbi so, mo sigigi na lo na ya ti bâbâ ni; azo so kue ama lo, ala yeke zia maboko ti ala na li ti lo si bongbi ti azo ti Israel kue ayeke bo lo na têne ti fâ lo.

¹⁵Fade mo yeke tene na azo ti Israel, mo tene: “Tongana mbeni zo azonga Nzapa ti lo, fade ngbanga ti sioni ti lo ayeke kiri na li ti lo wani.

¹⁶Zo so azonga iri ti KOTA GBIA, fade a yeke fâ lo; bongbi ti azo ni kue ayeke bo lo na têne si ayeke fâ lo. Ataa zo ni ayeke wande, wala molenge ti kodro, fade a yeke fâ lo, ngbanga ti so lo zonga iri ti Nzapa.

¹⁷“Zo so afâ mbeni zo, alingbi a fâ lo.

¹⁸Tongana zo ni afâ nyama ti mbeni zo, alingbi lo mu mbeni nyama nde so angba na fini na wani.

¹⁹“Zo so abuba mbeni mbage ti tere ti mba ti lo, fade a yeke buba nga gi oko mbage ti tere ti lo ni:

²⁰zo so akungbi bio ti mba ti lo, a yeke kungbi nga bio ti lo; zo so akoro le ti mba ti lo, a yeke koro nga le ti lo; zo so akungbi pembe ti mba ti lo, a yeke kungbi nga pembe ti lo; zo so asara sioni na mba ti lo, gi mara ti sioni so laa a yeke sara na lo.

²¹“Zo so afâ mbeni nyama, alingbi lo mu mbeni nyama nde na plase ni; zo so afâ zo, alingbi a fâ lo.

²²“Fade ndia oko so ayeke duti ndali ti wande nga ndali ti molenge ti kodro, ngbanga ti so mbi laa mbi yeke KOTA GBIA, Nzapa ti ala.”

²³Moïse atene peko ti atënë so na azo ti Israel. Tongaso azo amu koli so azonga iri ti Nzapa so, ala sigigi na lo na ya ti bâbâ, ala bo lo na têne si ala fâ lo. Azo ti Israel asara ye alingbi na yanga so KOTA GBIA amu na Moïse.