Read La Bible en Sango courant – Mbeti ti Nzapa Awayango-sandaga 7 Bible Online

Awayango-sandaga 7 - La Bible en Sango courant – Mbeti ti Nzapa bible

Awayango-sandaga 7

¹“Ndia ndali ti *sandaga ti lekengo tënë ayeke so: So ayeke sandaga so ayeke nde si ayeke nzoni kue ahon atanga ni.

²A yeke fâ go ti nyama ni na ndo so a yeke fâ ka go ti anyama so a mu na sandaga so a yeke gbi ni kue na wâ daa; na pekoni, wayango-sandaga ayeke fi mene ni na tere ti gbalaka, angoro ni kue.

³Wayango-sandaga ayeke mu na KOTA GBIA akasa so mafuta ayeke daa mingi: damba ni, mafuta so ayeke na tere ti akamba ti ya ti nyama ni,

⁴aronyon use na mafuta so ayeke na tere ti aronyon ni, na mafuta so ayeke na tere ti ngbonda ti nyama ni nga na mafuta so ayeke na tere ti be ni na aye so ayeke na tere ni; lo yeke zi ni na aronyon ni.

⁵Na pekoni, wayango-sandaga ayeke zö aye ni kue na ndö ti gbalaka. So ayeke kobe ti sandaga so a gbi ni kue na wâ ndali ti KOTA GBIA.

⁶Akoli so kue ayeke azo ti ya ti sewa ti awayango-sandaga laa alingbi ti te nyama ni na ndo so ayeke nde si ayeke nzoni kue: so ayeke mbeni sandaga so ayeke nde si ayeke nzoni kue ahon atanga ni.

⁷Ndia ndali ti sandaga ti zingo siokpari na li ti zo ayeke legeoko na ndia ndali ti sandaga ti lekengo tënë. Kasa ti nyama ni ayeke ga ti wayango-sandaga so aya sandaga titene Nzapa azi siokpari na li ti azo so.”

⁸“Tongana mbeni zo aga na nyama ti *sandaga so a yeke gbi ni kue na wâ, poro ti nyama ni ayeke ga ti wayango-sandaga so aya sandaga ni.

⁹Asandaga ti ale ti kobe so a zö na ya ti fur, wala so a to na ya ti tawa wala so a yoro ni na ya ti kpangbara sembe, ayeke ga ti wayango-sandaga so aya asandaga ni.

¹⁰Sandaga ti ale ti kobe so kue a tuku mafuta daa si a gbu ya ni, wala a tuku mafuta daa pepe, fade ayeke ga ti amolenge ti Aaron; zo oko oko ayeke wara ni alingbi tere.”

¹¹“Ndia ndali ti *sandaga ti beoko so a yeke mu na KOTA GBIA ayeke so:

¹²Tongana mbeni zo aga na sandaga ti beoko titene lo mu singila na Nzapa, ayeke nzoni lo ga na gatoo so a tuku mafuta daa, a gbu ya ni si a sara na mama ni pepe; lo ga nga na makara so a kpaka mafuta na tere ni nga na gatoo so a sara na farini, a tuku mafuta daa si a gbu ya ni.

¹³Na tere ti agatoo ni, zo ni ayeke ga nga na mapa so a sara na mama ni ti mu na sandaga ti mungo singila ni.

¹⁴Na ya ti mara ti aye ni oko oko kue, a yeke zi mbeni ni oko ndali ti KOTA GBIA. Tanga ti aye ni ayeke ga ti wayango-sandaga so afi mene ti sandaga ti beoko na tere ti gbalaka so.

¹⁵Âdu ti kasa ti nyama so a mu na sandaga ti beoko na ti mungo singila, a yeke te ni gi na lango so a mu na sandaga ni; a yeke bata tanga ni asi na ndaperere pepe.

¹⁶“Mbeni zo aga na sandaga ti beoko na be ti lo wani wala sandaga ti zendo, alingbi a te kasa ti nyama ni na lango so a ya na sandaga ni. Tongana tanga ni angba, alingbi ti te ni na ndade ni.

¹⁷Me tongana tanga ni angba asi lango ota, ala yeke tuku ni na wâ titene agbi.

¹⁸Kasa ti nyama so zo amu na KOTA GBIA ndali ti sandaga ti beoko, tongana zo ate ni na peko ti lango ota, KOTA GBIA ayeke yeda na sandaga ti zo ni pepe; sandaga ni ayeke ga mbeni ye senge. Zo so ate ni, ngbanga ti siokpari ni ayeke ti na li ti lo.

¹⁹Tongana kasa ni andu mbeni ye so ayeke *sioni, alingbi a te ni pepe, me a tuku ni na wâ titene agbi. “Alingbi zo so ayeke *nzoni si ate kasa ni.

²⁰Me zo so ayeke *sioni si ate kasa ti nyama so a mu na sandaga ti beoko na KOTA GBIA, fade a yeke tumba zo ni so na ya ti bongbi ti azo ti Israel.

²¹Tongana mbeni zo andu ye so kue ayeke *sioni, wala zo so ayeke *sioni, wala nyama so ayeke *sioni, wala mbeni ye so ayeke sioni mingi si ayeke *sioni si na pekoni lo te kasa ti nyama so a mu na sandaga ti beoko na KOTA GBIA, fade a yeke tumba zo ni so na ya ti bongbi ti azo ti Israel.”

²²KOTA GBIA atene na Moïse:

²³Tene na azo ti Israel, mo tene: “Mafuta ti kasa ti bagara, ti taba na ti ngasa, alingbi ala te ni pepe.

²⁴Mafuta ti nyama so akui kuingo, wala ti nyama so mbeni sioni nyama asuru ya ti lo, ala lingbi ti sara na kua kue, me alingbi ala te ni pepe.

²⁵Zo so ate mafuta ti nyama so a mu na *sandaga so a gbi ni kue na wâ ndali ti KOTA GBIA, fade a yeke tumba zo ni so na ya ti bongbi ti azo ti Israel.

²⁶Na ndo so kue ala yeke duti daa, alingbi ala te mene ti ndeke, wala ti nyama pepe.

²⁷Zo so kue ayeke te mene, fade a yeke tumba lo na ya ti bongbi ti azo ti Israel.”

²⁸KOTA GBIA atene na Moïse:

²⁹Tene na azo ti Israel, mo tene: “Tongana mbeni zo aga na sandaga ti beoko, alingbi lo mu nga na KOTA GBIA ye so ayeke ga ti lo.

³⁰Lo wani, lo yeke ga na sandaga so a yeke gbi ni kue na wâ ndali ti KOTA GBIA; so ti tene kasa so mafuta ayeke daa mingi nga na kate ti nyama ni. Ti kate ti nyama ni, fade lo yeke mu ni, lo ya na nduzu ti fa atene, lo mu na KOTA GBIA.

³¹Wayango-sandaga ayeke zö akasa so mafuta ayeke daa mingi so na ndö ti gbalaka. Ti kate ti nyama ni ayeke ga ti Aaron na amolenge ti lo.

³²Nyama so ala ga na ni ti mu na sandaga ti beoko so, gere ni ti mbage ti koli, alingbi ala mu na wayango-sandaga.

³³Gere ni ti mbage ti koli so ayeke ga ti amolenge ti Aaron, lo so lo yeke ya mene nga na mafuta ti nyama na sandaga ti beoko.

³⁴Biani, KOTA GBIA wani amu yanga na ala, azo ti Israel titene ala zia na mbage kate ti nyama nga na gere ti anyama so ala yeke mu na sandaga ti beoko. Alingbi ala mu ni na wayango-sandaga Aaron na *ahale ti lo; akasa ni so aga futa ti ala kpu na kpu.”

³⁵So ayeke ye so aga ti Aaron na amolenge ti lo so azo ti Israel azi na ndö ti sandaga so a gbi ni kue na wâ ndali ti KOTA GBIA laa. Ye ni aga ti ala, ti londo na lango so a zia ala ti sara kua ti wayango-sandaga na KOTA GBIA.

³⁶KOTA GBIA amu yanga na azo ti Israel ti mu ye ni na Aaron na amolenge ti lo, ti londo na lango so a tuku mafuta na li ti ala. Ndia so ayeke ngba ngu na ngu ndali ti *ahale ti ala ti angoi kue.

³⁷So ayeke andia ndali ti sandaga so a yeke gbi ni kue na wâ, sandaga ti ale ti kobe, sandaga ti zingo siokpari na li ti zo, sandaga ti lekengo tënë, sandaga ti ziango kua na maboko ti ala nga na sandaga ti beoko laa.

³⁸KOTA GBIA amu andia so na Moïse na ndö ti hoto ti Sinai, na benyama, na lango so lo mu yanga na azo ti Israel ti ga na asandaga ti ala na KOTA GBIA.