Read La Bible en Sango courant – Mbeti ti Nzapa Jérémie 10 Bible Online

Jérémie 10 - La Bible en Sango courant – Mbeti ti Nzapa bible

Jérémie 10

¹Azo ti Israel, ala ma tënë so KOTA GBIA ayeke tene na ala!

²Tënë so KOTA GBIA atene ayeke so: “Ala manda lege ti sarango ye ti amara nde pepe; aye ti kpene so ayeke na yayu, ala sara mbeto ni pepe. Amara nde laa ayeke sara mbeto ti aye ni.

³Biani, lege ti vorongo Nzapa ti amara nde ayeke gi senge senge ye. Azo ayeke fâ keke na ya ti gbako; zo ti sarango ye na kode ayeke de tere ni ti leke na mbeni yanda.

⁴Na pekoni, lo yeke zia lôro na wen ti nginza na tere ni; lo yeke mu pondi na martoo, lo pika na ni titene ayingi pepe.

⁵Ayanda ni so ayeke tongana mbeni gbagba ye so a zia na yaka ti akugbe ti kasa ti tumba na andeke; ayanda ni ayeke tene tënë pepe, a yeke yo ala yongo, ngbanga ti so ala lingbi ti tambula pepe. Ala sara mbeto ti ayanda ni so pepe: ala yeke sara sioni na zo pepe; ataa nzoni ye kue, ala lingbi nga ti sara ni pepe.”

⁶KOTA GBIA, mbeni Nzapa tongana mo ayeke daa pepe! Mo yeke kota, iri ti mo nga ayeke kota na lege ti ngangu ti mo.

⁷Mo so mo yeke gbia ti amara kue, zo wa laa alingbi ti kpe mbeto ti mo pepe? So laa alingbi titene azo asara na mo. Na popo ti azo ti ndara ti dunia so nga na ya ti akodro-gbia kue, mbeni zo tongana mo ayeke daa pepe.

⁸Ala kue kue kue, ala yeke azo so li ti ala ayeke daa pepe, ala yeke abuba zo. Ayanda ni alingbi ti fa ye oko pepe, ala yeke gi keke senge.

⁹A mu wen ti nginza so a pika ni pikango na Tarsis si a ga na ni; a mu nga lôro so alondo na Ufaz si a sara na ayanda ni. Zo ti sarango ye na kode laa aleke ni, wakode-kua ti lôro abaa lege ni. Na pekoni, ala yu na ayanda ni bongo so nzoroko ni akpa le ti nduzu, wala bongo so abe bengo. Andaa wakode-kua laa asara aye so kue.

¹⁰Me KOTA GBIA ayeke taa Nzapa, lo yeke Nzapa so ayeke na fini, lo yeke gbia kpu na kpu. Tongana lo sara ngonzo, sese ayeke yingi; tongana le ti lo abe na ngonzo, amara nde alingbi ti kanga be ti ala pepe.

¹¹Tënë so ala yeke tene ande na azo ni ayeke so: anzapa so asara yayu na sese pepe so, fade ala yeke ngba na ndö ti sese so pepe, ala yeke ngba na gbe ti yayu pepe.

¹²KOTA GBIA asara sese na lege ti ngangu ti lo, lo sara si dunia abaa gigi na lege ti ndara ti lo, lo gbara le ti nduzu na lege ti hingango ye ti lo.

¹³So lo dekongo awe, gba ti angu abongbi tere na yayu, lo sara si angbongboro mbinda alondo na nda ti sese kue si ayeke ma na nduzu, lo sara si wâ ti bekpa amu lege na ngu-Nzapa ti pika; lo sara si pupu alondo na ndo so lo bata ala daa ti sigigi.

¹⁴Azo kue ayeke azo so li ti ala ayeke daa pepe, ala hinga ndo pepe; awakode-kua kue ti lôro, kamene agbu le ti ala ndali ti ayanda ti ala, ayanda ti ala ni ayeke ye ti mvene, pupu ayeke na ya ti ala pepe.

¹⁵Ala yeke asenge senge ye, ala yeke aye so azo ayeke he na ngia. Na lango so KOTA GBIA ayeke ga na tere ti ala, ala kue ayeke hunzi.

¹⁶Ti Nzapa, lo yeke tongana ala pepe, lo so lo yeke mosoro ti Jacob; lo laa lo sara si dunia abaa gigi, mara ti Israel ayeke ye ti lo; iri ti lo ayeke KOTA GBIA so ayeke na ndö ti dunia kue.

¹⁷Jérusalem, mo so a ngoro mo na bira awe so, mo ro akungba ti mo so ayeke na sese.

¹⁸Biani, tënë so KOTA GBIA atene ayeke so: “Ti fadeso, mbi yeke bi azo ti kodro ni yongoro, tongana ti so a yeke bi ye na *mvingi; mbi yeke pete ala mbage na mbage si ala kpe ahon pepe.”

¹⁹“So mawa na mbi! So kota kpale ti nyen! Ka ti mbi ayeke hunzi pepe. Mbi tene lani na be ti mbi, mbi tene: Pasi ti mbi ni ayeke ngangu pepe, mbi yeke kanga be ti mbi daa senge.

²⁰Me a buba da ti mbi ti bongo awe, a gboto akamba ni kue awe. Amolenge ti mbi kue ado mbi azia awe. Zo oko ti kiri ti leke da ti mbi ti bongo na nduzu ayeke daa pepe; zo oko ti kiri ti leke mbeni ndo titene mbi duti na gbe ni ayeke daa pepe.”

²¹Ndali ti azo ti li ni laa ye so asi: ala yeke azo so li ti ala ayeke daa pepe, ala gi lege ti KOTA GBIA pepe. Ndani laa, kua ti ala ali ngu si azo so lani ayeke na gbe ti ala, ala kue akangbi kirikiri.

²²Mbeni tënë alondo kâ si ayeke ga, mbeni ye so ayeke yingi ndo alondo na Banga si ayeke ga, ayeke ga ti buba agbata ti Juda si agbata ni ayeke ga ngonda, ayeke ga ndo ti lango ti *anzagua.

²³KOTA GBIA, mbi hinga, zo ayeke makonzi na ndö ti lege ti lo wani pepe; zo so ayeke tambula na lege, lo yeke makonzi na ndö ti tambula ti lo pepe.

²⁴KOTA GBIA, pika mbi, me na legeni; pika mbi na ngonzo pepe, tongaso pepe, fade mo yeke nika mbi.

²⁵Mo tuku ngonzo ti mo ti wâ na ndö ti amara so ahinga mo pepe, na ndö ti azo so ayeke voro mo pepe. Biani, azo ni afâ azo ti mo, ahunzi ala, ala sara si kodro ti azo ti mo aga ngonda.