Read La Bible en Sango courant – Mbeti ti Nzapa Jérémie 13 Bible Online

Jérémie 13 - La Bible en Sango courant – Mbeti ti Nzapa bible

Jérémie 13

¹Tënë so *KOTA GBIA atene na mbi ayeke so: “Gue mo vo kamba ti ndö ti bongo so a sara na *len, mo kanga ni na ngbonda ti mo, me mo yoro ni na ya ti ngu pepe.”

²Mbi vo kamba ti ndö ti bongo alingbi na tënë so KOTA GBIA atene na mbi; mbi kanga ni na ngbonda ti mbi.

³Ti fani use ni, tënë ti KOTA GBIA asi na mbi, atene:

⁴“Mo mu kamba ti ndö ti bongo so mo vo si mo kanga na ngbonda ti mo so, mo gue na ngu ti Fara. Kâ, fade mo yeke honde ni na ya ti du ti têne.”

⁵Mbi gue, mbi honde kamba ti ndö ti bongo ni na Fara alingbi na yanga so KOTA GBIA amu na mbi.

⁶Aninga na pekoni, KOTA GBIA atene na mbi: “Gue na Fara, mo mu kamba ti ndö ti bongo so lani mbi mu yanga na mo ti honde ni kâ so.”

⁷Mbi kiri mbi gue na Fara, mbi gi kamba ti ndö ti bongo ni, mbi mu ni na ndo so lani mbi honde ni daa. Me mbi baa so kamba ni afun kue, mbeni ye ti sara na ni ayeke daa pepe.

⁸Tongaso, tënë ti KOTA GBIA asi na mbi, atene:

⁹“Tënë so KOTA GBIA atene ayeke so: Gi tongaso laa mbi yeke buba baba ti azo ti Juda, na kota baba ti azo ti Jérusalem.

¹⁰Ala yeke mara ti asioni zo so ake ti ma tënë ti mbi. Ala ngba ti sara gi ye so be ti ala afa na ala; ala mu peko ti anzapa nde ti sara na ala, ti kuku ti kpo li ti ala na sese na dawa ti ala. Ayeke nzoni ala ga tongana kamba ti ndö ti bongo so mbeni ye ti sara na ni ayeke daa pepe!

¹¹Tongana ti so zo akanga kamba ti ndö ti bongo na ngbonda ti lo, mbi kanga lani azo ti Israel na azo ti Juda na tere ti mbi titene ala duti azo ti mbi, azo ti mungo iri ti mbi na nduzu, azo ti gondango mbi nga na aye ti pendere ti mbi. Me ala ye ti ma mbi pepe; so tënë ti yanga ti KOTA GBIA laa.”

¹²“Fade mo yeke tene na azo ni, mo tene: ‘Tënë so KOTA GBIA, Nzapa ti Israel atene ayeke so: A yeke zia vin na ya ti kangu asi’. Tongana azo ni akiri tënë: ‘Taa-tënë, e hinga ni kue’,

¹³fade mo yeke tene na ala: ‘Tënë so KOTA GBIA atene ayeke so: Mbi yeke mu vin na azo ti kodro ni, na agbia, *ahale ti David so aduti na ndö ti mbata ti lo ti gbia so; mbi yeke mu nga ni na awayango-sandaga, awayanga-Nzapa nga na azo ti Jérusalem kue titene ala nyon, ahon ndö ti ala.

¹⁴Mbi yeke pika ala na tere ti tere titene ya ti ala akungbi, mbi yeke pika ababâ na amolenge na tere ti tere; so tënë ti yanga ti KOTA GBIA laa. Mbi yeke zia zo oko pepe, mbi yeke sara nzoni be na zo oko pepe, mbi yeke baa mawa ti zo oko pepe. Mbeni ye oko ayeke kanga lege na mbi pepe ti fâ ala kue ti hunzi ala.’ ”

¹⁵Ala ma si! Ala dingi mê ti ala! Ala baa tere ti ala tongana akota zo pepe. *KOTA GBIA laa ayeke tene tënë so.

¹⁶Ala gonda KOTA GBIA, Nzapa ti ala kozo titene lo tokua vukongo ndo, kozo titene ala pika gere ti ala na li ti ahoto so ndo avuko daa. Ala yeke ku vurungo ndo, me KOTA GBIA asara si vurungo ndo ni aga ndo so avuko pitipiti; lo sara si aga vuko mbinda.

¹⁷Tongana ala ma tënë so pepe, mbi yeke toto na hondengo ni ndali ti baba ti ala so ahon ndö ni so. Ngu ti le ti mbi ayeke sua gbani gbani, ngbanga ti so a yeke gue na ataba ti KOTA GBIA na kodro wande.

¹⁸Tene na gbia nga na kota gbia-wali, mo tene: “Ala duti na sese! Biani, pendere kpoto ti ala ti gbia alondo na li ti ala ati awe.

¹⁹A kanga lege ti lingo na ya ti agbata ti mbage ti Mbongo awe; zo oko ti zingo ayanga ni ayeke daa pepe. A gbu azo ti Juda kue, a gue na ala na kodro wande; a gue na ala kue kue kue na kodro wande.”

²⁰“Jérusalem, yo le ti mo na nduzu, mo baa ndo: awato ti mo alondo na mbage ti Banga si ayeke ga Azo so lani a mu ala na mo titene mo bata ala so ayeke na ndo wa? Ataba so lani mo yeke pika kate ti mo ndali ti ala so ayeke na ndo wa?

²¹Azo so lani mo mu lege na ala ti ga akamarade ti mo so, na ndembe so ala yeke ga ti so na ndö ti mo, fade mo yeke tene nyen? Mo yeke baa pasi tongana wali na ndembe ti dungo ni.

²²Fade mo yeke hunda tere ti mo, mo tene: ‘Ye so asi na mbi tongaso ngbanga ti nyen?’ Biani, tongana a yo yanga ti bongo ti mo na nduzu, tongana a sara ngangu na mo, ayeke ndali ti so mo sara sioni ahon ndoni.

²³Zo ti Etiopii alingbi ti gbian poro ti tere ti lo? Ze alingbi ti zi anzoroko ti tere ti lo? Ala so sarango sioni aga ye ti tere ti ala so, ala lingbi ti sara nzoni ye?

²⁴Mbi yeke kangbi ala kirikiri tongana pere so pupu ti benyama amu ahon na ni.

²⁵Jérusalem, ye so ayeke ku mo laa, ye so mbi bata ndali ti mo laa. Biani, mo girisa mbi awe ti zia be ti mo na anzapa ti mvene; so tënë ti yanga ti KOTA GBIA laa.

²⁶Mbi nga, mbi yeke yo yanga ti bongo ti mo na nduzu, ngbii asi na le ti mo si azo ayeke baa tere ti mo so angba ndumbu so.

²⁷Asarango ye ti ndumba ti mo, totongo ti mo tongana ti mbarata so ayeke toto na peko ti wali-mbarata so, asarango ye ti ndumba ti mo na li ti ahoto, nga na ya ti ayaka ayeke mu kamene na zo! Mbi baa afungo nzapa ti mo so kue! So ye ti mawa ti nyen, Jérusalem! Mo ye ti ga *nzoni pepe! Mo yeke ngba ti sara ye tongaso ngbii asi lawa?”