Read La Bible en Sango courant – Mbeti ti Nzapa Jérémie 18 Bible Online

Jérémie 18 - La Bible en Sango courant – Mbeti ti Nzapa bible

Jérémie 18

¹Tënë ti *KOTA GBIA asi na Jérémie atene:

²“Londo mo gue na ndo ti wasarango-ta. Kâ, fade mbi yeke tene na mo atënë ti mbi.”

³Mbi mu lege, mbi gue na ndo ti wasarango-ta. So mbi si kâ, lo ngba ti sara mbeni ta na ndö ti tur ti lo.

⁴Tongana ta so lo yeke leke abuba na ya ti maboko ti lo — ye so ayeke si ka laa — lo yeke leke mbeni ta nde tongana ti so lo baa nzoni na le ti lo.

⁵Tongaso, tënë ti KOTA GBIA asi na mbi atene:

⁶“Ala azo ti Israel, ye so wasarango-ta ayeke sara na ta ti lo so, mbi lingbi ti sara na ala tongaso pepe? So tënë ti yanga ti KOTA GBIA laa. Ala azo ti Israel, ala yeke na ya ti maboko ti mbi tongana ti so sese ti sarango na ta ayeke na ya ti maboko ti wasarango-ta.

⁷Mbeni lâ, mbi tene tënë ti mbeni mara wala ti mbeni kodro-gbia, mbi tene: Fade a yeke gboto ala tongana ti so a yeke gboto pere na gunda ni kue; a yeke de ala na sese si a yeke buba ala biani biani.

⁸Me tongana azo ti mara ni azia lege ti sioni so ala sara si azia ngonzo na be ti mbi so, sioni ye so mbi leke na be ti mbi ti sara na ala, mbi yeke zia lege ni.

⁹Mbeni lâ, mbi tene tënë ti mbeni mara wala ti mbeni kodro-gbia, mbi tene: Fade a yeke leke ni na nduzu si a kiri a lu ni tongana keke.

¹⁰Me tongana azo ti mara ni ake yanga ti mbi si ala sara ye so ayeke sioni na le ti mbi, nzoni ye so mbi leke na be ti mbi ti sara na ala, mbi yeke zia lege ni.

¹¹“Fadeso, ayeke nzoni mo tene na azo ti Juda na ala so ayeke lango na Jérusalem, mo tene: ‘Tënë so KOTA GBIA atene ayeke so: Mbi yeke leke na be ti mbi mbeni ye ti sara na ala, mbi yeke leke mbeni sioni kpale na tere ti ala. Ayeke nzoni zo oko oko azia sioni lege ti sarango ye ti lo. Ala sara si lege ti dutingo ti ala na sarango ye ti ala akiri aga nzoni!’ ”

¹²Me ala tene: “Ngbanga ti e ayeke daa pepe! E yeke ngba ti sara ye so aga na li ti e. Zo oko oko ayeke ngba ti sara sioni ye so be ti lo afa na lo.”

¹³Tongaso, tënë so *KOTA GBIA atene ayeke so: “Ala hunda ndo na popo ti amara nde: zo wa laa ama mara ti tënë tongaso na mê ti lo laoko, zo wa? Maseka-wali Israel asara kota ye ti buba.

¹⁴Ngu so alondo na ya ti *neze ti Liban, na ngu so asigigi na ya ti têne si ayeke sua na ya ti ngonda, laoko azo ado ni azia? Pendere ngu ti de so alondo yongoro si ayeke sua so, laoko ala baa ni ahole?

¹⁵Me be ti azo ti mbi agirisa na mbi awe! Ala zö dukani na anzapa so ayeke taa Nzapa pepe. Na ndö ti alege so ala yeke hon daa, anzapa ni asara si ala ti. Lege so ando ala mu ni, anzapa ni ague na ala na mbeni lege nde; ambeni lege so azo ade asuru ni pepe.

¹⁶Ala sara si kodro ti ala aga ngonda, aga ye so azo ayeke huru yanga ti ala kpu na kpu na bango ni. Azo so kue ayeke hon na tere ni, li ti ala ayeke kpe si ala yingi li ti ala.

¹⁷Fade mbi yeke sara si azo ti mbi akangbi kirikiri na le ti awato ti ala tongana ti so pupu ti To ayeke mu ye ahon na ni kirikiri. Na lango so ye ayeke ga ngangu na ala, fade mbi yeke zia peko ti mbi na ala, mbi yeke baa ndo na mbage ti ala pepe.”

¹⁸Tongaso azo ni atene: “Ala ga, e leke tënë na tere ti Jérémie. Awayango-sandaga ayeke daa, fade ala yeke ngba ti fa na e atënë ti ndia. Azo ti ndara ayeke daa, fade ala yeke mu na e awango senge. Awayanga-Nzapa atia pepe, fade ala yeke tene na e peko ti atënë ti yanga ti Nzapa senge. Ala ga, e tene asioni tënë ti buba iri ti Jérémie. Atënë so asigigi na yanga ti lo so, e dingi mê ti e ti ma ni oko pepe.”

¹⁹KOTA GBIA, dingi mê ti mo, mo ma tënë ti mbi; ma tënë so awato ti mbi atene na tere ti mbi so.

²⁰Zo ayeke kiri sioni ndali ti nzoni? Awato ti mbi ni asara kuku ti gbu na mbi. KOTA GBIA, mo dabe ti mo so mbi laa mbi luti na le ti mo ti tene na mo nzoni tënë ndali ti ala titene mo zia ti sara ngonzo na tere ti ala.

²¹Ndani laa, mo zia amolenge ti ala akui na nzara. Mo sara si ala wani akui na lege ti yongoro zeme. Ayeke nzoni awali ti ala aga awali-mua si amolenge ti ala akui. Ayeke nzoni kuâ amu akoli ti ala si amaseka-koli ti ala akui na ya ti bira.

²²Ndali ti so ala sara kuku ti gbu na mbi si ala honde mbeni kamba titene agbu gere ti mbi, ayeke nzoni dekongo ti ala alondo na ya ti ada ti ala asigigi, na ndembe so mo yeke tokua awato ti ga na ndö ti ala gi hio tongaso.

²³Mo KOTA GBIA, mo hinga apialo so kue ala leke na tere ti mbi ti fâ mbi. Mo zi sioni na li ti ala pepe, sara si siokpari ti ala ahon na le ti mo pepe. Ayeke nzoni ala ti na sese na dawa ti mo. Na ndembe ti ngonzo ti mo, mo sara sana na ala.