Read La Bible en Sango courant – Mbeti ti Nzapa Jérémie 19 Bible Online

Jérémie 19 - La Bible en Sango courant – Mbeti ti Nzapa bible

Jérémie 19

¹Tënë so *KOTA GBIA atene ayeke so: “Gue na ndo ti wasarango-ta, mo vo ta ti sese. Mo mu na tere ti mo ambeni *kangba na popo ti azo ti kodro nga na ambeni kangba na popo ti awayango-sandaga.

²Na pekoni, mo sigigi na yanga ti gbagba ti gbata so iri ni ti Fango-ta. Yanga ti gbagba ni ayeke baa ndo na mbage ti popo-hoto ti Hinom. Kâ, fade mo yeke to mbela na tënë so mbi yeke tene na mo.

³Fade mo yeke tene: Agbia ti Juda na azo so ayeke lango na Jérusalem, ala ma tënë ti KOTA GBIA si! Tënë so KOTA GBIA so ayeke na ndö ti dunia kue, Nzapa ti Israel atene ayeke so: Fade mbi yeke sara si mbeni kota kpale ati na ndo so. Azo so kue ayeke ma tënë ni, fade ayeke toto na mê ti ala tongana sungbango ti bekpa.

⁴Biani, azo ti Juda ado mbi, azia awe; ala buba ndo so kue awe, zo alingbi ti hinga ni mbeni pepe: na ndo ni so, ala zö dukani na ambeni nzapa nde. Ataa ala wani, ataa akotara ti ala, ataa agbia ti Juda ahinga anzapa ni so kozoni pepe. Ala sara si ndo ni asi singo na mene ti azo so tënë ayeke na li ti ala pepe.

⁵Ala leke mbeni ndo na li ti hoto ndali ti *Baal. Kâ, ala yeke gbi amolenge ti ala na wâ ti mu na *sandaga. Andaa, so ayeke mbeni ye so mbi mu yanga laoko pepe titene ala sara ni, mbi tene tënë tongaso oko pepe, mbeni tënë tongaso aga na li ti mbi laoko pepe.

⁶“Ndani laa, mbeni lango ayeke ga so fade azo ayeke kiri ti di iri ti ndo so pepe, atene: ‘Tofet’ wala ‘Popo-hoto ti Hinom’, me fade azo ayeke tene: ‘Popo-hoto ti fango zo’; so tënë ti yanga ti KOTA GBIA laa.

⁷Na ndo so, fade mbi yeke sara si poroso ti azo ti Juda na ti Jérusalem aga senge senge ye. Mbi yeke sara si ala ti na gbe ti awato ti ala si awato ni afâ ala na ya ti bira, awato ti ala ni ayeke baa mawa ti ala oko pepe. Mbi yeke sara si kuâ ti ala aga kobe ndali ti andeke ti nduzu na anyama ti sese.

⁸Mbi yeke sara si gbata so aga ye ti dongo be na ye so azo ayeke huru yanga ti ala na bango ni. Azo so kue ayeke hon na tere ni, fade li ti ala ayeke kpe si ala yeke huru yanga ti ala ndali ti akota kpale so asi na gbata ni.

⁹Mbi yeke sara si awato ti ala na azo so ayeke baa mawa ti ala pepe, angoro gbata ni na bira. Ala yeke sara titene gbata ni ati na ya ti kota pasi. Tongaso, ala azo ti mbi, fade ala yeke te kasa ti tere ti amolenge ti ala wani; zo oko oko ayeke te kasa ti tere ti mba ti lo.

¹⁰“Na pekoni, fade mo yeke bo ya ti ta ni na sese na le ti azo so amu peko ti mo;

¹¹mo yeke tene na ala: Tënë so KOTA GBIA so ayeke na ndö ti dunia kue atene ayeke so: Tongana ti so a yeke fâ ya ti ta si alingbi ti kiri ti leke ni mbeni pepe, gi tongaso laa mbi yeke sara na azo ti gbata ni nga na gbata ni kue. “Ala yeke lu ande akuâ kâ na Tofet, ngbanga ti so mbeni ndo nde ti lungo akuâ ayeke daa pepe.

¹²Ye so mbi yeke sara na ndo ni so, gi ni laa mbi yeke sara na gbata so nga na azo ti gbata ni; so tënë ti yanga ti KOTA GBIA laa. Mbi yeke sara si gbata ni aga tongana Tofet.

¹³Mbi yeke sara si ada ti azo ti Jérusalem na ada ti agbia ti Juda aga *sioni tongana ndo so ayeke na Tofet. Biani, na li ti ada so kue, azo azö dukani ndali ti gba ti atongoro, ala tuku samba ti mu na sandaga na anzapa nde.”

¹⁴Jérémie alondo na Tofet, ndo so KOTA GBIA atokua fade lo daa ti tene peko ti tënë ti yanga ti lo si lo kiri. So lo kiri awe, lo luti na ya ti gbagba ti kota da ti Nzapa si lo tene na azo ti kodro kue, lo tene:

¹⁵“Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Akpale so kue mbi tene tënë ni so, fade mbi yeke sara si ati na ndö ti gbata so nga na ndö ti akete kodro so kue ayeke na tere ni. Biani, azo ti gbata ni asara ngangu li si ala ke ti ma tënë ti mbi.’ ”