Read La Bible en Sango courant – Mbeti ti Nzapa Jérémie 2 Bible Online

Jérémie 2 - La Bible en Sango courant – Mbeti ti Nzapa bible

Jérémie 2

¹Tënë ti *KOTA GBIA asi na mbi, atene:

²“Gue mo to mbela na tënë so na mê ti azo ti Jérusalem, mo tene: Tënë so KOTA GBIA atene ayeke so: ‘Mbi dabe ti mbi na be ti mo so mo mu na mbi na ndembe so mo de maseka. Mo ye mbi ando tongana wali so amu koli fini fini. Mo yeke mu peko ti mbi na benyama, ndo so kâ zo alingbi ti lu ye daa pepe.

³Israel, mo yeke ando ye so a bata nde gi ndali ti KOTA GBIA. Mo yeke tongana akozo le ti kobe so ayeke ti lo; tongana ambeni zo ate ni, ala yeke wara tënë: sioni ye ayeke wara ala.’ So tënë ti yanga ti KOTA GBIA laa.”

⁴Ala, *ahale ti Jacob na ala, akete mara kue ti Israel, ala ma tënë so KOTA GBIA atene.

⁵Tënë so *KOTA GBIA atene ayeke so: “Lawa laa akotara ti ala abaa mbeni ye ti kirikiri so mbi sara si ala hon yongoro na tere ti mbi so? Ala gue na peko ti asenge senge ye si ala nga, ala ga asenge senge ye.

⁶Ala hunda tere ti ala pepe, atene: ‘KOTA GBIA ayeke na ndo wa? Lo so asara si e sigigi na kodro ti Ezipte si lo fa lege na e na ya ti benyama so? Benyama ni ayeke gi ndo ti gba ti mbutu na adu; ndo so ahole kasakasa, ndo so avuko pitipiti, ndo so zo ayeke hon daa pepe, ndo so zo ayeke lango daa pepe.’

⁷Mbi sara si ala li na ya ti kodro so kobe ayeke du daa gbani gbani titene ala te anzerengo le ti kobe ni si ala wara anzoni ye ti kodro ni. Me so ala li na ya ti kodro ti mbi ni, ala sara si aga *sioni. Ala sara si ye so ayeke ti mbi aga ye ti sioni so zo alingbi ti baa na le fani use pepe.

⁸Awayango-sandaga ahunda ndo pepe, atene: ‘KOTA GBIA ayeke na ndo wa?’ Azo so ahinga nda ti *Ndia ahinga mbi pepe. Azo ti li ti kodro ake mbi awe; awayanga-Nzapa ayeke tene peko ti tënë ti yanga ti Baal si ala mu peko ti aye so alingbi ti sara mbeni ye oko pepe.

⁹Ndani laa, mbi yeke gue na ala na gbe ti ngbanga; mbi yeke gue nga na *ahale ti ala na gbe ti ngbanga; so tënë ti yanga ti KOTA GBIA laa.”

¹⁰“Ala gue na zoa ti Kitim, ala baa ye si! Ala tokua azo na Kedar titene ala hunda ndo mbirimbiri si! Tongaso si ala baa wala mbeni ye tongana ti so asi kâ awe.

¹¹Laoko ala baa mbeni mara so azia anzapa ti lo ti mu ambeni nde? Ataa so ala yeke anzapa pepe! Me azo ti mbi azia mbi, mbi so mbi yeke nengo ti ala, ala mu peko ti ye so alingbi ti sara mbeni ye oko pepe.

¹²Ndali ni, ala so ayeke lango na yayu, ayeke nzoni li ti ala akpe; ala do na kota mbeto si ala duti na mawa! So tënë ti yanga ti KOTA GBIA laa.

¹³Azo ti mbi asara asioni ye use: ala do mbi azia, mbi so mbi yeke li ti ngu so ayeke mu fini na zo; ala gue ti zi du ti ngu ndali ti ala wani; andaa du ti ngu ni akoro korongo; du ni alingbi ti bata ngu pepe.”

¹⁴“Israel ayeke ngbaa? A du lo ngbaa? Ndani nyen si lo ga tongana ngbaa so azo agbu lo na peko ti bira?

¹⁵Abamara atoto na ndö ti lo awe; ala toto ngangu. Azo asara si kodro ti lo aga ngonda; ala gbi agbata ti lo, zo ayeke daa mbeni pepe.

¹⁶Ataa azo ti gbata ti Manfis na ti Tapanes asuru ya ti kangu ti li ti mo.

¹⁷Ye so kue asi na mo gi ndali ti mo wani pepe? Ye ni asi ndali ti so mo zia KOTA GBIA, Nzapa ti mo na ndembe so lo yeke fa lege na mo.

¹⁸Fadeso, nyen laa ayeke gboto mo ti gue na mo na Ezipte titene mo nyon ngu ti Nil so nyen? Nyen laa anzere na mo na mungo lege ti gue na Asirii titene mo nyon ngu ti Efrate so nyen?

¹⁹Fade sioni ti mo wani ayeke kiri na li ti mo. Mo zia mbi awe; fade mo yeke wara ye ti peko ni! Tongaso si mo hinga, mo tene, ziango KOTA GBIA Nzapa ti mo, ayeke sioni si ayeke ye ti vundu mingi; tongana mo kpe mbeto ti mbi pepe, so ayeke ye ti vundu mingi!” So tënë ti yanga ti KOTA GBIA so ayeke na ndö ti dunia kue laa.

²⁰*KOTA GBIA atene: “Mo mara ti Israel, ngu na ngu, kpu na kpu, mo ke ti duti na gbe ti komandema ti mbi; mo fâ ya ti ye so abongbi mbi na mo. Mo tene: ‘Mbi ye ti sara kua ti ngbaa mbeni pepe’. Me na ndö ti akete hoto kue, na gbe ti afini keke so kue kugbe ni ayeke gbani gbani, mo lango na sese ti sara ye ti ndumba.

²¹Mbi lu mo ando tongana pendere keke ti vinye, tongana kete keke so apendere mingi. Ye ni asara tongana nyen laa mo kiri mo ga sioni vinye so zo ahinga li ti lo na ni pepe?

²²Ataa mo sukula tere ti mo na ngangu mokpakpa wa, ataa mo mu gba ti savon ti sukula na tere ti mo, sioni ti mo ayeke ngba na le ti mbi tongana mbeni sioni nzoroko. So tënë ti yanga ti Kota Gbia NZAPA laa.

²³Ye ni asara tongana nyen laa mo tene: ‘Mbeni sioni ye andu tere ti mbi oko pepe; mbi voro anzapa *Baal pepe’ so? Gue mo baa gi peko ti agere ti mo kâ na popo-hoto! Ayeke nzoni mo hinga ye so mo sara. Mo yeke tongana mama ti *zambala so akpe ge, akpe kâ.

²⁴Mo yeke tongana mama ti lele ti ngonda so aye gi ya ti benyama. Tongana nzara ti koli agbu lo, lo yeke gboto pupu na mbage kue; zo wa laa alingbi ti kanga lege na nzara ti lo? Akoli-zambala so kue ayeke gi lo alingbi ti woko pepe; ala yeke wara lo tongana nze ti lo alingbi awe.

²⁵‘Israel, mo sara hange! Tongana mo kpe loro tongaso, fade gbe ti poro ti mo ayeke te kue; lege ti go ti mo ayeke hole kasakasa.’ Me mo kiri tënë, mo tene: ‘Mo zia mbi na tënë ti mo so! Mbi ye gi anzapa ti awande, mbi yeke ngba ti kpe na peko ti ala’.

²⁶Legeoko tongana zo ti nzi so kamene ayeke sara lo na ndembe so a gbu lo, fade kamene ayeke sara azo ti Israel, ala na agbia ti ala, na akota zo ti kodro ti ala, na awayango-sandaga na awayanga-Nzapa ti ala.”

²⁷“Ala yeke tene na keke: ‘Mo laa mo yeke babâ ti mbi!’ Ala yeke tene nga na têne: ‘Mo laa mo du mbi!’ Titene ala zia le ti ala na mbage ti mbi, ala zia gi peko ti ala na mbi! Me tongana ye ti ngangu asi na ala awe, ala yeke londo ti iri mbi, atene: ‘Ga mo soo e maa!’

²⁸Fade mbi yeke kiri tënë na ala, mbi tene: ‘Anzapa ti ala so ala leke ala so ayeke na ndo wa? Tongana ye ti ngangu asi na ala, ayeke nzoni anzapa ni aga asoo ala ma! Biani, ala azo ti Juda, ala yeke na anzapa gbani gbani alingbi na wungo ti agbata ti ala.’

²⁹“Ngbanga ti nyen si ala ye ti bi tënë na li ti mbi? Ala kue, ala ke mbi awe. So tënë ti yanga ti KOTA GBIA laa.

³⁰Mbi pika ala gbaa; li ti ala aga daa oko pepe. Ala wani afâ awayanga-Nzapa ti ala na yongoro zeme tongana ti so bamara ayeke suru ya ti nyama.

³¹— Ala, azo ti fadeso, ala ma tënë ti KOTA GBIA mbirimbiri! — Ala, azo ti Israel, mbi ga tongana benyama ndali ti ala? Wala kodro so ndo avuko daa pitipiti? Ala, azo ti mbi, ndani nyen si ala yeke tene: ‘E yeke gue na ndo so be ti e aye, e yeke kiri na mo mbeni pepe’ so?

³²Maseka-wali alingbi ti girisa aye ti pendere ti lo? Wali so ayeke ku ti mu koli alingbi ti girisa bongo ti matanga ti mungo tere ni? Oko pepe! Me azo ti mbi agirisa mbi lango mingi, zo alingbi ti diko wungo ni pepe.”

³³“Mo hinga kode ti tumbango peko ti andeko! Ti si na nda ti ye ti mo ni, mo gue daa ngbii ti sara sioni ahon ndoni si aga ye ti tere ti mo.

³⁴Na tere ti bongo ti mo, gi mene ti azo ti mawa na ti azo so tënë ayeke na li ti ala pepe. Andaa laoko mo wara ala na fango yanga ti da ti mo pepe!

³⁵Me na ndö ni kue, mo tene: ‘Ên-en, tënë oko ayeke na li ti mbi pepe. Ngonzo ti Nzapa ayeke hon yongoro na tere ti mbi senge.’ Me ndali ti so mo tene, mo sara ye ti sioni pepe, mbi yeke gue na mo na ngbanga.”

³⁶“Mo yeke sanze akode mingi, andaa mo laa mo yeke bi tere ti mo na sese! Me fade Ezipte ayeke zia kamene na le ti mo tongana ti so Asirii azia nga kamene na le ti mo so.

³⁷Fade mo yeke londo kâ ti kiri, li ti mo aba na sese, ngbanga ti so KOTA GBIA ake azo so mo mu tere ti mo na ala so. So nzoni lege titene mo bata tere ti mo laa pepe.”