Read La Bible en Sango courant – Mbeti ti Nzapa Jérémie 20 Bible Online

Jérémie 20 - La Bible en Sango courant – Mbeti ti Nzapa bible

Jérémie 20

¹Pashehur, molenge ti Imer, wayango-sandaga so ayeke makonzi ti ya ti kota da ti Nzapa, lo ma atënë ti peko ti yanga ti *KOTA GBIA so kue Jérémie atene.

²Tongaso, lo pika mê ti wayanga-Nzapa Jérémie si lo mu yanga titene a kanga lo na ya ti olongbo so ayeke na yanga ti kota da ti Nzapa, ti mbage ti nduzu so iri ni ti Benjamin, ndo so azo ayeke hon daa ti li na ya ti kota da ti KOTA GBIA.

³Na ndade ni, Pashehur azi Jérémie na ya ti olongbo ni. Jérémie atene na lo: “KOTA GBIA ayeke kiri ti iri mo Pashehur pepe, me lo yeke iri mo ‘Mbeto-mbage-na-mbage-kue’.

⁴Biani, tënë so KOTA GBIA atene ayeke so: ‘Mbi yeke sara si mo ga zo ti ziango mbeto na be ti mo wani nga na be ti amba ti mo so mo na ala aye tere mingi. Amba ti mo ni ayeke kui kuâ ti yongoro zeme na maboko ti awato ti ala. Ti mo, mo yeke luti ande ti baa ye ni na le ti mo. Mbi yeke sara si azo ti Juda kue ati na maboko ti gbia ti Babilone; lo yeke gbu ala ti gue na ala na Babilone si lo yeke fâ ala na yongoro zeme.

⁵Amosoro ti gbata ni kue, aye ti peko ti kua ti azo ti gbata ni, aye ti ala ti ngangu ngere nga na amosoro kue ti agbia ti Juda, mbi yeke zia ni na maboko ti awato ti ala. Awato ni ayeke nzi aye ni si ala yeke ro ti gue na ni na Babilone.

⁶Ti mo Pashehur, mo na azo ti da ti mo kue, fade a yeke gbu ala ti gue na ala na Babilone. Mo yeke kui kâ si a yeke lu mo kâ, mo na amba ti mo so kue mo mu tënë ti mvene ti tene peko ti yanga ti Nzapa na ala so.’ ”

⁷*KOTA GBIA, mo handa mbi si mbi ti na ya ti handa ni. Mo gbu mbi na ngangu, mo hon ndö ti mbi awe. Lakue mbi ga buba na le ti azo; azo kue ayeke he mbi.

⁸Lakue, tongana mbi yeke tene tënë, alingbi mbi dekongo ti iri azo ti soo mbi, mbi tene: “Fango zo-oo, bubango ye-oo!” Ndali ti tënë ti KOTA GBIA, azo ayeke zonga mbi lakue si ala yeke he mbi na ngia lakue.

⁹Tongana mbi tene: “Awe! Mbi yeke kiri ti di iri ti lo na yanga ti mbi pepe, mbi yeke kiri ti fa tënë na iri ti lo pepe”; na ya ti be ti mbi kâ, tënë ni ayeke gbi tongana wâ. Mbi yeke sara ngangu ti mingo ni, me mbi ha gbaa.

¹⁰Mbi yeke ma gi sioni tënë ti gba ti azo. Ala yeke di iri ti mbi: “Mbeto-mbage-na-mbage-kue”. Ambeni ayeke tene: “Ala gue na lo na ngbanga ma!” Ambeni ayeke tene ti ala: “Een, e yeke gue na lo!” Ataa amba ti mbi so mbi na ala e ye tere mingi, ala yeke ku ti baa wala mbi yeke girisa lege. Ala yeke tene na be ti ala, atene: “Tongana lo ti fade na ya ti handa ti lo wani, ka anzere mingi. Tongaso si fade e gbu lo si e kiri na lo peko ti sioni so lo sara na e”.

¹¹Me KOTA GBIA ayeke na mbi, lo yeke ngangu zo ti tiringo bira ndali ti mbi. Ndani laa, fade azo ti sarango ngangu na mbi ayeke ti; ala yeke sara ye oko na mbi pepe. Kamene ayeke hon ndö ti ala lakue lakue, ngbanga ti so ye ni akara ala; zo ayeke girisa tënë ni pepe.

¹²KOTA GBIA so ayeke na ndö ti dunia kue, mo laa mo hinga zo so ayeke mbirimbiri, mo laa mo hinga atënë ti be ti zo na agbungo li ti lo. Sara si mbi baa lege so mo kiri na awato ti mbi peko ti sioni so ala sara na mbi, ngbanga ti so mbi zia tënë ti mbi na maboko ti mo awe.

¹³Ala he bia ndali ti KOTA GBIA! Ala he bia ti sepela na lo! Lo laa lo yeke zi zo ti mawa na maboko ti azo ti sioni.

¹⁴Deba aga na ndö ti lango ti dungo mbi! Ayeke nzoni a sara tufa pepe na ndö ti lango so mama ti mbi adu na mbi!

¹⁵Deba aga na ndö ti zo so amu tënë ni si atene na babâ ti mbi, atene: “A du molenge-koli na mo!” Zo ni laa asara si be ti babâ ti mbi asi singo na ngia!

¹⁶Ayeke nzoni zo so aga tongana agbata so KOTA GBIA abuba ni si lo baa mawa ni pepe so! Ayeke nzoni na ndaperere, zo ni ama toto ti demango tere si na bekombite, lo ma dekongo ti bira!

¹⁷Lo zia mbi fade mbi kui na ngoi so mbi de na ya ti mama ti mbi pepe? Tongana mama ti mbi aga fade du ti kuâ ti mbi, ka lo yeke bata ngo ti mbi lakue lakue.

¹⁸Ndani nyen si mbi sigigi na ya ti mama ti mbi si mbi yeke baa pasi na mawa tongaso? Gigi ti mbi ayeke hunzi na ya ti aye ti kamene lakue tongaso?