Read La Bible en Sango courant – Mbeti ti Nzapa Jérémie 21 Bible Online

Jérémie 21 - La Bible en Sango courant – Mbeti ti Nzapa bible

Jérémie 21

¹Tënë ti *KOTA GBIA asi na Jérémie na ngoi so gbia Sedesias atokua Pashehur, molenge ti Malkia, lo na wayango-sandaga Sefania ti gue ti tene na Jérémie, atene:

²“E gbu gere ti mo, mo hunda KOTA GBIA na tënë ti e! Baa, gbia Nabukodonosor ti Babilone alondo na bira na tere ti e; e hinga pepe, fade KOTA GBIA ayeke sara mbeni oko ti aye ti kpene ti lo ndali ti e, tongaso si gbia Nabukodonosor azia peko ti e.”

³Jérémie akiri tënë na azo ni, atene: “Ala gue, atene na gbia Sedesias, atene:

⁴Tënë so KOTA GBIA, Nzapa ti Israel atene ayeke so: ‘Aye ti bira so ala yeke mu ti tiri na gbia ti Babilone nga na aturugu ti lo so ayeke na gigi ti gbagba ni so, fade mbi yeke sara si aye ti bira ni aturne, atuku kue na be ti gbata ni.

⁵Mbi wani laa mbi yeke tiri na ala, azo ti Juda, na lege ti maboko ti mbi so mbi yoro, na lege ti ngangu ti maboko ti mbi. Mbi yeke tiri na ala na lege ti ngonzo ti mbi, ngonzo ti mbi ti wâ nga na kota ngonzo ti mbi.

⁶Fade mbi yeke fâ azo ti gbata so, ala na anyama ti ala kue; ala yeke kui kuâ ti sioni kobela ti bubango kodro.

⁷Na pekoni, mbi yeke zia Sedesias, gbia ti Juda, lo na azo ti gbe ti lo, na maboko ti gbia ti Babilone. Mbi yeke zia nga na maboko ti gbia ni azo ti gbata ni, ala so angba na fini na peko ti sioni kobela ti bubango kodro, ala so angba na fini na peko ti bira na kota nzara. Biani, fade mbi yeke zia azo ni na maboko ti awato ti ala nga na maboko ti azo so aye gi kuâ ti ala. Gbia Nabukodonosor ayeke fâ azo ni kue, lo yeke zia zo oko pepe, lo yeke baa mawa ti zo oko pepe, lo yeke hinga zo oko pepe; so tënë ti yanga ti KOTA GBIA laa.’ ”

⁸Ti azo so angba na ya ti gbata ni, fade mo yeke tene na ala: “Tënë so KOTA GBIA atene ayeke so: Mbi zia na dawa ti ala lege ti dutingo na fini nga na lege ti kuâ.

⁹Zo so ayeke ngba na ya ti gbata so, fade lo yeke kui na lege ti bira, ti kota nzara na ti sioni kobela ti bubango kodro. Me zo so ayeke sigigi na ya ti gbata ni ti zia tere ti lo na maboko ti aturugu ti Babilone, zo ni ayeke soo fini ti lo; ye so ayeke ngba na lo ayeke gi fini ti lo.

¹⁰So tënë ti yanga ti KOTA GBIA laa: Mbi wani, mbi yeke kiri na ndö ti gbata so ti sara sioni na ni, me nzoni pepe. Fade a yeke zia gbata ni na maboko ti gbia ti Babilone, lo yeke bi wâ daa.”

¹¹So ayeke tënë ndali ti asewa ti gbia ti Juda. “Ala ma tënë ti *KOTA GBIA si,

¹²ala asewa ti David! Tënë so KOTA GBIA atene ayeke so: Lakue na ndaperere, ayeke nzoni ala fâ ngbanga mbirimbiri. Azo so ayeke te amba ti ala na mbana so, ala zi azo ni na maboko ti ala. Tongaso pepe, fade ngonzo ti mbi ayeke londo tongana wâ so ayeke gbi ye kue; zo alingbi ti mingo ni pepe. So ayeke futa ti asioni sarango ye ti ala laa.

¹³Ala so ayeke lango na popo-hoto, na ndö ti kota têne so ayeke kpangbara so, mbi na ala, e yeke baa ya ni; so tënë ti yanga ti KOTA GBIA laa. Biani, mbi yeke ga na tere ti ala, ala so ayeke tene: ‘Zo wa laa ayeke zu ti ga na tere ti e, zo wa? Zo wa laa ayeke li na ndo so e yeke duti daa so, zo wa?’

¹⁴Mbi yeke ga na tere ti ala; so futa ti asioni sarango ye ti ala laa; so tënë ti yanga ti KOTA GBIA laa. Fade mbi yeke bi wâ na ya ti gbako ti ala, wâ ni ayeke gbi aye so kue angoro gbako ni.”