Read La Bible en Sango courant – Mbeti ti Nzapa Jérémie 39 Bible Online

Jérémie 39 - La Bible en Sango courant – Mbeti ti Nzapa bible

Jérémie 39

¹Na nze baleoko ni ti ngu gumbaya ni so Sedesias ayeke le-gbia, Nabukodonosor, gbia ti Babilone, lo na aturugu ti lo kue aga angoro gbata ti Jérusalem ti mu ni na bira.

²Na lango gumbaya ti nze osio ni ti ngu baleoko na oko ni, azo ti Babilone akoro mbeni du na ya ti gbagba ti gbata ni.

³Tongaso aturugu ti kota kamba kue ti gbia ti Babilone ali na ya ti gbata ni si ala duti na yanga ti gbagba so iri ni Ti-be-gbagba. Azo so aduti na ndo so ayeke Nergal-Sareser, kota komanda ti aturugu, lo na Samgar-Nebo, na Sar-Sekim, makonzi ti azo ti kua ti gbia, ala na tanga ti aturugu ti kota kamba kue ti gbia ti Babilone.

⁴Gi so Sedesias, gbia ti Juda, na aturugu ti lo kue abaa azo ni, ala kpe ahon. Ala sigigi na ya ti gbata ti Jérusalem na bi; ala mu lege so ahon na ya ti kete yaka ti gbia nga na yanga ti gbagba so ayeke na popo ti agbagba use. Na pekoni, ala mu lege so ague na popo-hoto ti Jourdain.

⁵Me aturugu ti Babilone atumba peko ti ala si ala wara Sedesias na lando ti Jéricho. Aturugu ni agbu lo si ague na lo na Nabukodonosor, gbia ti Babilone na gbata ti Ribla, na sese ti Hamat. Kâ laa Nabukodonosor afâ ngbanga na li ti lo.

⁶Na Ribla, gbia ti Babilone afâ go ti amolenge ti Sedesias taa na le ti lo; lo fâ nga go ti akota zo ti Juda kue.

⁷Na pekoni, lo koro le ti Sedesias, lo kanga lo na azingiri use ti bengba wen ti gue na lo na Babilone.

⁸Na Jérusalem, azo ti Babilone abi wâ na yangbo ti gbia nga na ada ti asenge zo ti kodro ni. Ala kungbi nga na sese gbagba ti gbata ni.

⁹Na pekoni, Nebuzaradan, makonzi ti aturugu ti batango gbia agbu tanga ti azo so angba na ya ti gbata ni, ala na azo so lani azia tere ti ala na gbia ti Babilone nga na tanga ti azo so angba si lo gue na ala na Babilone.

¹⁰Me lo zia na ya ti kodro ti Juda ambeni wayere kete so ye ti ala oko ayeke daa pepe; lo mu na ala ayaka ti vinye na ayaka.

¹¹Nabukodonosor, gbia ti Babilone, amu lani yanga na Nebuzaradan, makonzi ti aturugu ti batango gbia, ndali ti Jérémie, lo tene:

¹²“Gue mo mu lo, mo baa ndo na tere ti lo; mo sara sioni na lo pepe, me mo sara na lo ye so kue lo yeke hunda na mo.”

¹³Nebuzaradan, makonzi ti aturugu ti batango gbia ama tere na Nebushazban, makonzi ti azo ti kua ti gbia, na Nergal-Sareser, kota komanda ti aturugu na tanga ti aturugu ti kota kamba kue ti gbia ti Babilone.

¹⁴Ala tokua azo ti gue ti mu Jérémie na ya ti gbagba ti aturugu ti batango gbia; ala zia lo na maboko ti Gedalia, molenge ti Ahikam, molenge ti Shafan. Gedalia amu yanga na Jérémie ti kiri na da ti lo. Tongaso Jérémie aduti na popo ti azo ti kodro ni.

¹⁵Na ndembe so Jérémie angba na kanga na ya ti gbagba ti aturugu ti batango gbia, tënë ti *KOTA GBIA asi na lo, atene:

¹⁶“Gue mo tene na Ebed-Melek, zo ti Etiopii so, mo tene: ‘Tënë so KOTA GBIA so ayeke na ndö ti dunia kue, Nzapa ti Israel atene ayeke so: Lani mbi tene tënë ti nzoni ti azo ti gbata so pepe, me mbi tene tënë ti sioni ye so ayeke si na ala. Biani, fade mbi yeke sara si ye ni asi alingbi na ni; na lango ni so, fade mo wani, mo yeke baa na le ti mo.

¹⁷Me na lango ni so, mbi yeke zi mo si azo so mo yeke kpe mbeto ti ala so, a yeke zia mo na maboko ti ala pepe; so tënë ti yanga ti KOTA GBIA laa.

¹⁸Fade mbi yeke soo mo biani; mo yeke kui kuâ ti yongoro zeme pepe, me mo yeke ngba na fini, ngbanga ti so mo zia be ti mo na ndö ti mbi; so tënë ti yanga ti KOTA GBIA laa.’ ”