Read La Bible en Sango courant – Mbeti ti Nzapa Jérémie 40 Bible Online

Jérémie 40 - La Bible en Sango courant – Mbeti ti Nzapa bible

Jérémie 40

¹Tënë ti *KOTA GBIA asi na Jérémie na peko ti so Nebuzaradan, makonzi ti aturugu ti batango gbia azi Jérémie si lo zia lege na lo ti londo na Rama ti hon. Na ndembe so Nebuzaradan agbu lani Jérémie, andaa a kanga lo na zingiri si lo yeke na popo ti azo ti Jérusalem na ti Juda so kue a gbu ala ti gue na ala na Babilone.

²Makonzi ti aturugu ti batango gbia airi Jérémie, ala na lo use si lo tene na lo: “KOTA GBIA, Nzapa ti mo atene ando tënë ti sioni ye so ayeke ti na ndö ti gbata so.

³KOTA GBIA atokua ye ni awe; lo sara si ye ni asi alingbi na tënë so lo tene ando. Biani, ala sara siokpari ti ke KOTA GBIA, ala ma yanga ti lo pepe. Ndani laa ye so kue asi na ala.

⁴Gi laso laso, mbi yeke zi azingiri so a kanga maboko ti mo na ni. Tongana mo ye ti ga na peko ti mbi na Babilone, mo lingbi ti ga senge; fade mbi yeke baa ndo na ndö ti mo. Me tongana mo ye ti ga na peko ti mbi na Babilone pepe, mo ngba senge. Mo lingbi ti gue na ndo so kue be ti mo aye na ya ti kodro ni, zo akanga lege na mo pepe. Mo gue na ndo so kue mo baa nzoni na le ti mo.”

⁵So Jérémie ade ti gue pepe, Nebuzaradan akiri atene na lo: “Mo lingbi ti kiri na tere ti Gedalia, molenge ti Ahikam, molenge ti Shafan. Gbia ti Babilone azia Gedalia titene lo ga govoronere ti agbata ti Juda. Mo na lo aduti na popo ti azo ti agbata ni, wala mo gue na ndo so kue mo baa nzoni na le ti mo.” Makonzi ti aturugu ni amu na Jérémie kobe ti tengo ni na lege; lo mu nga na lo amatabisi si lo zia lege na lo ti gue.

⁶Tongaso Jérémie ague na Mispa, na tere ti Gedalia. Lo na Gedalia aduti na popo ti azo so angba na ya ti kodro ni.

⁷Andaa ambeni makonzi ti aturugu, ala na aturugu ti ala angba na ya ti ngonda. Ala ma a tene, gbia ti Babilone amu Gedalia, molenge ti Ahikam azia lo na li ti kodro ni. Ala ma nga atene, gbia ni amu na lo akoli, awali, amolenge nga na awayere ti kodro ni, azo so a gue na ala na Babilone pepe, titene lo baa ndo na ndö ti ala.

⁸Aturugu ni ague, awara Gedalia na Mispa. Amakonzi ti ala ayeke Ismael, molenge ti Netania; Yohanan na Jonatan, ala use kue ayeke amolenge ti Karea; Seraya, molenge ti Tanehumet; amolenge ti Efai ti Netofa na Yazania, zo ti Maaka, ala na azo ti ala.

⁹Gedalia, molenge ti Ahikam, molenge ti Shafan, adeba yanga ti lo na aturugu ni nga na amakonzi ti ala, atene: “Mbeto ti sara kua na gbe ti azo ti Babilone asara ala pepe! Ala duti na ya ti kodro ni, ala sara kua na gbe ti gbia ti Babilone, tongaso si fade ala yeke baa nzoni.

¹⁰Ti mbi, mbi yeke ngba ge na Mispa ti luti na iri ti ala na le ti azo ti Babilone so ayeke ga na ndo ti e. Me ti ala, ala ko ale ti *vinye, ale ti keke na mafuta, ala bata ni; ala ngba na ya ti agbata so ala mu ti duti daa.”

¹¹Legeoko nga, azo ti Juda so ayeke na sese ti Moab, ala so ayeke na ndo ti azo ti mara ti Amoni nga na ala so ayeke na sese ti Edom, wala ala so ayeke na ya ti akodro nde nde ama a tene, gbia ti Babilone azia lani tanga ti azo angba na sese ti Juda. Lo zia Gedalia, molenge ti Ahikam, molenge ti Shafan na li ti ala.

¹²Tongaso azo ti Juda kue alondo na ando so kue a kangbi ala lani daa, ala kiri na sese ti Juda na tere ti Gedalia, na gbata ti Mispa. Kâ, ala ko gba ti ale ti vinye na ale ti keke.

¹³Mbeni lâ, Yohanan, molenge ti Karea, lo na amakonzi ti aturugu so angba na ya ti ngonda aga na tere ti Gedalia, na gbata ti Mispa.

¹⁴Ala hunda lo, atene: “Baalis, gbia ti azo ti mara ti Amoni atokua Ismael, molenge ti Netania ti fâ mo. Mo ma tënë ni awe?” Me Gedalia, molenge ti Ahikam, ayeda na tënë ti ala ni pepe.

¹⁵Andaa Yohanan aga lani abaa Gedalia na hondengo ni na gbata ti Mispa si atene na lo: “Mbi gbu gere ti mo, zia na mbi lege titene mbi gue, mbi fâ Ismael, molenge ti Netania. Fade zo oko ayeke ma tënë ni pepe. Mo ye titene lo fâ mo ngbanga ti nyen? Tongana lo fâ mo, azo ti Juda so kue abongbi na tere ti mo, fade ala yeke kiri ti kangbi kirikiri si tanga ti azo ti Juda so angba, fade ala yeke kui!”

¹⁶Me Gedalia, molenge ti Ahikam, akiri tënë na Yohanan, molenge ti Karea, atene: “Mo sara ye tongaso pepe! Tënë so mo tene na ndö ti Ismael so ayeke mvene!”