Read La Bible en Sango courant – Mbeti ti Nzapa Jérémie 43 Bible Online

Jérémie 43 - La Bible en Sango courant – Mbeti ti Nzapa bible

Jérémie 43

¹So Jérémie ahunzi ti tene na azo ni kue atënë so kue *KOTA GBIA, Nzapa ti ala atokua lo ti tene na ala, so ti tene atënë so kue a fa peko ni ge so,

²Azaria, molenge ti Hoshaya, na Yohanan, molenge ti Karea na ambeni zo ti sioni yanga, atene na Jérémie: “Tënë ti mvene laa mo yeke tene so! KOTA GBIA, Nzapa ti e atokua mo pepe ti tene na e: ‘Ala gue na Ezipte pepe ti honde tere ti ala kâ!’

³Me Baruk, molenge ti Neria laa ayeke pusu mo na tere ti e. Biani, lo ye ti zia e na maboko ti azo ti Babilone titene ala fâ e wala titene ala gbu e ti gue na e na Babilone.”

⁴Tongaso, Yohanan, molenge ti Karea, lo na amakonzi ti aturugu ni nga na azo so kue ayeke na tere ti ala, ake ti ma yanga so KOTA GBIA amu na ala ti ngba na kodro ti Juda.

⁵Nilaa Yohanan, molenge ti Karea na amakonzi ti aturugu ni amu tanga ti azo ti Juda so kue angba si ague na ala. Azo ni ayeke azo so a tumba ala na ya ti akodro nde nde so ayeke nduru na Juda si ala kiri aduti na Juda.

⁶Azo ni ayeke akoli, awali, amolenge, amolenge-wali ti gbia na azo so kue Nebuzaradan, makonzi ti aturugu ti batango gbia azia ala titene ala ngba, ala na Gedalia, molenge ti Ahikam, molenge ti Shafan. Ala mu nga wayanga-Nzapa Jérémie, lo na Baruk, molenge ti Neria si ague na ala.

⁷Ala ke ti ma yanga ti KOTA GBIA; ala gue na Ezipte, na pekoni ala si na Tapanes.

⁸Na Tapanes, tënë ti *KOTA GBIA asi na Jérémie, atene:

⁹“Mu akota têne, mo lu ni na ya ti potopoto ti siman so ayeke na yanga ti gbagba ti yangbo ti gbia Faraon, na Tapanes. Mo sara ni na le ti azo ti Juda.

¹⁰Na pekoni, fade mo yeke tene na ala: ‘Baa, tënë so KOTA GBIA so ayeke na ndö ti dunia kue, Nzapa ti Israel atene ayeke so: Mbi yeke tokua titene a iri zo ti kua ti mbi Nabukodonosor, gbia ti Babilone ti ga. Mbi yeke zia mbata ti lo ti gbia na ndö ti atêne so a lu ni ge so. Lo yeke leke gbefa ti lo ti gbia na ndo so.

¹¹Tongana lo si ande, lo yeke nika Ezipte nikango. Ti azo so a diko ala ndali ti kuâ, ala yeke kui; ti azo so a diko ala ndali ti tokuango ala na kodro wande, a yeke tokua ala na kodro wande; ti azo so a diko ala ndali ti fango ala, a yeke fâ ala!

¹²Lo yeke bi wâ na ya ti ada ti anzapa ti azo ti Ezipte; lo yeke gbi anzapa ni wala lo yeke gbu ala ti gue na ala na Babilone. Lo yeke ro aye ti Ezipte kue tongana ti so wabatango-taba ayeke ro asiri na ya ti bongo ti lo. Na pekoni, lo yeke mu lege ti hon, ye ti sara lo ayeke daa pepe.

¹³Na Heliopolis, fade lo yeke fâ ya ti angbongboro têne so a leke aluti na nduzu, fade lo yeke gbi ada ti anzapa ti azo ti Ezipte.’ ”