Read La Bible en Sango courant – Mbeti ti Nzapa Jérémie 52 Bible Online

Jérémie 52 - La Bible en Sango courant – Mbeti ti Nzapa bible

Jérémie 52

¹Sedesias ayeke na ngu baleuse na oko si lo ga gbia; lo le-gbia ngu baleoko na oko na Jérusalem. Iri ti mama ti lo ayeke Hamutal, molenge ti Irmeya, zo ti gbata ti Libna.

²Sedesias asara ye so ayeke sioni na le ti *KOTA GBIA gi tongana ti so Yoakim asara lani.

³Akpale so aga na ndö ti Jérusalem nga na ndö ti Juda ndali ti ngonzo ti KOTA GBIA; ye so asara si lo tumba ala yongoro na tere ti lo. Sedesias atomboka na tere ti Nabukodonosor, gbia ti Babilone.

⁴Na nze baleoko ni ti ngu gumbaya ni so Sedesias ayeke le-gbia, Nabukodonosor, gbia ti Babilone, lo na aturugu ti lo kue aga ti sara bira na Jérusalem. Lo sara bâbâ ti lo na tere ti gbata ni; azo ti lo abongbi sese aga *koto na tere ti gbagba ti gbata ni, angoro ni kue.

⁵Ala ngoro gbata ni na bira aninga ngbii asi na ngu baleoko na oko ni so Sedesias ayeke le-gbia.

⁶Na lango gumbaya ti nze osio ni, kota nzara ati na ya ti gbata ni; azo ti kodro ni ayeke na kobe ti tengo ni mbeni pepe.

⁷Tongaso azo akoro mbeni du na ya ti gbagba ti gbata ni. Na bi, aturugu ni kue asigigi na ya ti gbata ni akpe ahon. Ataa so azo ti Babilone angoro gbata ni kue, aturugu ni ahon na yanga ti gbagba so ayeke na popo ti agbagba use, nduru na tere ti kete yaka ti gbia. Na pekoni, ala mu lege so ague na popo-hoto ti Jourdain.

⁸Me aturugu ti Babilone atumba peko ti gbia Sedesias si ala gue, awara lo na lando ti Jéricho. Aturugu ti lo kue akpe kirikiri, ala do lo azia.

⁹Ala gbu gbia ni si ala gue na lo na gbia ti Babilone na gbata ti Ribla, na sese ti Hamat. Kâ, Nabukodonosor afâ ngbanga na li ti lo.

¹⁰Na Ribla, gbia ti Babilone afâ go ti amolenge ti Sedesias taa na le ti lo; lo fâ nga go ti akota zo ti kua kue ti Juda.

¹¹Na pekoni gbia ti Babilone akoro le ti Sedesias, lo kanga lo na azingiri use ti bengba wen. Lo mu lo ague na lo na Babilone, lo zia lo na da ti kanga ngbii asi na lango so lo kui na ni.

¹²Na lango baleoko ti nze oku ni, so ti tene na ngu baleoko na gumbaya ni so Nabukodonosor, gbia ti Babilone ayeke le-gbia, Nebuzaradan aga na Jérusalem. Nebuzaradan ayeke makonzi ti aturugu ti batango gbia si lo yeke mbeni kota zo na yangbo ti gbia ti Babilone.

¹³Lo gbi kota da ti Nzapa, yangbo ti gbia nga na ada ti Jérusalem kue; lo bi wâ na ya ti ada ti akota zo kue.

¹⁴Aturugu ti Babilone so kue amu peko ti makonzi ti aturugu ti batango gbia akungbi na sese gbagba so kue angoro Jérusalem.

¹⁵Na pekoni Nebuzaradan, makonzi ti aturugu ti batango gbia agbu tanga ti azo so angba na ya ti gbata ni, ambeni wayere kete ti gbata ni, ala na azo so lani azia tere ti ala na gbia ti Babilone nga na tanga ti azo ti sarango ye na kode si lo gue na ala na Babilone.

¹⁶Me lo zia ambeni wayere kete na ya ti kodro ni titene ala fâ ayaka ti *vinye na ayaka.

¹⁷Azo ti Babilone akungbi na sese ayongoro gere ti da so ayeke na bengba wen si ayeke na yanga ti kota da ti Nzapa so. Ala fâ gere ti akete pusu na ngbongboro sembe so a sara na bengba wen si a zia na ya ti gbagba ti kota da ti KOTA GBIA so. Ala mu bengba wen so kue ague na ni na Babilone.

¹⁸Ala mu nga aye so kue a sara na bengba wen si a yeke sara na kua na ya ti kota da ti Nzapa, ague na ni; aye ni ayeke tongana: ata so a yeke zia mburu ti wâ daa, apao, aye ti mingongo na wâ, adu ti sembe so a yeke tuku mene daa ti fi na tere ti aye nga na akopo.

¹⁹Makonzi ti aturugu ti batango gbia akiri amu aye so kue a sara na lôro nga na wen ti nginza si ague na ni; aye ni ayeke tongana: akota sembe, akete ta ti zongo na dukani, adu ti sembe so a yeke tuku mene daa ti fi na tere ti aye, asembe so a yeke zia mburu ti wâ daa, agere ti lamba, akopo na adu ti sembe.

²⁰Ayongoro gere ti da use, ngbongboro sembe na abagara baleoko na use so ayeke yo ni nga na akete pusu so Salomon asara na bengba wen ndali ti kota da ti KOTA GBIA, zo alingbi ti hinga nengo ti abengba wen ni pepe.

²¹Âdu ti angbongboro yongoro gere ti da ni, gere ti da oko ayo na nduzu metere gumbaya. Tongana a ngoro tere ni kue na kamba, yongo ni ayeke metere omene; du ayeke na ya ni si bengba wen so a sara na ni *amï alingbi na santimetere miombe.

²²Na ndö ti yongoro gere ti da ni oko oko, ala zia mbeni ngbongboro bengba wen so ayo na nduzu metere use na ndambo. Ala mu bengba wen aleke na mbeni ye tongana gbanda nga na ale ti keke so iri ni grenade, ala zia ni na tere ti ngbongboro bengba wen ni. Use yongoro gere ti da ni na aye ti pendere so a zia na tere ni ayeke tongana ti kozo yongoro gere ti da ni.

²³Ale ti grenade ni ayeke balegumbaya na omene, mbage na mbage; so ti tene na tere ti gbanda ni kue, wungo ti ale ti grenade ni ayeke ngbangbo oko.

²⁴Makonzi ti aturugu ti batango gbia agbu Seraya, kota wayango-sandaga, lo na Sefania, use wayango-sandaga nga awayango-sandaga ota so ayeke bata yanga ti kota da ti Nzapa.

²⁵Lo gbu nga na ya ti gbata ni mbeni kota zo so ayeke baa ndo na ndö ti aturugu; lo gbu nga azo mbarambara so ayeke nduru na tere ti gbia si ala yeke na ya ti gbata ni; lo gbu nga wakuasu ti makonzi ti aturugu, lo so lo yeke su iri ti azo so aye ti li na kua ti turugu; lo gbu nga azo ti Juda baleomene so ayeke na ya ti gbata ni.

²⁶Nebuzaradan, makonzi ti aturugu ti batango gbia amu azo ni ague na ala na gbia ti Babilone, na gbata ti Ribla.

²⁷Gbia ti Babilone afâ ngbanga ti kuâ na li ti ala si lo fâ ala na Ribla, na sese ti Hamat. Lege so a gbu azo ti Juda a gue na ala na kodro wande, yongoro na sese ti ala laa.

²⁸Wungo ti azo so Nabukodonosor agbu ala ague na ala na kodro wande ayeke tongaso: na ngu mbarambara ni: azo ti Juda 3 023;

²⁹na ngu baleoko na miombe ni ti lengo-gbia ti Nabukodonosor: azo ti Jérusalem 832;

³⁰na ngu baleuse na ota ni, Nebuzaradan, makonzi ti aturugu ti batango gbia agbu azo ti Juda 745 si ague na ala na kodro wande. Wungo ti azo ni kue ayeke 4 600.

³¹Ngu baleota na mbarambara na peko ti so a gbu Yoakin, gbia ti Juda a gue na lo na kodro wande, Evil-Merodak aga gbia ti Babilone. Na lango baleuse na oku ti nze baleoko na use ni, na kozo ngu so lo to nda ti le-gbia, lo sara nzoni be na Yoakin, gbia ti Juda si lo zi lo na da ti kanga.

³²Lo tene anzoni tënë na lo si lo zia lo na kota ndo ahon ambeni gbia so lo na ala ayeke na Babilone.

³³Lo zi bongo ti kanga na tere ti Yoakin si na lango ti fini ti lo kue, lo na gbia ayeke te kobe ndo oko.

³⁴Lango oko oko ngbii asi na lango so lo kui na ni, na lango ti fini ti lo kue, Yoakin ayeke wara ye so ayeke nzoni ndali ti gigi ti lo gi na maboko ti gbia ti Babilone.