Read La Bible en Sango courant – Mbeti ti Nzapa Jérémie 7 Bible Online

Jérémie 7 - La Bible en Sango courant – Mbeti ti Nzapa bible

Jérémie 7

¹Tënë so alondo na yanga ti *KOTA GBIA asi na Jérémie, atene:

²Mo luti na yanga ti da ti KOTA GBIA, mo to mbela na tënë so, mo tene: “Ala azo ti Juda kue, ala so ayeke li na yanga ti da so ti kuku na gbe ti KOTA GBIA, ala ma tënë ti lo si!

³Tënë so KOTA GBIA so ayeke na ndö ti dunia kue, Nzapa ti Israel, atene ayeke so: Ala sara si lege ti dutingo ti ala na sarango ye ti ala akiri aga nzoni! Tongaso si fade mbi yeke sara titene ala ngba ti duti na ya ti kodro so.

⁴Ala zia be ti ala pepe na ndö ti atënë ti handa so atene: ‘Da ti KOTA GBIA ayeke ge! Da ti KOTA GBIA laa! Da ti KOTA GBIA laa!’

⁵Me ayeke nzoni, ala sara si lege ti dutingo ti ala na sarango ye ti ala aga nzoni: tongana azo use ague na ngbanga, alingbi ala fâ ngbanga ti azo ni na legeni;

⁶tongana mbeni wande, wala nyindu, wala wali-mua ayeke na popo ti ala, ala sara ngangu na ala pepe; azo so tënë ayeke na li ti ala pepe, ala tuku mene ti ala na ndo so pepe; ala mu peko ti anzapa nde pepe, ngbanga ti ala wara kpale.

⁷Tongaso si fade mbi yeke sara titene ala duti na ya ti kodro so; kodro so mbi mu ando na akotara ti ala ngbene ye kpu na kpu, lakue lakue.

⁸“Me ala ngba ti zia be ti ala gi na ndö ti atënë ti handa so ayeke sara nzoni oko na zo pepe.

⁹So nyen! Ala yeke nzi, ala yeke fâ azo, ala yeke lango na akoli wala awali ti amba ti ala. Ala yeke de aba ti mvene, ala yeke zö dukani na *Baal, ala yeke mu peko ti anzapa so ala hinga ala kozoni pepe.

¹⁰Na pekoni, ala yeke ga ti luti na le ti mbi na ya ti kota da so a di iri ti mbi daa si ala yeke tene: ‘Nzapa asoo e awe!’ si ala ngba ti sara asioni ye so kue ti gue na ni?

¹¹Kota da so a di iri ti mbi daa so, ala baa ni tongana du so azo ti nzi ayeke honde tere ti ala na ya ni? Ye so mbi wani, mbi baa laa; so tënë ti yanga ti KOTA GBIA laa.

¹²“Ala gue na Silo, ala baa; ndo so a zia nde ndali ti mbi ayeke ando kâ, ndo so mbi sara titene iri ti mbi aduti daa laa. Ndali ti sioni sarango ye ti azo ti Israel so ayeke azo ti mbi, mbi buba ndo ni kue awe.

¹³Baa, fadeso ala yeke sara gi mara ti asioni ye so. Mbi mu ngoi ti mbi kue ti tene tënë na ala, me ala ma pepe; mbi iri ala, me ala ke ti yeda; so tënë ti yanga ti KOTA GBIA laa.

¹⁴Ala zia be ti ala kue na ndö ti kota da so. A di iri ti mbi na ndö ni awe; mbi mu ni ando na akotara ti ala si mbi mu nga ni na ala. Me mbi yeke buba ni legeoko tongana ti so mbi buba Silo.

¹⁵Mbi yeke tumba ala yongoro na le ti mbi tongana ti so mbi tumba a-ita ti ala, azo ti mara ti Efraim so.”

¹⁶“Jérémie, mbi ye titene mo sambela ndali ti azo so pepe. Mo toto wala mo voro tere ti mo na mbi ndali ti ala pepe; mo ngba ti sambela mbi ndali ti ala pepe, ngbanga ti so fade mbi yeke ma mo pepe.

¹⁷Aye so ala sara na ya ti agbata ti Juda nga na ndö ti alege ti Jérusalem so, mo baa ni pepe?

¹⁸Amolenge ayeke ro akeke ti wâ, ababâ ayeke tingo wâ, awali ayeke pete ya ti farini na ngu ti sara na agatoo titene ala mu na gbia-wali ti yayu. Ala yeke tuku samba na sese ti mu na *sandaga na anzapa nde titene ala zia ngonzo na be ti mbi.

¹⁹Mbi laa ala yeke sara sioni na mbi so? Oko pepe! Ala sara ye ni ti bi kamene gi na le ti ala wani; so tënë ti yanga ti KOTA GBIA laa.”

²⁰Ndani laa, tënë so Kota Gbia NZAPA atene ayeke so: “Fade mbi yeke tuku ngonzo ti mbi ti wâ na ndö ti gbata so, na ndö ti azo na anyama, na ndö ti akeke nde nde ti yaka na ale ti kobe so asigigi na sese. Ngonzo ti mbi ayeke duti tongana wâ so ayeke mingo pepe.”

²¹Tënë so KOTA GBIA so ayeke na ndö ti dunia kue, Nzapa ti Israel atene ayeke so: “Ala mu anyama ti *sandaga ti ala so a yeke gbi ni kue na wâ so, ala bongbi ni na tanga ti asandaga so ala yeke mu ka na mbi so, ala wani ate ni ma!

²²Lani so mbi mu akotara ti ala na sese ti Ezipte mbi sigigi na ala so, mbi tene tënë na ala tongaso pepe. Mbi mu yanga na ala titene ala mu na mbi sandaga ti nyama so a yeke gbi ni kue na wâ, wala asandaga nde nde pepe.

²³Yanga so mbi mu na ala ayeke so: Ayeke nzoni ala ma yanga ti mbi, tongaso si mbi yeke duti Nzapa ti ala si ala yeke duti azo ti mbi. Ala tambula mbirimbiri na lege so mbi fa na ala si ala yeke duti nzoni.

²⁴Me ala ke ti ma tënë ni; ala dingi mê ti ala kete pepe ti ma ni; ala sara gi ye so sioni be ti ala afa. Titene ala baa ndo na mbage ti mbi, ala zia gi peko ti ala na mbi.

²⁵Ti londo na lango so akotara ti ala asigigi na sese ti Ezipte ngbii asi laso, mbi mu ngoi ti mbi ti tokua na ala azo ti kua ti mbi kue so ayeke awayanga-Nzapa. Na ya ti lango oko oko, mbi yeke tokua ala.

²⁶Me ala ma mbi pepe; ala dingi mê ti ala kete pepe ti ma mbi; ala sara ngangu li ahon ndoni, ala sara sioni ahon akotara ti ala.

²⁷“Ti mo Jérémie, fade mo yeke tene peko ti atënë so kue na ala, me ala yeke ma mo pepe. Mo yeke iri ala, me ala yeke yeda pepe.

²⁸Tongaso, fade mo yeke tene na ala, mo tene: Ala yeke azo ti mara so ama yanga ti KOTA GBIA, Nzapa ti ala pepe; ala ke ti ma wango. Taa-tënë ayeke mbeni pepe; zo ti tenengo taa-tënë ayeke daa mbeni pepe.”

²⁹“Ala azo ti Juda, ayongoro kua ti li ti ala so afa atene, a zia ala nde ndali ti mbi so, ala kio ni, ala bi yongoro! Kâ na li ti ahoto so ndö ni ayeke senge, ala he bia ti totongo kuâ, ngbanga ti so *KOTA GBIA ake azo ti ngoi ti laso. Ala yeke azo so azia ngonzo na be ti lo; lo zia ala awe.

³⁰“Biani, azo ti Juda asara ye so ayeke sioni na le ti mbi. Ala zia afungo nzapa ti ala na ya ti kota da so a di iri ti mbi na ndö ni; ala sara si da ni aga *sioni; so tënë ti yanga ti KOTA GBIA laa.

³¹Na popo-hoto ti Hinom, ala leke ndo na li ti hoto so ala di iri ni Tofet. Kâ, ala yeke gbi na wâ amolenge ti ala ti koli na ti wali ti mu na *sandaga. Andaa, so ayeke mbeni ye so mbi mu yanga laoko pepe titene ala sara ni; mbeni tënë tongaso aga na li ti mbi laoko pepe.

³²“Ndani laa, mbeni lango ayeke ga so fade azo ayeke tene mbeni pepe, atene: ‘Tofet’ wala ‘Popo-hoto ti Hinom’, me azo ayeke tene: ‘Popo-hoto ti fango zo’. Ndo so laa a yeke lu ande kuâ ti azo daa, ngbanga ti so ndo ti lungo akuâ na mbeni ndo nde ayeke daa pepe; so tënë ti yanga ti KOTA GBIA laa.

³³Fade kuâ ti azo ni ayeke ga kobe ti andeke ti nduzu na ti anyama ti sese; zo ti ga ti tumba ala na tere ti kuâ ni ayeke daa pepe.

³⁴Mbi yeke kai ngia ti azo na ya ti agbata ti Juda nga na ndö ti alege ti Jérusalem; mbi yeke kai nzerengo tere ti azo so ayeke he bia; mbi yeke kai bia ti koli na wali so ayeke sara matanga ti mungo tere. Biani, ngia ti ala ni ayeke kai, ngbanga ti so kodro ni abuba kue.