Read La Bible en Sango courant – Mbeti ti Nzapa Jérémie 9 Bible Online

Jérémie 9 - La Bible en Sango courant – Mbeti ti Nzapa bible

Jérémie 9

¹Tongana a mu na mbi fade mbeni ndo ti azo ti lege kâ na benyama titene mbi lango daa, ka mbi yeke zia azo ti kodro ti mbi, mbi hon yongoro na tere ti ala! Ala kue ayeke azo ti gingo akoli wala awali ti azo; ala ayeke bongbi ti azo so ake Nzapa awe.

²*KOTA GBIA atene: “Menga ti ala ayeke tongana kokora so a gboto ya ni. Ala yeke ga kota na ya ti kodro ni na lege ti taa-tënë pepe, me na lege ti mvene. Ala yeke sara gi sioni ti gue na ni, me mbi, ala hinga mbi pepe; so tënë ti yanga ti KOTA GBIA laa.

³Ayeke nzoni zo oko oko asara hange na mba ti lo; ala zia be ti ala na ndö ti a-ita ti ala pepe, ngbanga ti so azo kue ayeke azo ti handango a-ita ti ala; ataa mba ti mo so mo ye lo mingi, lo yeke du mvene na li ti mo.

⁴Ala oko oko kue ayeke handa amba ti ala; zo oko ayeke tene taa-tënë pepe. Ala leke menga ti ala ti tene gi atënë ti mvene. Ala sara sioni ngbii awoko ala.

⁵Ndo ti dutingo ti ala ayeke gi na ya ti handango ndo. Na lege ti handa, ala ke ti hinga mbi; so tënë ti yanga ti KOTA GBIA laa.”

⁶Ndani laa, tënë so KOTA GBIA so ayeke na ndö ti dunia kue atene ayeke so: “Mbi yeke kporo ala na ya ti wâ ti zi sioni ti ala tongana ti so a yeke kporo wen; mbi yeke tara be ti ala. Nyen laa mbi yeke sara na azo ti mbi, nyen?

⁷Menga ti azo ni ayeke tongana le ti kokora so ayeke fâ zo; atënë ti ala gi atënë ti mvene: nzoni tënë ayeke sigigi na yanga ti ala na tere ti amba ti ala, me na be ti ala kâ, ala leke kuku ti gbu na amba ti ala ni.

⁸So tënë ti yanga ti KOTA GBIA laa: Ndali ti ye tongaso, fade mbi yeke ga na tere ti ala pepe? Mara ti azo tongaso, mbi yeke kiri na ala peko ti sioni so ala sara so pepe?”

⁹Ndali ti ahoto, mbi yeke toto si mbi yeke dema tere; ndali ti ndo so anyama ayeke te ka pere daa, mbi yeke he bia ti totongo kuâ, ngbanga ti so ndo ni kue agbi awe; zo ayeke hon daa mbeni pepe; a yeke ma go ti anyama na ndo ni so pepe. Ataa andeke ti nduzu na anyama, ala kue ahon, mbeni oko angba pepe.

¹⁰KOTA GBIA atene: “Mbi yeke sara titene Jérusalem aga ndo so ye kue abuba daa; ndo so aga ndo ti lango ti *anzagua. Mbi yeke sara si agbata ti Juda aga gi ngonda, ndo so zo ayeke daa mbeni pepe.”

¹¹Mbeni zo ti ndara ayeke daa so alingbi ti ma ya ti tënë so? Tongana zo ni ayeke daa, ayeke nzoni tënë so KOTA GBIA azia na yanga ti lo, lo fa ni na azo polele. Lo fa nda ni so kodro ni abuba; nda ni so kodro ni agbi si aga gi benyama so; nda ni so zo ayeke hon daa oko pepe so.

¹²KOTA GBIA akiri atene: “Ye ni asi tongaso, ngbanga ti so azo ni azia lege ti ye so mbi fa na ala, ala ke ti ma mbi; ala ke ti sara ye alingbi na tënë ti mbi.

¹³Ala sara ngangu li si ala mu peko ti anzapa *Baal so akotara ti ala afa ando lege ni na ala.

¹⁴Ndani laa, tënë so KOTA GBIA so ayeke na ndö ti dunia kue, Nzapa ti Israel, atene ayeke so: Mbi yeke mu na azo ti kodro ni sengo kugbe titene aga kobe ti ala ti tengo ni, mbi yeke mu na ala ngu so sioni yoro ayeke na ya ni titene ala nyon.

¹⁵Mbi yeke kangbi ala kirikiri na popo ti amara so ala hinga kozoni pepe; ataa ala wani, ataa akotara ti ala ahinga amara ni so pepe. Mbi yeke sara si azo angba ti sara bira na ala ngbii azo ni ahunzi ala kue si.”

¹⁶Tënë so KOTA GBIA so ayeke na ndö ti dunia kue atene laa. “Ala gbu li ti ala si! Ala iri awali ti totongo kuâ ti ga! Ala iri awali so kua ti ala ayeke gi totongo kuâ.

¹⁷Ayeke nzoni awali ni aga hio hio ti he abia ti ala ti demango tere na ndö ti e! Ayeke nzoni e nga, ngu ti le ti e asua na le ti e; ayeke nzoni ngu ti le ni ayuru gbani gbani.”

¹⁸Na mbage ti *Sion, a yeke ma go ti mbeni zo so ayeke dema tere: “Ae, azo ahunzi e kue awe! So ye ti kamene na e titene e zia kodro ti e ti hon! So ye ti kamene na e so azo akungbi ada ti e kue na sese awe so!”

¹⁹Ala awali, ayeke nzoni ala ma tënë so KOTA ayeke tene na ala; ala zi mê ti ala mbirimbiri ti ma tënë so lo yeke tene na ala. Ala fa na amolenge ti ala ti wali abia ti demango tere; ala awali, ala oko oko kue afa abia ti totongo kuâ na amba ti ala.

²⁰“Biani, kuâ asi na tere ti fenetere ti e awe; lo li na ya ti apendere da ti e awe. Lo fâ amolenge na ndö ti alege; lo fâ amaseka na ndö ti abalabala.”

²¹“Ti mo Jérémie, mo tene: So tënë ti yanga ti KOTA GBIA laa: ‘Kuâ ti azo ayeke lango na sese tongana puru na le ti yaka, tongana ale ti kobe so azo ti fango ale ti kobe afâ ni si ati na sese si zo ti rongo ni ayeke daa pepe.’ ”

²²Tënë so KOTA GBIA atene ayeke so: “Ayeke nzoni zo ti ndara agonda tere ti lo pepe ndali ti ndara so lo yeke na ni! Ayeke nzoni zo ti ngangu agonda tere ti lo pepe ndali ti ngangu so lo yeke na ni! Ayeke nzoni zo ti mosoro agonda tere ti lo pepe ndali ti mosoro so lo yeke na ni!

²³Tongana zo aye ti gonda tere ti lo, ayeke nzoni lo gonda tere ti lo, ngbanga ti so lo hinga ndo si lo hinga mbi. Ayeke nzoni zo ni ahinga atene, mbi yeke KOTA GBIA si mbi yeke sara ye na nzoni be; mbi yeke sara ye na legeni mbirimbiri na ndö ti sese. Ye so anzere na be ti mbi laa; so tënë ti yanga ti KOTA GBIA laa.”

²⁴“Mbeni lango ayeke ga so mbi yeke ga na tere ti azo so atene, ani yeke azo so afâ *ganza awe so; so tënë ti yanga ti KOTA GBIA laa.

²⁵Azo ni ayeke azo ti Ezipte, ti Judée, ti Edom, ti Amoni, ti Moab nga na azo ti benyama so kue ayeke kio kua ti tere ti li ti ala. Biani, amara kue afâ *ganza pepe, me azo ti Israel kue afâ be ti ala na ganza pepe.”