Read La Bible en Sango courant – Mbeti ti Nzapa Abia ti demango tere 2 Bible Online

Abia ti demango tere 2 - La Bible en Sango courant – Mbeti ti Nzapa bible

Abia ti demango tere 2

¹Azo-oo, azo! *KOTA GBIA asara ngonzo si lo tokua vukongo ndo na ndö ti gbata ti *Sion. Ye so ayeke sara gonda ti azo ti Israel so, KOTA GBIA abi ni si alondo na yayu kâ ati na sese. Sion ayeke mbata ti gere ti KOTA GBIA; na lango so ngonzo ti lo alondo na tere ti Sion, be ti lo agirisa na mbata ti gere ti lo ni.

²KOTA GBIA akungbi akete kodro ti sese ti Israel kue; lo baa mawa ti akodro ni oko pepe. Ngonzo ti lo ti wâ alondo; nilaa lo kungbi agbata ti Juda na sese; agbata so a sara angangu gbagba na tere ni so. KOTA GBIA abi kodro-gbia ni na sese, lo buba iri ti kodro ni na akota zo ni kue.

³Ngonzo ti KOTA GBIA alondo tongana wâ; nilaa lo kungbi na sese aye so kue asara ngangu ti azo ti Israel. Lo zi maboko na tere ti azo ti Israel na ndembe so awato aga ti tiri bira na ala. Lo zia wâ na kodro ti azo ti Israel, wâ ni ague, agbi aye mbage na mbage kue.

⁴KOTA GBIA agboto ya ti kokora ti lo tongana wato; maboko ti lo ti koli angba gi ngbango daa. Lo fâ aye so kue ayeke pendere mingi ti bango ni. KOTA GBIA atuku ngonzo ti lo ti wâ na ndö ti kota da-Nzapa ti Jérusalem.

⁵KOTA GBIA asara e tongana taa wato; lo hunzi azo ti kodro ti Israel kue; lo kungbi akota da ti amakonzi ni kue na sese; lo fâ angangu gbagba ti kodro ni na sese. Pasi ti azo ti kodro ti Juda ahon ndoni; gi demango tere na demango tere.

⁶Lo buba gbagba na kpangba ti yaka ti lo. Lo buba da so lo na azo ti lo ayeke tengbi tere daa so. Alango ti matanga na *alango ti wungo tere, KOTA GBIA asara si azo agirisa ni na Sion awe. Be ti KOTA GBIA ayeke gi wâ wâ; nilaa lo bi buba na tere ti agbia na awayango-sandaga kue.

⁷Be ti KOTA GBIA akiri aye gbalaka ti asandaga ti lo mbeni pepe; lo ke kota da ti lo awe. Agbagba ti ada ti makonzi ti Sion so, KOTA GBIA azia ni na maboko ti awato awe. Mo ma go ti azo kirikiri na ya ti kota da ti KOTA GBIA, mo baa mo tene lango ti matanga laa.

⁸KOTA GBIA aleke na be ti lo ti kungbi kota gbagba ti bira ti azo ti Sion kue na sese. Lo gboto kamba na sese ti haka na ni; maboko ti lo ayeke ngba daa ngbii lo kungbi ni kue na sese si. Lo sara si ngangu gbagba ni na senge gbagba ni ati kue awe; so mawa! Ala use kue abuba gi legeoko.

⁹Ayanga ti gbagba ti gbata ti Sion ati, alango na gbe ti akungbingo gbagba ni. Angbongboro wen ti yanga ti gbagba ni so, lo de ya ni nduru nduru. A gbu gbia ti gbata ni na agbenyogbia ti lo si a gue na ala na popo ti amara nde. Tënë ti yanga ti Nzapa ayeke daa mbeni pepe; ataa azo ti tenengo peko ti yanga ti lo kue, lo kiri lo tene tënë na ala na lege ti mbeni ye tongana bango-li pepe.

¹⁰*Akangba ti gbata ti Sion aduti gi na sese, tënë ahunzi na yanga ti ala awe; ala yu abongo ti mua, ya ti li ti ala kue gi na fuku ti sese. Amaseka-wali ti gbata ti Sion aduti aba li ti ala na sese.

¹¹Mbi toto ngbii, le ti mbi avuko kue; akamba ti ya ti mbi ayeke do dongo. Tongana mbi baa akpale so asi na azo ti kodro ti mbi, mbi woko kue. Mbi baa akete molenge na ala so angba ti nyon me; ala woko kue si ala ti kirikiri na be ti lege ti gbata ni.

¹²Amolenge ni ahunda mama ti ala, atene: “Kobe ti tengo ni ayeke na ndo wa? Ye ti nyongo ni ayeke na ndo wa?” Ala woko kue si ala yeke ti kirikiri tongana azo so awara ka ti likongo, ala yeke ti na be ti alege ti gbata ni; ala yeke kui na ya ti maboko ti mama ti ala.

¹³Azo ti gbata ti Jérusalem, mbi yeke haka ala na azo wa so-oo? Tënë ti nyen si mbi yeke tene na ala ti de be ti ala na ni so-oo! Mawa na ala mingi, azo ti gbata ti Sion! Dutingo ti ala alingbi na ti azo wa so-oo? Akpale ti ala akono ahon ndoni; akono tongana kota ngu-ingo. Zo wa si ayeke ga ande ti kai akpale ni na tere ti ala so-oo?

¹⁴Awayanga-Nzapa ti ala awara ambeni tënë ndali ti ala na ya ti mbeni ye tongana bango-li; me atënë ni gi mvene, gi abuba tënë. Awayanga-Nzapa ni afa asioni ti ala, azo ti gbata ti Sion na gigi pepe; ye so alingbi fade ti zi ala na ya ti ngbaa. Biani, atënë ti awayanga-Nzapa ni gi mvene na asenge senge tënë.

¹⁵Azo so kue ayeke hon na lege, ala yeke pika maboko ti ala ti he ala, azo ti Jérusalem. Azo ni so ayeke huru yanga ti ala. Ala baa gbata ni si ala yeke yingi li ti ala, ala tene: “Jérusalem, pendere kodro so ando so laa? Kodro ti mungo ando ngia na be ti azo ti sese, ni laa aga fadeso tongaso so-oo?”

¹⁶Awato ti ala azi yanga ti ala ti gi tënë na ala. Ala yeke huru yanga ti ala, ala yeke te pembe ti ala na ngonzo si ala yeke tene: “E yeke hunzi ala hunzingo. Een! Lango ni alingbi awe! E ku lango ni ngbii, e si daa awe, e baa ni awe!”

¹⁷KOTA GBIA asara ye so lo leke na be ti lo ti sara; lo sara ye alingbi na tënë ti yanga ti lo, tënë so lo leke na be ti lo ando kozoni so. Lo buba kodro ni kue awe; lo baa mawa ti zo oko pepe. Lo mu lege na awato ti he gbata ti Jérusalem; lo kiri lo mu ngangu mingi na awato ni.

¹⁸Gbagba ti Jérusalem, ayeke nzoni azo so ayeke na ya ti mo adekongo, ala toto na KOTA GBIA. Bi na lâ, ayeke nzoni ala kuku, ngu ti le ti ala asua tongana *bale; ala wu tere ti ala oko pepe, ala kai toto ti ala ni pepe.

¹⁹Ala londo, azo ti Jérusalem! Na bi, ala lango pepe, ala dema tere ti ala na Kota Gbia. Ala zi be ti ala kue ti tene tënë na lo. Ala yo maboko ti ala na nduzu ti voro tere ti ala na lo. Ala voro lo ndali ti amolenge ti ala so ayeke kui na nzara na ndö ti alege kue so.

²⁰KOTA GBIA, mo baa nga maa! Azo ti mo laa mo sara na ala tongaso? Mo baa, awali so adu amolenge si abata ala so, ala kiri ti te amolenge ni tongana nyen so-oo? Azo ague ngbii ti fâ awayango-sandaga na awayanga-Nzapa taa na ya ti kota da ti mo biani?

²¹Akuâ ti amolenge na ti akangba alango na ndö ti alege kirikiri. Amaseka-wali na amaseka-koli ti mbi akui kuâ ti yongoro zeme. Na lango so ngonzo ti mo alondo, mo fâ azo kirikiri, mo sara mawa ti zo oko pepe.

²²Azo so alango nduru na mbi si mbeto ti ala agbu mbi mingi so, mo tisa ala ti ga na tere ti mbi, mo baa mo tene, azo na lango ti matanga. KOTA GBIA, na lango so ngonzo ti mo alondo, zo oko ti kpe ti soo kuâ ayeke daa pepe, zo oko ti ngba na fini ayeke daa pepe. Amolenge so mbi bata ala si ala kono na da ti mbi so, awato aga afâ ala, ahunzi ala kue!