Read La Bible en Sango courant – Mbeti ti Nzapa Abia ti demango tere 4 Bible Online

Abia ti demango tere 4 - La Bible en Sango courant – Mbeti ti Nzapa bible

Abia ti demango tere 4

¹Azo-oo, azo! Pendere ti lôro alondo daa awe; lôro ti nzoni ni akiri aza oko pepe! Atêne so a zia ni nde ndali ti Nzapa atuku kirikiri amu ya ti kodro ni kue!

²Anzoni molenge ti *Sion alingbi lani na ngere ti lôro ti nzoni ni. Nyen asara si ala kiri aga fadeso tongana ta ti sese so-oo? Nyen asara si ala ga tongana senge ta so wasarango-ta asara ni so-oo? Azo-oo, azo!

³Ataa *anzagua, ala yeke mu ka me na amolenge ti ala, ala yeke baa lege ti kobe ti amolenge ti ala. Me ala azo ti kodro ti mbi, ala ga azo ti sarango sioni ye na azo tongana *anaamo ti benyama.

⁴Amolenge so angba ti nyon me, be ti ala ahole kue na nzara ti ngu. Akete molenge atoto nzara ti kobe; me zo ti mungo ni na ala ayeke daa pepe.

⁵Azo so ayeke te lani gi anzoni kobe so, fadeso ala yeke kui kirikiri na ndö ti alege. Azo so a bata ala lani tongana amolenge ti gbia so, fadeso ala si ayeke gi akobe na ya ti azende.

⁶Sioni ti azo ti kodro ti mbi ayeke mingi, siokpari ti ala ahon ti azo ti Sodome; kodro ti Sodome ati hio, mbeni zo andu nga ni pepe.

⁷Ando tere ti amolenge ti agbia ti Sion avuru tarara tongana tukia; avuru ahon ngu ti me ti bagara; tere ti ala abe pendere ahon têne ti korayi; tere ti ala avuru aza tongana têne ti safir.

⁸Fadeso tere ti ala avuko ahon pindiri ti ngbonda ti tawa. Zo abaa ala na lege, lo kiri lo hinga ala pepe. Ala nge aga tongana holengo keke.

⁹Ala so akui kuâ ti bira, pasa ti ala ahon ti ala so akui na nzara. Ala yeke kui gi yeke-yeke ngbii ala hunzi kue, ngbanga ti so ala wara mbeni ye ti te pepe.

¹⁰Akpale mingi asi na azo ti kodro ti mbi; ndali ni, amama so aye amolenge ti ala mingi, ala wani akiri ayeke to amolenge ti ala ti te.

¹¹*KOTA GBIA asara ye ti ngonzo ti lo ni kue ahunzi awe. Lo sara si ngonzo ti lo ti wâ abuba ndo kue; lo bi wâ na gbata ti Sion si agbi agere ni kue.

¹²Agbia ti sese so na azo ti dunia so, ala kue ahinga fade atene, mbeni wato wala turugu oko ti ga ti li na Jérusalem ayeke daa pepe.

¹³Me akpale so ati na ya ti kodro ni, ngbanga ti so awayanga-Nzapa asara siokpari, awayango-sandaga asara sioni mingi: ala tuku mene ti azo ti mbirimbiri ti gbata ni. Nilaa, akpale so ati na ya ti kodro ni.

¹⁴Tongana awaziba, ala yeke fono gi kirikiri na ndö ti alege. Mene so atuku asara si ala ga *sioni; a ke na zo ti ndu bongo ti ala.

¹⁵Tongana ala si na mbeni ndo, azo ayeke dekongo na ndö ti ala, atene: “Ala hon kâ, ala asarate zo so! Ala ndu tere ti e pepe! Ala hon kâ, ala hon kâ!” So ala yeke kpe gi kirikiri ti hon, azo ti akodro wande ayeke tene: “Ala lingbi ti duti na popo ti e mbeni pepe.”

¹⁶KOTA GBIA, lo wani akangbi ala kirikiri; lo ye ti baa ala na le ti lo mbeni pepe. Zo ti nengo awayango-sandaga ayeke daa pepe! Zo ti kpengo awayango-sandaga ayeke daa lawa.

¹⁷Le ti e angba gi na lege ti ku; e baa ndo gbaa: zo ti ga ti mu maboko na e ayeke daa pepe. E ngba ti ku mbeni mara nde so alingbi ti ga ti soo e; andaa mara ni so alingbi ti soo e pepe.

¹⁸Awato ti e ayeke gi peko ti e gingo; e lingbi ti fono senge na le ti kodro pepe. E ga nduru ti kui awe, lango ti e alingbi awe; biani, ti e ahunzi awe!

¹⁹Awato ti e so ayeke tumba peko ti e, ala kpe loro ngangu ahon *ngoalo so ayeke huru na le ti nduzu. Ala tumba peko ti e na ndö ti ahoto; na benyama, ala honde tere ti ala ti ku e.

²⁰Lo so KOTA GBIA asoro lo ti zia lo gbia so, lo so fini ti e ayeke na maboko ti lo si e tene tënë ti lo, e tene: “Tongana e wara ndo na popo ti awande, fade lo laa lo yeke bata e.” Baa, awato agbu lo, abi lo na du ti kanga ti ala.

²¹Ala sara ngia ma, ala, azo ti sese ti Edom! Ala dodo na ngia ma, ala, azo so alango na kodro ti Us! Fade a yeke mu nga na ala gi oko kopo ni si ala nyon asara ala tongana samba; fade ala zi bongo na ngbonda ti ala.

²²Azo ti gbata ti Sion, akpale so asi na ala na peko ti asioni ti ala aga nduru ti hunzi awe. Titene a gbu ala na ngangu a gue na ala na kodro wande, Nzapa ayeke kiri ti sara ye so pepe. Ti ala azo ti sese ti Edom, asioni ye so ala sara so, KOTA GBIA ayeke zia peko ni na ala senge pepe; fade lo yeke fa asiokpari ti ala na gigi.