Read La Bible en Sango courant – Mbeti ti Nzapa Abia ti demango tere 5 Bible Online

Abia ti demango tere 5 - La Bible en Sango courant – Mbeti ti Nzapa bible

Abia ti demango tere 5

¹*KOTA GBIA, aye so kue asi na e so, ayeke nzoni be ti mo agirisa na ni pepe. Zi le ti mo, mo baa zonga so azo ayeke zonga na e so!

²Asese so ayeke ti e wani so, akiri aga ti awande. Ada ti lango ti e akiri aga ti azo so e hinga le ti ala laoko pepe.

³E yeke anyindu, ababâ ti e ayeke daa mbeni pepe; amama ti e ayeke tongana awali-mua.

⁴Titene e nyon ngu ti du-ngu ti e wani, e kiri e yeke vo ni vongo na nginza. Titene e wara akeke ti wâ ti e wani, e kiri e yeke futa mbeni nginza si.

⁵Awato ti e ayeke na ndö ti e, ala yeke tumba peko ti e; ngangu ti e ahunzi kue awe, wungo tere ayeke daa pepe.

⁶Titene e wara kobe ti tengo ni, e yeke yoro maboko ti e na azo ti Ezipte nga na azo ti kodro ti Asirii.

⁷Akotara ti e asara ando siokpari, ala yeke daa mbeni pepe; me e laa e yo ngbanga ti asioni ti ala ni.

⁸Angbaa ayeke sara komandema na ndö ti e; zo ti zi e na maboko ti ala ayeke daa pepe.

⁹Ataa *azaragina ayeke na ya ti benyama; e yeke ka tere ti e na kuâ ti gue ti gi kobe ti yanga ti e.

¹⁰E yeke nyon gi pupu si e duti na ni. Nilaa, poro ti tere ti e ahole holengo mo baa mo tene, e hon na ya ti wâ ti fur.

¹¹Na ya ti gbata ti Sion, a yeke gbu awali na ngangu si ayeke lango na ala; na ya ti agbata ti kodro ti Juda, a yeke buba amaseka-wali.

¹²A gbu agbenyogbia, ato kamba na go ti ala na ya ti keke na nduzu. Zo akiri akpe *akangba oko pepe.

¹³Go ti amaseka-koli aba kue na gbe ti ngbongboro têne ti nikango na ale ti kobe. Amolenge-koli ayo anengo keke; ala ti, alondo; ala ti, alondo.

¹⁴Akangba akiri asi na ya ti bongbi ti lekengo atënë ti azo ti kodro pepe. Amaseka-koli akiri ahe bia na mozoko pepe.

¹⁵Ngia ti be ti e kue ahunzi, adodo ti e ahunzi awe; aga gi totongo akuâ.

¹⁶Nengo ti e ti amolenge ti gbia ati awe. E sara siokpari awe; so mawa na e, azo!

¹⁷Nilaa tere ti e kue ayeke gi na kobela si le ti e avuko na ngu ti le.

¹⁸Ndani ayeke so: hoto ti Sion aga ngonda; hoto ni aga ndo ti fonongo ti anyama ti gbungo kondo.

¹⁹Me mo KOTA GBIA, mo duti gbia lakue lakue, mbata ti mo ti gbia ayeke ngba na lege ti molongo ti dutingo ti azo oko oko kue. Komandema ti mo ayeke hunzi pepe, komandema ni ayeke ngba kpu na kpu.

²⁰Be ti mo angba ti girisa na e ngbii asi lawa so-oo? Ndali ti nyen si mo ngba ti zia ande e tongaso so-oo?

²¹KOTA GBIA, ayeke nzoni mo kiri na e na tere ti mo, fade e kiri, e ga nduru na mo. Mo kiri mo mu na e fini tongana ti so ando e yeke na ni so!

²²Mo zia e biani biani awe? Mo yeke ngba ande ti sara ngonzo na e ahon ndoni tongaso?