Read La Bible en Sango courant – Mbeti ti Nzapa Ezekiel 10 Bible Online

Ezekiel 10 - La Bible en Sango courant – Mbeti ti Nzapa bible

Ezekiel 10

¹Mbi baa ndo: na ndö ti ye so akpa le ti nduzu si ayeke na li ti *asheruben, mbeni ye ayeke daa tongana têne ti safir, ye ni akpa mbata ti gbia.

²Nzapa atene na koli so ayu bongo ti *len so, atene: “Mo li na popo ti aruu so ayeke na gbe ti asheruben ni, mo fu le ti wâ asi ya ti maboko ti mo, mo gue, mo tuku ni na ndö ti gbata ni.” Mbi baa koli ni na lingo na popo ti aruu ni.

³Na ndembe so koli ni ayeke li, asheruben ni ayeke na mbage ti koli ti kota da ti Nzapa si gba ti guru asi ya ti gbagba ni.

⁴Gonda ti *KOTA GBIA alondo na ndö ti asheruben ni si ayeke gue na mbage ti yanga ti kota da ni. Tongaso mbinda asi ya ti kota da ni kue si zango ti gonda ti KOTA GBIA asi ya ti gbagba ni kue.

⁵*Akpangi ti asheruben ni atoto si a ma ni na ya ti gbagba ti mbage ti gigi kâ. Toto ni akpa go ti Nzapa so ngangu ti lo ahon angangu kue tongana lo yeke tene tënë.

⁶Koli so ayu bongo ti len so ague, aluti na tere ti mbeni ruu oko. Lo luti kâ na ndembe so Nzapa amu yanga na lo ti li na popo ti aruu so ayeke na gbe ti asheruben ni ti mu wâ.

⁷Mbeni sheruben ni oko ayoro maboko ti lo na mbage ti wâ so ayeke nduru na lo. Lo fu ale ti wâ, lo zia ni asi ya ti maboko ti koli so ayu bongo ti len so. Koli ni amu ni si asigigi.

⁸Na gbe ti akpangi ti asheruben ni, mbeni ye so akpa maboko ti zo asigigi daa.

⁹Mbi baa ndo: na tere ti asheruben ni, aruu osio ayeke daa; ruu oko na tere ti sheruben oko, ruu oko na tere ti sheruben oko. Aruu ni so ayeke za tongana têne ti krizolite.

¹⁰Aruu ni osio kue akpa tere; aruu ni ali na ya ti amba ti ala si agbu tere.

¹¹Aruu ni alingbi ti tambula ti gue na mbage osio ti sese, ala hon gi mbirimbiri na dawa ti ala, ala yeke turne tere ti ala pepe. Ala mu gi lege so li ti asheruben ni abaa ndo daa, aruu ni ahon mbirimbiri gi na dawa ti ala, ala yeke turne tere ti ala pepe.

¹²Tere ti asheruben ni kue, peko ti ala, maboko ti ala, akpangi ti ala nga na aruu ti ala osio kue, ambeni ye tongana ale ti wâ ayeke za daa ngrengre.

¹³Mbi ma mbeni go so adi iri ti aruu ni atene: “*Kerebende”.

¹⁴Sheruben oko oko ayeke na le osio: kozo le ni ayeke tongana ti sheruben, use ni ayeke tongana ti zo, ota ni ayeke tongana ti bamara, osio ni ayeke tongana ti *ngoalo.

¹⁵Asheruben ni alondo na le ti nduzu. Ala kpa aye so ayeke na fini so mbi baa lani na tere ti *bale ti Kebar so.

¹⁶Tongana asheruben ni ayeke tambula, aruu ni ayeke tambula na tere ti ala. Tongana asheruben ni azi ya ti akpangi ti ala ti londo na le ti nduzu, aruu ni ayeke hon nde pepe, me ala yeke ngba na tere ti asheruben ni.

¹⁷Tongana asheruben ni aluti, aruu ni ayeke luti nga. Tongana asheruben ni alondo na le ti nduzu, aruu ni ayeke londo legeoko na ala, ngbanga ti so yingo ti aye so ayeke na fini laa ayeke na ya ti aruu ni.

¹⁸Gonda ti *KOTA GBIA alondo na yanga ti kota da ti Nzapa si ague, aluti na ndö ti *asheruben.

¹⁹Asheruben ni azi ya ti *akpangi ti ala ti hon. Na le ti mbi, ala londo na ndö ti sese ti hon na le ti nduzu, ala na aruu ni. Ala gue, aluti na yanga ti kota da ti Nzapa ti mbage ti To; gonda ti Nzapa ti Israel ayeke na ndö ti ala, na nduzu.

²⁰Lani na tere ti *bale ti Kebar, mbi baa gi a-oko ye ni so ayeke na fini so; ala yeke na gbe ti Nzapa ti Israel. Ndo so laa mbi hinga, mbi tene, so asheruben laa.

²¹Sheruben oko oko ayeke na le osio nga na kpangi osio; na gbe ti akpangi ti ala, ambeni ye so akpa maboko ti zo ayeke daa.

²²Ale ti ala ni akpa ale ti aye so ayeke na fini so mbi baa ala na tere ti bale ti Kebar. Sheruben oko oko ayeke tambula mbirimbiri na dawa ti lo wani.