Read La Bible en Sango courant – Mbeti ti Nzapa Ezekiel 12 Bible Online

Ezekiel 12 - La Bible en Sango courant – Mbeti ti Nzapa bible

Ezekiel 12

¹Tënë ti *KOTA GBIA asi na mbi, atene:

²“*Molenge ti zo, mo duti na popo ti azo ti mara ti ngangu li. Ala yeke na le, me ala yeke baa ndo pepe; ala yeke na mê, me ala yeke ma ndo pepe. Biani, ala yeke azo ti mara ti ngangu li.

³Ti mo, molenge ti zo, mo kanga akungba ti mo tongana ti mbeni zo so a gbu lo ti gue na lo na kodro wande. Mo londo na ndo so mo yeke daa na le ti azo kue, na kota lâ, mo gue na mbeni ndo nde tongana zo so a gbu lo ti gue na lo na kodro wande. E hinga pepe, fade ala yeke hinga atene, ala yeke azo ti mara ti ngangu li.

⁴Mo kanga akungba ti mo, mo sigigi na ni tongana ti zo so a gbu lo ti gue na lo na kodro wande. Na kota lâ, mo sigigi na ni na le ti azo kue. Na lakui, mo sigigi na ya ti kodro ni na le ti azo kue tongana zo so a gbu lo ti gue na lo na kodro wande.

⁵Na le ti azo kue, mo koro du na ya ti dere ti gbagba ti gbata ni; mo yoro akungba ti mo na ya ti du ni ti sigigi na ni.

⁶Na le ti azo kue, mo yeke yo akungba ni na ndö ti go ti mo, mo sigigi na ni na bi. Mo yeke bi bongo na le ti mo si mo baa kodro ni pepe. Biani, mbi sara si mo ga ye so ayeke fa ye so ayeke si na azo ti Israel.”

⁷Tongaso, mbi sara ye ni alingbi na yanga so KOTA GBIA amu lani na mbi. Na kota lâ, mbi sigigi na akungba ti mbi tongana ti zo so a gbu lo ti gue na lo na kodro wande. Na lakui, mbi koro du na maboko ti mbi na ya ti gbagba ni. Na bi so avuko pitipiti, mbi sigigi na akungba ni si mbi yo ni na ndö ti go ti mbi na le ti azo kue.

⁸Na ndaperere, tënë ti KOTA GBIA asi na mbi, atene:

⁹“Molenge ti zo, azo ti Israel so ayeke azo ti mara ti ngangu li so ahunda mo fade atene: ‘Nyen laa mo yeke sara so?’

¹⁰Mo kiri tënë na ala, mo tene: ‘Tënë so Kota Gbia NZAPA atene ayeke so: Nengo tënë ndali ti makonzi so ayeke na gbata ti Jérusalem nga na azo ti Israel so kue ayeke lango kâ.’

¹¹Mo tene na ala, mo tene: Mbi sara ye so ti fa ye so ayeke si ande na ala, azo ti Israel. Ye so mbi sara so, ni laa a yeke sara na ala. Fade a yeke gbu ala ti gue na ala na kodro wande.

¹²Makonzi so ayeke na popo ti ala ayeke yo akungba ti lo na ndö ti go ti lo. Na bi so avuko pitipiti, lo yeke sigigi na ya ti gbata ni. Azo ayeke koro du na ya ti gbagba ti gbata ni si lo yeke sigigi daa. Lo yeke bi bongo na le ti lo si lo baa kodro ni pepe.

¹³Mbi KOTA GBIA, mbi yeke bi gbanda ti mbi na ndö ti lo si lo yeke ti na ya ti kuku ti mbi. Mbi yeke gue na lo na Babilone, na sese ti azo ti Kalde. Me lo yeke baa sese ni pepe si lo kui kâ.

¹⁴Azo ti tere ti lo kue, aturugu ti batango lo na azo ti bira ti lo, fade mbi yeke kangbi ala kirikiri na ndo kue, mbi yeke tumba peko ti ala na yongoro zeme ti mbi.

¹⁵Tongana mbi kangbi ande ala na popo ti amara nde nga na ya ti akodro wande, tongaso ala yeke hinga atene, mbi yeke KOTA GBIA.

¹⁶Me fade mbi yeke bata ambeni na popo ti ala so ayeke kui kuâ ti yongoro zeme pepe, kuâ ti nzara pepe nga na kuâ ti sioni kobela ti bubango kodro pepe. Tongaso si ala yeke fa na amara nde so ala yeke gue na popo ti ala, peko ti asioni sarango ye ti ala so zo alingbi ti baa na le ti lo fani use pepe so. Tongaso, fade amara nde ni ayeke hinga atene, mbi yeke KOTA GBIA.”

¹⁷Tënë ti KOTA GBIA asi na mbi, atene:

¹⁸“Molenge ti zo, fade mo yeke te kobe ti mo na dongo tere, mo yeke nyon ngu ti mo gi na mbeto nga na gingo be.

¹⁹Na pekoni, mo yeke tene na azo ti sese ni kue, mo tene: ‘Tënë so Kota Gbia NZAPA atene na azo ti Jérusalem so angba na sese ti Israel ayeke so: Ala yeke te kobe ti ala na gingo be, ala yeke nyon ngu ti ala na ya ti kota mbeto. Biani, azo ayeke buba kodro ni, mbeni ye oko ayeke ngba daa pepe, ndali ti so azo so kue alango na ya ti kodro ni asara ngangu mingi na azo.

²⁰Agbata so azo ayeke lango daa ayeke ti biani si kodro ni ayeke ga benyama. Tongaso, fade ala yeke hinga atene, mbi laa mbi yeke KOTA GBIA.’ ”

²¹Tënë ti *KOTA GBIA asi na mbi, atene:

²²“*Molenge ti zo, *mato so azo ayeke tene na ndö ti Israel, atene: ‘Lango ayeke hon si ye oko so azo abaa na ya ti mbeni ye tongana bango-li, aga taa-tënë pepe’, ala yeke tene ni ngbanga ti nyen?

²³Tene na azo ti Israel, mo tene: Tënë so mbi Kota Gbia NZAPA, mbi tene ayeke so: Mbi yeke kai mato so na yanga ti ala; mbeni zo ayeke kiri ti tene ni pepe na sese ti Israel. Me mo tene na ala: ‘Lango ayeke ga nduru so aye so kue azo abaa na ya ti mbeni ye tongana bango-li ayeke ga taa-tënë.’

²⁴Aye so azo abaa na ya ti mbeni ye tongana bango-li si ayeke mvene, wala bango nda ti aye ti handango na azo ayeke kiri ti duti na popo ti azo ti Israel pepe.

²⁵Biani, mbi yeke KOTA GBIA; tënë so mbi yeke tene, peko ni ayeke ninga pepe ti ga taa-tënë. Ala azo ti mara ti ngangu li so, na ndembe so ala de na fini, mbi yeke sara aye so kue mbi tene tënë ni. So tënë ti yanga ti Kota Gbia NZAPA laa.”

²⁶Tënë ti KOTA GBIA asi na mbi, atene:

²⁷“Molenge ti zo, tënë so azo ti Israel atene ayeke so: ‘Ye so koli so abaa na ya ti mbeni ye tongana bango-li so, lango ni ade yongoro. Lo yeke tene peko ti tënë ti Nzapa ndali ti angoi so angba yongoro kâ.’

²⁸Ndali ni, mo tene na ala, mo tene: Tënë so mbi Kota Gbia NZAPA, mbi tene ayeke so: ‘Atënë so kue mbi yeke tene, ayeke ninga pepe ti ga taa-tënë.’ ” So tënë ti yanga ti Kota Gbia NZAPA laa.