Read La Bible en Sango courant – Mbeti ti Nzapa Ezekiel 15 Bible Online

Ezekiel 15 - La Bible en Sango courant – Mbeti ti Nzapa bible

Ezekiel 15

¹Tënë ti *KOTA GBIA asi na mbi, atene:

²“*Molenge ti zo, keke ti *vinye ayeke nzoni ahon atanga ti keke ti gbako na nyen? Amaboko ti keke ti vinye ayeke nzoni ahon amaboko ti keke ti gbako na nyen?

³A lingbi ti mu keke ni ti leke na mbeni ye? A lingbi ti mu keke ni ti leke na *kongi ti kanga mbeni ye daa na nduzu?

⁴Ên-en! A yeke bi ni na wâ si agbi. Tongana wâ agbi ayanga ni use kue awe si wâ ni agbi tanga ni, mbeni ye titene zo akiri asara na ni ayeke daa?

⁵So keke ni angba lani na ngbongboro ni, zo alingbi ti sara na ye oko pepe. Me fadeso wâ ate ni si agbi ni kue awe, mbeni ye so zo alingbi ti sara na ni ayeke daa?

⁶“Ndani laa, tënë so mbi Kota Gbia NZAPA, mbi tene ayeke so: Azo aye ti bi keke ti vinye na wâ ahon ti bi akeke ti gbako. Legeoko nga, fade mbi yeke bi azo ti Jérusalem tongaso.

⁷Mbi yeke be le na ala. Ala baa ti ala atene, ala sigigi na ya ti wâ awe, me fade wâ ayeke gbi ala kue. Tongaso, ala azo ti Jérusalem, fade ala yeke hinga atene, mbi laa mbi yeke KOTA GBIA, mbi so mbi be le na azo ni.

⁸Fade mbi yeke sara titene kodro ti azo ni aga benyama, ngbanga ti so ala sara ye so ayeke sioni mingi. So tënë ti yanga ti Kota Gbia NZAPA laa.”