Read La Bible en Sango courant – Mbeti ti Nzapa Ezekiel 16 Bible Online

Ezekiel 16 - La Bible en Sango courant – Mbeti ti Nzapa bible

Ezekiel 16

²“*Molenge ti zo, mo sara si Jérusalem ahinga asioni so lo sara si zo alingbi ti baa na le ti lo fani use pepe so.

³Fade mo tene na lo, mo tene: Tënë so Kota Gbia NZAPA atene na Jérusalem ayeke so: Kanaan ayeke sese ti akotara ti mo, ndo so a du mo daa. Babâ ti mo ayeke zo ti mara ti Amori si mama ti mo ayeke zo ti mara ti Het.

⁴Na lango so a du mo, a fâ turungu ti mo pepe, a sukula mo na ya ti ngu ti zi *sioni ti mo pepe, a kpaka tere ti mo na ingo pepe, a kanga nga mo na bongo pepe.

⁵Zo oko ti baa mo na nzoni le, ti sara na mo mbeni ye so oko ayeke daa pepe; zo oko abaa mawa ti mo pepe. Me na lango ti dungo mo, be ti azo ake mo si a bi mo na ngonda.

⁶Mbi hon nduru na tere ti mo si mbi baa mo na ndembe so mo yeke tirika tere ti mo na ya ti mene ti mo. Ataa so mene amu tere ti mo kue, mbi tene na mo: ‘Ngba na fini!’ Biani, mbi tene na mo: ‘Ngba na fini!’

⁷Na pekoni, mbi sara si mo wu tongana pere ti yaka. Mo mai, mo kono, mo ga pendere ahon ndoni; me ti mo asigigi, kua ti tere ti mo asigigi. Me bongo ayeke na tere ti mo pepe, mo yeke taa ndumbu.

⁸Mbeni lâ, mbi kiri mbi hon nduru na tere ti mo si mbi baa mo; andaa mo ga wali awe. Mbi gbara bongo ti mbi na ndö ti mo ti kanga na tere ti mo so ayeke ndumbu so. Mbi deba yanga ti mbi si mbi sara *mbuki na mo. Nilaa mo ga ti mbi. So tënë ti yanga ti Kota Gbia NZAPA laa.

⁹“Mbi sukula mo na ya ti ngu, mbi mbo mene so lani ayeke na tere ti mo, na pekoni mbi sara yombo na tere ti mo.

¹⁰Mbi mu na mo abongo so a sara apendere nzoroko na tere ni nga na apendere poro so a sara na poro ti nyama; mbi mu na mo kamba ti ndö ti bongo so a sara na *len si mbi yeke yu na mo abongo ti ngangu ngere.

¹¹Mbi yu mo na aye ti pendere nde nde, mbi yu na mo aye ti maboko na aye ti go.

¹²Mbi zia kati na hon ti mo, mbi zia aye ti mê na mê ti mo nga na pendere kpoto ti gbia na li ti mo.

¹³Aye ti pendere ti mo ayeke na lôro nga na wen ti nginza; a sara abongo ti mo na len ti nzoni ni nga na abongo ti ngangu ngere so a sara apendere nzoroko na tere ni. Kobe ti mo gi farini ti nzoni ni, mafuta ti wotoro na mafuta ti olive. Tongaso mo ga pendere ahon ndoni si mo lingbi ti duti gbia-wali.

¹⁴Sango ti pendere ti mo amu ndö ti dunia mobimba. Biani, pendere ti mo alingbi kue, ngbanga ti so mbi zia aye ti pendere mingi na tere ti mo. So tënë ti yanga ti Kota Gbia NZAPA laa.”

¹⁵“Me mo zia be ti mo na ndö ti pendere ti mo nga na ndö ti sango ti mo so amu ndo kue; tongaso mo sara ye ti ndumba. Mo lango na akoli so kue ayeke hon na lege si mo ga ye ti ala.

¹⁶Mo mu ambeni bongo ti mo, mo zia na ndo so azo aleke na nduzu ti voro anzapa nde daa titene ndo ni aga pendere si mo sara ye ti ndumba ti mo na ndö ni. Mara ti ye tongaso ade ti si laoko pepe, ayeke kiri ti si laoko pepe!

¹⁷Aye ti pendere ti lôro na ti wen ti nginza so mbi mu na mo, mo mu ni mo sara na ayanda ti koli si mo sara ye ti ndumba na ala.

¹⁸Mo mu abongo ti mo so a sara apendere nzoroko na tere ni, mo yu na ayanda ti mo ni; mo ya mafuta na dukani ti mbi na ala.

¹⁹Akobe so kue mbi yeke mu lani na mo, nzoni farini, mafuta ti wotoro na mafuta, mo kiri mo ya ni na *sandaga na ala titene fion ni anzere na ala. Ye so mo sara laa; so tënë ti yanga ti Kota Gbia NZAPA laa.

²⁰Jérusalem, amolenge-koli na amolenge-wali so mo du ala na mbi, mo ya ala na sandaga na ayanda ni titene ala ga kobe ti ala! Sarango ye ti ndumba ti mo alingbi lani na mo pepe?

²¹Mo fâ go ti amolenge ti mbi, mo gbi ala na wâ ti ya ala na sandaga na ayanda ti mo ni!

²²Na ndembe so mo yeke sara lani aye so zo alingbi ti baa na le ti lo fani use pepe si mo yeke sara aye ti ndumba ti mo, mo dabe ti mo na ngoi ti maseka ti mo pepe; na ngoi so mo yeke ndumbu si bongo ayeke na tere ti mo pepe, na ngoi so mo yeke tirika na ya ti mene ti mo, mo da nga be ti mo na ni pepe.

²³“Na peko ti sioni so kue mo sara, so mawa na mo! Ae, so mawa na mo! So tënë ti yanga ti Kota Gbia NZAPA laa.

²⁴Mo sara mbeni *koto ti sese, mo sara mbeni ndo na nduzu na ndo so kue azo ayeke bongbi daa.

²⁵Na asangbi-lege oko oko kue, mo sara mbeni ndo na nduzu, mo mu pendere ti mo ti sara na sioni ye so zo alingbi ti baa na le ti lo fani use pepe. Mo zia tere ti mo na akoli so kue ayeke hon na lege; sarango aye ti ndumba ti mo ayeke gue guengo na nduzu.

²⁶Mo sara ye ti ndumba na azo ti Ezipte, azo so alango nduru na mo si tere ti ala ti koli akono mingi. Mo sara aye ti ndumba gbani gbani ti zia ngonzo na be ti mbi.

²⁷Tongaso mbi yoro maboko ti mbi ti pika mo: mbi gbanzi mo na kobe, mbi zia mo na maboko ti awato ti mo, agbata ti Filistii so kamene asara ala ndali ti sioni sarango ye ti mo.

²⁸Me nzara ti tere ti mo ahunzi na ya ti mo pepe, mo sara ye ti ndumba na azo ti Asirii. Ataa so kue, nzara ti tere ti mo ni ahunzi na ya ti mo pepe.

²⁹Mo sara aye ti ndumba ti mo ni ahon ndoni na kodro ti azo ti Babilone, azo ti dengo buze. Ataa so kue, nzara ti tere ti mo ahunzi na ya ti mo pepe.

³⁰Ae, mo yeke kanga be pepe! So tënë ti yanga ti mbi, Kota Gbia NZAPA laa. Na sarango ye tongaso, mo ga makonzi wali-ndumba!

³¹Na asangbi-lege kue, mo sara mbeni da-nduzu; mo sara mbeni ndo na nduzu na ndo so kue azo ayeke bongbi daa. Me mo sara ye tongana awali-ndumba pepe: mo ke ti hunda nginza.

³²Mo yeke tongana wali so alango na akoli nde; lo ye awande na plase ti koli ti lo.

³³Awali-ndumba kue ayeke wara futa; me ti mo, mo laa mo mu kadoo na andeko ti mo kue. Mo futa ala titene ala londo na ando nde nde aga ti lango na mo.

³⁴Na sarango ye ti ndumba ti mo, mo sara ti mo ye ni nde na tanga ti awali-ndumba. Akoli agi peko ti mo pepe, akoli afuta mo pepe; me mo laa mo yeke futa ala. Mo sara ti mo ye ni nde na ti amba ti mo!

³⁵“Mo Jérusalem, wali-ndumba, mo ma tënë ti KOTA GBIA si.

³⁶Tënë so Kota Gbia NZAPA atene ayeke so: Mo zia tere ti mo ti wali na gigi, mo sara si tere ti mo angba ndumbu na sarango ye ti ndumba na andeko ti mo nga na afungo yanda ti mo. Ataa mene ti amolenge ti mo, mo tuku ni ti mu na sandaga na ayanda ti mo ni.

³⁷Ndani laa, mbi yeke bongbi andeko so kue mo nzere na le ti ala so, ala so kue mo ye ala nga na ala so kue be ti mo ake ala. Mbi yeke bongbi ala na ndo kue ti ga na tere ti mo; mbi yeke zi bongo kue na tere ti mo na le ti ala titene ala baa tere ti mo so kue angba senge so.

³⁸Fade mbi yeke fâ ngbanga na li ti mo alingbi na ti so a yeke fâ na li ti awali ti gingo koli ti amba ti ala nga na ala ti tukungo mene. Mbi yeke tuku mene ti mo na lege ti ngonzo ti mbi ti wâ nga na lege ti mbanda ti mbi.

³⁹Mbi yeke zia mo na maboko ti andeko ni so. Ala yeke kpaka akoto ti mo ni si ala yeke kungbi na sese aye so mo leke na nduzu ndali ti ayanda ti mo so. Andeko ti mo ni ayeke ro na tere ti mo kue abongo nga na aye ti pendere ti mo si ala zia mo tere ti mo kue senge.

⁴⁰Na pekoni, ala yeke pusu gba ti azo na tere ti mo, ala yeke bo mo na têne, ala yeke fâ ya ti mo kete kete na yongoro zeme.

⁴¹Ala yeke gbi ada ti mo, ala yeke de ngbanga na li ti mo na le ti gba ti awali. Mbi yeke sara si kua ti mo ti ndumba ni ahunzi biani biani, mo yeke kiri ti futa andeko ti mo ni pepe.

⁴²Le ti mbi ayeke be na ngonzo ti wâ na tere ti ala ngbii be ti mbi ade si. Na pekoni, mbanda so mbi yeke sara na tere ti mo ayeke hunzi, be ti mbi ayeke de, mbi yeke kiri ti sara ngonzo pepe.

⁴³Ye so mbi sara na mo na ndembe so mo de maseka, mo dabe ti mo na ni pepe; mo kiri mo so be ti mbi na sarango aye ti mo. Tongaso, mbi nga, mbi yeke sara titene futa ti sarango ye ti mo ati na li ti mo wani! So tënë ti yanga ti mbi, Kota Gbia NZAPA laa. Mo sara sioni ye so zo alingbi ti baa na le ti lo fani use pepe. Na ndö ni, mo sara aye ti potopoto pepe?”

⁴⁴“Jérusalem, azo ti tenengo mato ayeke tene ande mato na iri ti mo, atene: ‘Gi sarango ye ti mama ti lo laa molenge-wali so amu so!’

⁴⁵Biani, mo yeke molenge-wali ti mama so be ti lo ake koli ti lo na amolenge ti lo. Mo yeke biani ita ti a-ita ti mo ti wali so be ti ala ake akoli ti ala na amolenge ti ala. Mama ti ala ayeke zo ti mara ti Het si babâ ti ala ayeke zo ti mara ti Amori.

⁴⁶Yaya ti mo ti wali so ayeke na Banga ayeke Samarii, lo na agbata so ayeke nduru na lo. Ngambe ti mo ti wali so ayeke na Mbongo ayeke Sodome, lo na agbata so ayeke nduru na lo.

⁴⁷Mo mu gi lege ti sarango ye ti ala pepe, mo na ala asara gi mara sioni ye so zo alingbi ti baa na le ti lo fani use pepe; so kue alingbi na mo pepe! Me lege ti sarango ye ti mo ayeke sioni mingi ahon ti ala kue!

⁴⁸Fini ti mbi! So tënë ti yanga ti mbi, Kota Gbia NZAPA laa: Ataa Sodome, ita ti mo ti wali na agbata so ayeke nduru na lo asara pepe mara ti asioni ye so mo na agbata so ayeke nduru na mo asara.

⁴⁹Baa, asioni ti ita ti mo Sodome na agbata so ayeke nduru na lo ayeke so: ala yeke agbata ti baba, ala yeke te ye ahon ndoni, ala duti kpoo, mbeni ye ti so be ti ala ayeke daa pepe; ala mu maboko na awayere pepe nga na azo ti mawa.

⁵⁰Ala fa tere ti ala ahon ndoni, ala sara asioni ye so mbi lingbi ti baa na le ti mbi fani use pepe. Tongaso mbi zi ala na ndö ti sese tongana ti so mo baa so.

⁵¹Ti Samarii, asiokpari so lo sara alingbi nga na ndambo ti ti mo pepe. Mo sara asioni ye mingi so zo alingbi ti baa na le ti lo fani use pepe ahon ti lo. Mo sara si azo abaa a-ita ti mo Sodome na Samarii mbirimbiri ahon mo ndali ti asioni ye so mo sara si zo alingbi ti baa na le ti lo fani use pepe so.

⁵²Fadeso ngoi ti mo alingbi awe titene mo yo gba ti kamene ndali ti asiokpari ti mo! Biani, mo sara asioni ye ahon a-ita ti mo ti wali; mo sara si ala ga mbirimbiri ahon mo. Ngoi ti mo alingbi awe titene kamene agbu le ti mo si mo yo gba ti kamene, ngbanga ti so mo sara si azo abaa a-ita ti mo azo ti mbirimbiri!

⁵³Mbi yeke sara si dutingo ti agbata so akiri aga nzoni tongana ti kozo: Sodome na agbata so ayeke na tere ni, Samarii na agbata so ayeke na tere ni. Ti mo Jérusalem, mbi yeke sara nga si dutingo ti mo aga nzoni tongana ti ala.

⁵⁴Tongaso, mo yeke yo gba ti kamene si kamene ayeke gbu le ti mo ndali ti aye so kue mo sara: ye ni ayeke de be ti agbata ni.

⁵⁵Mbi yeke sara titene Sodome, Samarii na agbata so ayeke nduru na ni aga tongana ti kozoni. Ye ni ayeke nga tongaso ndali ti mo Jérusalem, na agbata so ayeke nduru na mo.

⁵⁶Ando, na ngoi so mo yeke pika kate ti mo, mo yeke tene gi sioni tënë ti ita ti mo Sodome.

⁵⁷Lani, sioni ti mo ade ti sigigi polele na le ti azo pepe. Fadeso, asigigi awe si azo ti agbata ti Edom na agbata so ayeke na tere ni ayeke he mo; azo ti agbata ti Filistii mbage na mbage kue abaa mo tongana mbumbuse ye.

⁵⁸Tongaso mo yo ngbanga ti asioni ye ti mo nga na asioni ye so mo sara si zo alingbi ti baa na le ti lo fani use pepe so. So tënë ti yanga ti KOTA GBIA laa.

⁵⁹“Biani, tënë so mbi Kota Gbia NZAPA, mbi tene ayeke so: Mo baa dengo ba ti yanga ti mo tongana mbumbuse ye si mo buba lege ti *mbuki ti mbi na mo. Ndani laa, fade mbi yeke sara na mo alingbi na ye so mo sara.

⁶⁰Ti mbi, fade mbi yeke dabe ti mbi na mbuki ti mbi na mo na ndembe so mo de maseka. Mbi yeke sara mbuki ni na mo kpu na kpu.

⁶¹Na ndembe so mo yeke yamba a-ita ti mo ti wali, ayaya ni na angambe ni, fade mo yeke dabe ti mo na lege ti sarango ye ti mo si li ti mo ayeke ne na kamene. Mbi yeke zia a-ita ti mo ni na gbe ti komandema ti mo, me ala yeke sara mbuki na mo pepe.

⁶²Mbi yeke kiri ti sara mbuki ti mbi na mo si mo yeke hinga, mo tene, mbi yeke KOTA GBIA.

⁶³Tongaso, fade mo yeke dabe ti mo na ngoi so ahon; kamene ayeke sara mo si mo yeke kiri ti zi yanga pepe ndali ti gba ti kamene so agbu le ti mo na ndembe so mbi yeke zi na li ti mo sioni so kue mo sara. So tënë ti yanga ti Kota Gbia NZAPA laa.”