Read La Bible en Sango courant – Mbeti ti Nzapa Ezekiel 17 Bible Online

Ezekiel 17 - La Bible en Sango courant – Mbeti ti Nzapa bible

Ezekiel 17

¹Tënë ti *KOTA GBIA asi na mbi, atene:

²“*Molenge ti zo, mo fa mbeni *mato na azo ti Israel; mo tene na ala mbeni toli.

³Mo tene na ala, mo tene: Tënë so Kota Gbia NZAPA atene ayeke so: ‘Mbeni kota *ngoalo ayeke daa so *akpangi ti lo akono mingi, kua ti tere ti lo ayo yongo si ayeke gbani gbani, anzoroko ni ayeke nde nde. Mbeni lâ, lo huru lo ga na ndö ti hoto ti Liban. Lo kungbi li ti keke ti sedre,

⁴lo suru maboko ti keke ni so ayo na nduzu ahon atanga ni kue, lo gue na ni na kodro ti azo ti kango ye si lo zia ni na ya ti gbata ti azo ti dengo buze.

⁵Na pekoni, lo mu mbeni ngoangoa ti keke ti sese ti Israel si lo lu ni na sese so a leke ni nzoni. Lo lu ni na tere ti kota ngu tongana mbeni keke so aye ngu mingi.

⁶Ngoangoa ni amai si aga nzoni keke ti *vinye, mbeni mara ti vinye so ayeke hara na sese. Amaboko ni ague na mbage ti ngoalo ni, agunda ni ayeke na gbe ti lo. Vinye ni aga mbeni keke ti vinye so akete keke ni asigigi na tere ni si amaboko ni asigigi daa.

⁷Me mbeni kota ngoalo nde aga; akpangi ti lo akono mingi si kua ti tere ti lo ayeke gbani gbani. Na ndo so a lu keke ti vinye ni daa, agunda ni ague na mbage ti ngoalo ni si amaboko ni aturne na mbage ti ngoalo ni titene lo tuku gba ti ngu na ndö ni.

⁸Andaa a lu lo lani na ya ti nzoni sese, na tere ti kota ngu titene amaboko ni asigigi daa, ale si aga pendere keke ti vinye.’

⁹“Mo tene: Tënë so Kota Gbia NZAPA atene ayeke so: ‘Vinye so ayeke mai ande laa? Kozo ngoalo ni ayeke gboto agunda ti vinye ni pepe? Lo yeke buba ale ni si akete keke so asigigi na tere ni ahole pepe? Lo yeke hunda titene mbeni ngangu zo wala gba ti azo si agboto ni pepe.

¹⁰So a lu vinye ni nzoni awe so, lo yeke mai ande laa? Gi so pupu ti To ayeke ya na ndö ti lo, fade lo yeke hole kasakasa pepe? Na ndö ti sese so lo lingbi fade ti kono daa, lo yeke hole.’ ”

¹¹Tënë ti KOTA GBIA asi na mbi, atene:

¹²“Mo hunda azo ti mara ti ngangu li so, mo tene: Ala ma nda ti toli so pepe? Mo tene na ala, mo tene: Lani gbia ti Babilone aga na Jérusalem, lo mu gbia ni na amakonzi ti lo si lo gue na ala na Babilone.

¹³Na pekoni, lo mu mbeni zo ti sewa ti gbia ni, lo sara *mbuki na lo. Gbia ti Babilone asara si zo ni adeba yanga ti lo ti ngba na peko ti lo. Gbia ni ague na akota zo ti kodro ni na yongoro ndo

¹⁴titene kodro ni akiri na peko, awara lege ti mai pepe; fini gbia ni abata tënë ti mbuki ti lo si kodro ni ayingi pepe.

¹⁵Me lo tomboka na tere ti gbia ti Babilone. Lo tokua azo na Ezipte titene kodro ni amu na lo ambarata na gba ti aturugu. Zo so asara ye so, fade ye ni ayeke ga nzoni na lo laa? Lo yeke sigigi na ya ti kpale ni? Oko pepe, ngbanga ti so lo wani, lo buba lege ti mbuki ni awe.

¹⁶“Fini ti mbi! So tënë ti yanga ti mbi, Kota Gbia NZAPA laa: Gbia so ayeke kui ande na kodro ti gbia so azia lo na ndö ti mbata ti gbia so. Biani, lo baa dengo ba ti yanga ti lo tongana senge ye, lo buba ya ti mbuki ni. Tongaso, na Babilone, na ndo ti gbia ni laa, gbia ti Israel ayeke kui.

¹⁷Na ndembe ti bira ni, na ndembe so azo ti Babilone ayeke bongbi sese na tere ti gbagba titene aga *koto si ala yeke zi adu na gbe ti gbagba ni ti fâ na gba ti azo, ataa Faraon ti Ezipte aga na gba ti aturugu nga na gba ti azo, lo yeke sara ye oko pepe ndali ti gbia ti Israel.

¹⁸So gbia ti Israel ni abaa dengo ba ni tongana mbumbuse ye, lo buba ya ti mbuki ni. So lo sara ye tongaso, fade lo yeke sigigi na ya ni pepe.

¹⁹“Ndani laa, tënë so mbi Kota Gbia NZAPA, mbi tene ayeke so: Fini ti mbi! Dengo ba ti yanga so lo de lani na dawa ti mbi, lo baa ni tongana mbumbuse ye; tënë ti mbuki ti mbi so lo buba ya ni, ti taa-tënë ni, fade mbi yeke sara titene ngbanga ni ati na li ti lo.

²⁰Mbi yeke bi gbanda ti mbi na ndö ti lo, mbi yeke sara titene lo ti na ya ti kuku ti mbi. Mbi yeke gue na lo na Babilone; kâ, mbi yeke fâ ngbanga na li ti lo ndali ti asioni so lo sara ti ke mbi.

²¹Akpengba turugu ti lo kue ayeke kui ande na yanga ti bira, ala so ayeke ngba na fini ayeke kangbi na ndo kue. Tongaso, fade ala yeke hinga atene, mbi KOTA GBIA laa mbi tene tënë so.”

²²“Tënë so mbi Kota Gbia NZAPA, mbi tene ayeke so: Mbi wani, fade mbi yeke mu mbeni fini maboko ti keke ti sedre taa na li ti keke ni si mbi yeke lu ni; mbi yeke fâ kete maboko na tere ti akota maboko ni si mbi yeke lu ni na li ti kota hoto so ayo na nduzu mingi.

²³Mbi yeke lu maboko ni na ndö ti mbeni yongoro hoto ti Israel. Fade amaboko ni ayeke sigigi daa, ayeke le si ayeke ga pendere keke ti sedre. Amara ti andeke nde nde ayeke sara da ti ala na ya ti amaboko ti keke ni, ala yeke duti na gbe ti de ni.

²⁴Tongaso, fade akeke ti yaka kue ayeke hinga atene, mbi laa mbi yeke KOTA GBIA. Mbi yeke sara si akeke so ayo na nduzu mingi aga kete; mbi yeke sara si akete keke amai. Mbi yeke sara si afini keke ahole, mbi yeke sara si akongo asigigi na ndö ti aholengo keke. Mbi KOTA GBIA, mbi tene tënë awe, mbi yeke sara ye ni.”