Read La Bible en Sango courant – Mbeti ti Nzapa Ezekiel 18 Bible Online

Ezekiel 18 - La Bible en Sango courant – Mbeti ti Nzapa bible

Ezekiel 18

¹Tënë ti *KOTA GBIA asi na mbi, atene:

²“Na sese ti Israel, azo ayeke tene mato so lakue: ‘Ababâ ate akpi-kpi le ti *vinye, me pembe ti amolenge laa akui.’ Ala yeke tene ni ngbanga ti nyen?

³Fini ti mbi! Ala yeke kiri ti tene mato so na Israel mbeni pepe. So tënë ti yanga ti Kota Gbia NZAPA laa.

⁴Biani, fini ti azo kue ayeke ye ti mbi, ataa fini ti ababâ wala ti amolenge. Zo so asara siokpari, lo laa lo yeke kui.

⁵“E mu tapande ti mbeni zo ti mbirimbiri: lo yeke sara ye na legeni nga na lege ti ndia.

⁶Lo yeke te akobe ti anzapa nde na li ti ahoto pepe, lo yeke yo le ti lo na mbage ti ayanda ti azo ti Israel pepe. Lo yeke lango na wali ti mba ti lo pepe; wali so ayeke baa ya ti lo, lo yeke duti na lo koli na wali pepe.

⁷Lo yeke sara ngangu na zo pepe; tongana lo gbu ye ti zo ndali ti yongo ti lo so ayeke na li ti zo ni, lo yeke kiri na ni; lo yeke nzi ye ti zo pepe, lo yeke mu kobe na zo so nzara asara lo, lo yeke mu bongo na zo so bongo atia lo.

⁸Tongana lo sara boon ti nginza na mbeni zo, lo yeke hunda mbeni nginza na ndö ni pepe, lo yeke gi ti wara ye na peko ni pepe; lo yeke yoro tere ti lo na ya ti ye ti kirikiri pepe, lo yeke fâ ya ti ngbanga na legeni.

⁹Lo yeke tambula alingbi na atënë ti ndia ti mbi, lo yeke sara ye alingbi na aye so mbi fa; sarango ye ti lo alingbi na lege ti taa-tënë. Lo yeke zo ti mbirimbiri; fade lo yeke duti na fini biani. So tënë ti yanga ti Kota Gbia NZAPA laa.

¹⁰“Zo ni alingbi ti du mbeni molenge-koli so ayeke sioni zo, lo yeke fâ azo si lo yeke sara mara ti asioni ye nde nde tongaso.

¹¹Babâ ni asara ti lo asioni ye so oko pepe. Me molenge ni ayeke te akobe ti anzapa nde na li ti hoto, lo yeke lango na wali ti amba ti lo;

¹²lo yeke sara ngangu na azo ti mawa na awayere, lo yeke nzi ye ti azo. Ye so lo gbu na maboko ti zo ndali ti yongo ti lo, lo yeke kiri na ni na wani pepe, lo yeke baa ndo na mbage ti ayanda, lo yeke sara aye so zo alingbi ti baa na le ti lo fani use pepe.

¹³Tongana lo sara boon ti nginza na mbeni zo, lo yeke hunda gba ti nginza na ndö ni, lo yeke gi ti wara mbeni ye na peko ni. Mara ti molenge tongaso ayeke ngba na fini? Oko pepe! So lo sara aye so kue zo alingbi ti baa na le ti lo fani use pepe so, fade lo yeke kui si ngbanga ti mene ti lo ayeke kiri na li ti lo wani.

¹⁴“Zo so alingbi nga ti du mbeni molenge-koli so abaa asiokpari so kue babâ ti lo asara; lo baa ni, me lo sara ye tongana babâ ni pepe.

¹⁵Lo yeke te akobe ti anzapa nde na li ti hoto pepe, lo yeke baa ndo na mbage ti ayanda ti azo ti Israel pepe, lo yeke lango na wali ti amba ti lo pepe.

¹⁶Lo yeke sara ngangu na zo pepe; ye so lo gbu na maboko ti zo ndali ti yongo ti lo, lo yeke gbanzi ni pepe; lo yeke nzi ye ti zo pepe, lo yeke mu kobe ti lo na zo so nzara asara lo, lo yeke mu bongo na zo so bongo atia lo.

¹⁷Lo yeke yoro tere ti lo na ya ti ye ti kirikiri pepe. Tongana lo sara boon ti nginza na mbeni zo, lo yeke hunda mbeni nginza na ndö ni pepe, lo yeke gi ti wara ye na peko ni pepe. Lo yeke sara ye alingbi na aye so mbi fa si lo yeke tambula alingbi na atënë ti ndia ti mbi. Molenge-koli so ayeke kui ndali ti asiokpari ti babâ ti lo pepe; biani, lo yeke ngba na fini.

¹⁸Me babâ ni laa asara ngangu na azo, lo nzi ye ti ita ti lo, lo sara ye so ayeke nzoni pepe na azo ti kodro ti lo. Fade lo laa lo yeke kui ndali ti sioni ti lo wani.

¹⁹“Ala yeke hunda ndo, atene: ‘Asioni so babâ ni asara so, ndali ti nyen si molenge ni ayo ngbanga ni pepe?’ Ayeke ndali ti so molenge ni asara ye na lege ti ndia nga na lege ti ye ti mbirimbiri. Lo bata atënë ti andia ti mbi kue, lo sara ye alingbi na ni. Ndali ni, fade lo yeke ngba na fini.

²⁰Zo so asara siokpari, lo laa lo yeke kui. Fade molenge ayeke yo ngbanga ti sioni ti babâ ti lo pepe; babâ ayeke yo ngbanga ti sioni ti amolenge ti lo pepe. Zo ti mbirimbiri ayeke wara futa ti sarango ye ti mbirimbiri ti lo, zo ti sioni ayeke wara futa ti sarango sioni ti lo.”

²¹“Tongana zo ti sioni azia lege ti asiokpari so kue lo sara, tongana lo bata atënë ti ndia ti mbi kue si lo sara ye na lege ti ndia nga na lege ti ye ti mbirimbiri, biani, fade lo yeke ngba na fini, lo yeke kui pepe.

²²Asioni so kue lo sara, fade a yeke kiri ti dabe na ni pepe; lo yeke ngba na fini ndali ti ye ti mbirimbiri so lo sara.

²³Ala baa ti ala atene, be ti mbi anzere na kuâ ti zo ti sioni? Ye so anzere na be ti mbi, ayeke titene lo zia lege ti asioni ti lo si lo ngba na fini. So tënë ti yanga ti Kota Gbia NZAPA laa.

²⁴Me ti zo ti mbirimbiri so azia lege ti sarango ye ti mbirimbiri ti lo, tongana lo to nda ti sara asioni ye so zo alingbi ti baa na le ti lo fani use pepe tongana ti azo ti sioni, ala baa ti ala atene, fade lo yeke ngba na fini? Aye ti mbirimbiri so kue lo sara, a yeke kiri ti dabe na ni pepe. Fade lo yeke kui ndali ti asioni ye ti lo nga ndali ti asiokpari so lo sara.

²⁵Me ala yeke tene: ‘Sarango ye ti KOTA GBIA ayeke na legeni pepe!’ Ala azo ti Israel, ala ma tënë so nzoni: Mbi laa sarango ye ti mbi ayeke na legeni pepe? Wala ala laa sarango ye ti ala ayeke na legeni pepe?

²⁶Tongana zo ti mbirimbiri azia lege ti sarango ye ti mbirimbiri ti lo, lo sara ye ti kirikiri si lo kui, lo yeke kui ndali ti ye ti kirikiri so lo sara.

²⁷Me tongana zo ti sioni azia lege ti sioni so lo sara si lo sara ye na lege ti ndia nga na lege ti ye ti mbirimbiri, lo yeke soo fini ti lo.

²⁸Tongana li ti lo aga daa, lo baa aye ti sioni ti lo tongana sioni ye si lo zia lege ni, biani, lo yeke ngba na fini, lo yeke kui pepe.

²⁹Me ala, azo ti Israel, ala yeke tene: ‘Sarango ye ti KOTA GBIA ayeke na legeni pepe!’ Mbi laa sarango ye ti mbi ayeke na legeni pepe? Wala ala laa sarango ye ti ala ayeke na legeni pepe?

³⁰Ndani laa, ala azo ti Israel, fade mbi yeke fâ ngbanga na li ti zo oko oko alingbi na lege ti sarango ye ti lo; so tënë ti yanga ti mbi, Kota Gbia NZAPA laa. Ala zia ngbene lege ti sarango ye ti ala, ala zia lege ti asioni ye so kue ala yeke sara. Tongaso si ye so ayeke sara titene ala ti, aduti daa mbeni pepe.

³¹Ala bi asioni sarango ye ti ala yongoro, ala sara si be ti ala na yingo ti ala aga fini ni! Ala azo ti Israel, ala ye ti kui ngbanga ti nyen?

³²Biani, be ti mbi anzere na kuâ ti mbeni zo pepe; so tënë ti yanga ti mbi, Kota Gbia NZAPA laa. Ala zia lege ti sioni si ala ngba na fini!”